قالادا ءتورتىنشى مەشىت سالۋ ءتيىمسىز - وبلىس باسشىسى مۇحامبەتوۆ

قوستاناي. قازاقپارات - وبلىس باسشىسى قوستاناي قالاسىنداعى ءتورتىنشى مەشىتتىڭ قۇرىلىسىنا قاتىستى پىكىر ءبىلدىردى، دەپ حابارلايدى قازاقپارات.

بۇگىنگى وبلىس اكىمىنىڭ ەسەپ بەرۋ جيىنىندا قوستاناي قالاسىنىڭ «التىن ارمان» شاعىن اۋدانىنىڭ تۇرعىندارى اتىنان مەشىت قۇرىلىسىن باستاۋ تۋرالى سۇراق قويىلدى. ساۋال قويۋشى اقساقالدىڭ سوزىنشە، «التىن ارمان» شاعىن اۋدانىنىڭ تۇرعىندارىنا ورتالىقتاعى مەشىتكە كەلۋ قيىندىق تۋعىزادى.

«بۇل ماسەلە تۋرالى ناقتىلاپ وتەيىن. وبلىس ورتالىعىندا ءۇش مەشىت جۇمىس ىستەپ تۇر. 3000 ادام قابىلدايتىن ورتالىق مەشىت پەن اباي كوشەسىندەگى قالالىق مەشىت بار. وعان قوسا جاقىندا «اقمەشىت» پايدالانۋعا بەرىلەدى. سوندىقتان قالادا تاعى ءبىر مەشىت سالۋ بىزگە ءتيىمسىز. سەبەبى، ونى كۇتىپ-ۇستاۋ، كوممۋنالدىق تولەمدەر، يمامدارعا جالاقى تولەۋ سياقتى ماسەلەلەر بار. ال اۋدان ورتالىقتارى مەن اۋىلدارعا مەشىت قاجەتتىلىگى بار. سونىڭ ءبىرى - ىرگەدەگى اۋليەكول اۋىلى. ال ەگەر دەمەۋشى تاپساڭىزدار، قازاقستان مۇسىلماندارى ءدىني باسقارماسى ارقىلى سالۋعا بولادى»، - دەپ ءتۇسىندىردى وبلىس باسشىسى.

ارحيمەد مۇحامبەتوۆ وڭىردە تاريحي-مادەني مۇرانى ساقتاۋ، ناسيحاتتاۋ جانە كيەلى وبەكتىلەردىڭ ينفراقۇرىلىمىن دامىتۋ جۇمىستارى جالعاسىپ جاتقانىنا توقتالدى.

«2019 -جىلى 214 ارحەولوگيالىق ەسكەرتكىش قالىپقا كەلتىرىلدى، قارجىلاندىرۋ 4 ميلليون تەڭگەدەن اسادى. جانگەلدين اۋدانىندا قازىباي اۋليە كەسەنەسىندە تاعزىم ەتۋگە ارنالعان ءۇي، قوبىزشى تىلەپ اسپانتاي ۇلىنىڭ جەرلەنگەن جەرىندە كەسەنە سالىندى. ب. مايلين اۋدانىندا باتىر جاباعى يپان ۇلىنىڭ جەرلەنگەن جەرىندە قورشاۋلار مەن قاقپالار ورناتىلىپ، كىرمە جولى گرەيدەرمەن تەگىستەلدى. قوستانايدا «اق مەشىت» كيەلى وبەكتىسىندە عىلىمي-قالپىنا كەلتىرۋ جۇمىستارى جۇرگىزىلۋدە»، - دەدى ارحمەد مۇحامبەتوۆ.

سونىمەن قاتار كيەلى نىسانداردىڭ، ونىڭ ىشىندە جەرگىلىكتى ماڭىزى بار 9 جاڭا كيەلى ورىننىڭ ءتيىستى ينفراقۇرىلىمىن جۇرگىزۋ جۇمىستارى 2020 -جىلى جالعاسادى.

اۆتور: قاسقىرباي قويشىمانوۆ