تۇركيامەن بارلىق ماسەلە بويىنشا كەلىسۋ مۇمكىن ەمەس - رەسەي سىرتقى ىستەر ءمينيسترى

None
None
نۇر-سۇلتان. قازاقپارات - رەسەي تاراپى تاعىلعان ايىپتى مويىندامايدى. ايتۋىنشا، اساد رەجيمىنىڭ دىتتەگەنى يدليبتەگى تەررورلىق ۇيىمداردىڭ كوزىن قۇرتۋ بولىپ تابىلادى.

ال جۋىردا گەرمانيانىڭ ميۋنحەن قالاسىندا وتكەن كونفەرەنسيادا رەسەي مەن تۇركيانىڭ سىرتقى ىستەر مينيسترلەرى سيرياداعى جاعدايدى كەڭىنەن تالقىلاپ، وسى ماسەلە بويىنشا بۇگىن تۇركيا دەلەگاتسياسى ماسكەۋگە باراتىنىن ءمالىم ەتتى.

سەرگەي لاۆروۆ، رەسەي سىرتقى ىستەر ءمينيسترى:

- تۇركيامەن قارىم- قاتىناستارىمىز جاقسى، الايدا بۇل ءبىز بارىمەن كەلىسۋگە ءتيىس ەكەنىمىزدى بىلدىرمەيدى. جالپى كەز كەلگەن ەكى ەل اراسىندا بارلىق ماسەلەلەر بويىنشا تولىق كەلىسىمگە جەتۋ مۇمكىن ەمەس دەپ ويلايمىن.

سيرياداعى ازاماتتىق سوعىس وسى جىلدىڭ اقپان ايىنىڭ باسىنان بەرى ۋشىعىپ بارادى. وتكەن اپتادا يدليب پروۆينتسياسىندا ەل پرەزيدەنتى باشار اسادتىڭ ۇكىمەت اسكەرى ۇيىمداستىرعان اتىس- شابىستان كەيىن وڭىردەگى تۇركيانىڭ 14 جاساعى قازا تاپتى. بۇل جاعداي انكارانىڭ اشۋىنا كەلدى. ەندى تۇركيا پرەزيدەنتى رەجەپ تايىپ ەردوعان سيريا مەن ونىڭ قولداپ وتىرعان رەسەيدىڭ اسكەرىن ايماقتاعى بەيبىت حالىققا قارسى شابۋىلدادى دەپ ايىپتاپ وتىر.

تۇركيا باسشىسى سيريا بيلىگىنەن ءوز اسكەرىن اعىمداعى ايدىڭ سوڭىنا دەيىن يدليبتەن شىعارۋىن تالاپ ەتتى.

رەجەپ تايىپ ەردوعان، تۇركيا پرەزيدەنتى:

- قازىر سيرياداعى يدليب ماسەلەسى ماڭىزدى. باشار اساد رەجيمىنىڭ ساربازدارى شابۋىلدارىن توقتاتىپ، تەز ارادا بۇل ايماقتان كەتۋى كەرەك. ولاي بولماعان جاعدايدا تۇركيا دا كۇش قولدانادى. بىزگە وداقتاس ەلدەر كومەكتەسەتىن بولسا ودان دا باس تارتپايمىز. الايدا يدليبتەن ۇكىمەت اسكەرىن ءوز كۇشىمىزبەن دە باسۋعا شاما جەتەدى.

www.24.kz

سوڭعى جاڭالىقتار