ۋحاننان جەتكىزىلگەن قازاقستاندىق ستۋدەنت كارانتين قالاي جۇرگىزىلگەنىن ايتىپ بەردى
«ۋحان قالاسىن كارانتينگە جابۋ تۋرالى حابار 22 - قاڭتار كۇنى كەلىپ ءتۇستى. بۇل ۋاقىتتا قىتاي حالقىنىڭ جاڭا جىلى تويلانادى. وندا 2-3 جىلدان بەرى تۇرىپ جاتقاندىقتان، جاڭا جىلدا دۇكەندەردىڭ جابىلاتىنىن بىلەمىز. بۇل جولى دا ازىق- تۇلىكتى الدىن الا ساتىپ العانبىز. كارانتين كەزىندە بارلىق كولىك جولدارى جابىلادى. ۆوكزال، اۋەجاي جۇمىس ىستەمەيدى. توتەنشە جاعداي رەجىمى ەنگىزىلدى. 22 - قاڭتاردان 2 - اقپانعا دەيىن كامپۋستا، ءوز بولمەمىزدە وتىردىق. ءار كورپۋس ءوز ستۋدەنتتەرى ءۇشىن جاۋاپتى بولدى. تەك ازىق- تۇلىك الۋ ءۇشىن كۋراتورعا ەسكەرتىپ، كامپۋستان شىعاتىنبىز. وندا دا بەتپەردە، كوزىلدىرىك، قولعاپ كيىپ، ەشكىممەن بايلانىسپاۋعا تىرىستىق. بارلىعى ۇيىمداستىرىلدى. الەۋمەتتىك جەلىدە ايتىلعانداي ەش دۇرلىگۋ بولعان جوق. ءبىر ءۇزىم نان ءۇشىن توبەلەسۋ بولعان جوق»، - دەدى گ. بولاتبەك قىزى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
وسىلايشا، ۋحان ستۋدەنتتەرى جالپى ەسەپپەن 24 كۇن كارانتيندە بولعان.
«22 - قاڭتار - 2 - اقپان ارالىعىندا 10 كۇن كامپۋستا وتىردىق. وعان قوسا، قازاقستاندا 14 كۇن وقشاۋ ءومىر سۇردىك. ءبىزدى نۇر- سۇلتانداعى كوپبەيىندى اۋرۋحاناعا جاتقىزدى. ماماندار قاجەتتى ساراپتامالاردىڭ ءبارىن جاسادى. ەشقايسىسىنان كوروناۆيرۋس تابىلعان جوق. توتەنشە جاعداي بولماعاندا، بىزدە كۋرورتتىق دەمالىس بولدى دەپ ايتۋعا بولادى. كۇنىنە 4 رەت تاماقتاندىرىپ، دەنساۋلىعىمىزدى ءجىتى تەكسەردى. كەي ادامدار سترەستى جاعدايعا تۇسكەندىكتەن، دارىگەرلەر ولارمەن ۇزدىكسىز سويلەسىپ وتىردى. پيجاماعا دەيىن قاجەتتى كيىمدى اۋرۋحانانىڭ ءوزى بەردى. وسىنىڭ بارلىعىن ماماندار جەدەل ۇيىمداستىرا الدى جانە ولارعا زور العىس ايتامىز»، - دەيدى ستۋدەنت.
سونىمەن بىرگە، ونىڭ ايتۋىنشا قازاقستان مەن قىتايدىڭ ءبىلىم مينيسترلىكتەرى ستۋدەنتتەردىڭ وقۋىن جالعاستىرۋ ماسەلەسىن تالقىلاعان.
«مۇنداعى اڭگىمە قىتايعا ەكىجاقتى باعدارلامامەن بارعاندار نەمەسە تىلدىك كۋرس وقيتىندار جانە باكالاۆر، ماگيستراتۋرا، دوكتورانتۋرا وقيتىندار جايىندا بولىپ وتىر. ستۋدەنتتەردىڭ ءبىر بولىگى قازاقستانعا اۋىسۋدى كوزدەپ وتىر. ال كەي ستۋدەنتتەر شەكارا اشىلعان سوڭ، وقۋىن قىتايدا جالعاستىرعىسى كەلەدى. بۇل شەشىمدى ءار ستۋدەنت ءوزى دەربەس قابىلدايدى»، - دەيدى گۇلباقىت بولاتبەك قىزى.
ايتا كەتەيىك، كەشە قىتايدان ەۆاكۋاتسيالانعان 89 ستۋدەنت ەلورداداعى كوپسالالى مەديتسينالىق ورتالىقتىڭ جۇقپالى اۋرۋلار بولىمىنەن جانە 171 قازاقستاندىق الماتىداعى ستاتسيونارلاردىڭ بىرىنەن شىعارىلدى.
سوڭعى دەرەكتەرگە سايكەس، قىتايدا كوروناۆيرۋستان كوز جۇمعاندار سانى 1770 ادامعا جەتتى .
اۆتور: ايجان سەرىكجان قىزى