اقتوبەدە ەرەكشە كۇتىمدى قاجەت ەتەتىن بالالارعا ارنالعان تۇزەۋ ورتالىعى اشىلدى
وڭالتۋ ورتالىعىندا اۋتيزم دەرتىنە شالدىققان، پسيحيكالىق دامۋى تەجەلگەن، داۋن سيندرومىمەن ءبىلىم الۋعا ەرەكشە قاجەتتىلىكتەرى بار بالالار قابىلدانادى. مۇندا بالالاردىڭ دامۋىنا بارلىق جاعداي قاراستىرىلعان. سەنسورلىق بولمە، تيفلوپەداگوگ، سۋردوپەداگوگ، مۋزىكالىق بولمە، جاتتىعۋ زالدارى بار.
«دەرتكە شالدىققان سابيلەرىمىزگە كومەك كورسەتۋ باستى پارىزىمىز. بالالاردى وڭالتۋ، تۇزەتۋ قوعامداعى ۇلكەن پروبلەمالاردىڭ ءبىرى بولىپ وتىر. ورتالىق بولاشاقتا بالالارىمىزعا ۇلكەن دەم بەرەدى دەپ سەنەمىن»، - دەدى ءوڭىر باسشىسى وڭداسىن ورازالين.
مۇندا كامەلەت جاسقا تولماعان بالالار قابىلدانادى.
«قازىر اۋدانداردا 13 تۇزەتۋ كابينەتى جۇمىس ىستەپ تۇر. اقتوبە قالاسىندا ەرەكشە كۇتىمدى قاجەت ەتەتىن بالا كوپ بولعان سوڭ تاعى بىرەۋى تولىق جابدىقتالىپ، قولدانىسقا بەرىلدى. پەداگوگتار جەتكىلىكتى. ولار بىرنەشە وڭالتۋ ورتالىعىندا ەڭبەك ەتەدى. ءارى جوعارى وقۋ ورنى مەن ءبىلىم بەرۋ مەكەمەلەرى اراسىنداعى كەلىسىم اياسىندا دەفەكتولوگتار سۇرانىسقا ساي دايىندالىپ جاتىر»، - دەدى وبلىستىق ءبىلىم باسقارماسىنىڭ باسشىسى ءلاززات ورازبايەۆا.
ايتا كەتەيىك، اقتوبە قالاسىندا پسيحولوگيالىق- پەداگوگيكالىق تۇزەۋ ورتالىعى العاش رەت 2015 -جىلى 80 ورىندىق بولىپ اشىلعان بولاتىن. قازىر وندا 127 بالا ەم قابىلدايدى. بالالار سانى ارتىپ، قاجەتتىلىك تۋىنداعاندىقتان ەكىنشى كابينەت پايدالانۋعا بەرىلدى. قازىر وبلىستا ەرەكشە كۇتىمدى قاجەت ەتەتىن 6370 بالا بار، ونىڭ ىشىندە 4200 دەن استامى اقتوبە قالاسىندا تىركەلگەن.
