مۇرات ابەنوۆ: ايماق باسشىلارى يدەولوگيالىق سالانى ۇمىتپاۋى كەرەك

None
None
نۇر- سۇلتان. قازاقپارات - ۇلتتىق كەڭەستىڭ التى ايلىق جۇمىسى قورىتىندىلانعان جيىندا ۇلتتىق كەڭەس مۇشەسى مۇرات ابەنوۆ وڭىرلەردەگى قوعام مەن بيلىك اراسىنداعى ديالوگقا باعا بەردى، دەپ حابارلايدى قازاقپارات ءتىلشىسى.

«ۇلتتىق كەڭەستىڭ ەرەكشەلىگى - قوعامدى تىڭداي ءبىلۋ، قوعامدا بولىپ جاتقان جاعدايدى دۇرىس باقىلاپ، ءۇنىن ەستىپ، سوعان قاتىستى شارا قابىلداۋ دەسەك، ورتالىق دەڭگەيدە بۇل مەحانيزم جۇمىس ىستەۋدى باستادى. ال ءبىراق وڭىرلىك دەڭگەيدە قوعام مەن بيلىكتىڭ ورتاسىندا دۇرىس قارىم- قاتىناس جوق. كەشە عانا جامبىل وبلىسىنا بارعاندا بايقاعانىمىز - جەرگىلىكتى بيلىك ازاماتتاردىڭ ءۇنىن ءالى تولىق ەستىپ وتىر دەپ ايتا المايمىز. الدىن الا ءارتۇرلى سيگنالدار بولعانىمەن، وعان قاتىستى شارا قابىلداۋ ماسەلەسى كەشىكتىرىلگەن»، - دەدى مۇرات ابەنوۆ ەۋرازيالىق ينتەگراتسيا ينستيتۋتىنداعى «ۇلتتىق قوعامدىق سەنىم كەڭەسى: تالدامالىق زەردەلەۋ» اتتى ساراپتامالىق باياندامانىڭ تانىستىرىلىمىندا.

ونىڭ ايتۋىنشا، وزىندىك پىكىرىن ايتا بىلەتىن ازاماتتار ۇلتتىق كەڭەسكە كىرىپ، حالىقتىڭ پىكىرىن جەتكىزۋ ارقىلى بيلىك ءتيىستى شارالاردى قابىلداپ جاتىر. ايتسە دە ۇلتتىق كەڭەس مۇشەسى ءدال وسى تەندەنسيانى وڭىرلەرگە اپارۋ كەرەك دەپ ەسەپتەيدى.

«وڭىرلەردەگى جەرگىلىكتى بيلىك وكىلدەرىنىڭ جۇمىسى بەلسەندى بولماعاننان كەيىن ارينە، پروبلەما ۋشىعىپ كەتەدى. سول سەبەپتى ۇلتتىق كەڭەس جۇمىسىنىڭ كەيبىر مودەلىن ول جاققا بارىپ وتىرىس وتكىزبەي- اق، جەرگىلىكتى جەرگە بەرە ءبىلۋى كەرەك سەكىلدى. مىسالى قازىر جەرگىلىكتى اكىمدەردىڭ وسى ۋاقىتقا دەيىن ازىرگە يدەولوگيالىق جۇمىسقا ارالاسپايتىنى بايقالادى. اكىمدەر كوبىنەسە كاسىپكەرلىك نەمەسە شارۋاشىلىق تۇرعىدا ەكونوميكا جاعىن ويلايدى. ال ساياسي وزگەرىستەرگە دايىن ەمەس. سوندىقتان كەيبىر وقىس وقيعالاردىڭ الدىن الۋ، ادامداردى ءبىر- بىرىمەن كەلىستىرۋ، حالىقتىڭ الدىنا شىعىپ ويىن جەتكىزۋ پروبلەمالارى بار. سول سەبەپتى، مەنىڭ ويىمشا، وڭىرلەردى باسقاراتىن باسشىلار يدەولوگيالىق سالانى ۇمىت قالدىرماۋى كەرەك»، - دەيدى ول.

اۆتور ايان بەكەن ۇلى


سوڭعى جاڭالىقتار