جۇزىكتى قانداي ساۋساققا سالعان دۇرىس؟

None
None
نۇر-سۇلتان. قازاقپارات - ادەتتە، ادامدار تاڭداعان جۇزىكتەرىن قاي ساۋساققا تاعۋدىڭ دۇرىس ەكەندىگىنىڭ بايىبىنا بارىپ ويلانا بەرمەيدى.

شىن مانىندە، جۇزىكتىڭ ءوز ەگەسىنە تيگىزەر اسەرى وتە كوپ ەكەن. مۇندا تاستىڭ ساپاسىنا عانا ەمەس، قاي ساۋساققا تاعىپ جۇرەتىندىگى دە ماڭىزدى ءرول اتقارادى. تاعىپ جۇرگەن جۇزىگىنە قاراپ ادامنىڭ مىنەزىن، ويىن وپ- وڭاي ءبىلىپ الۋعا بولادى. سونداي-اق، دۇرىس ساۋساققا تاعىلعان جۇزىك ادامنىڭ مىنەزىن وزگەرتىپ، قيىندىقتان شىعۋىنا جاردەمشى دە بولا الادى.

باس بارماقتاعى جۇزىك

مىنەز-قۇلقى. بۇل «جۇزىكتىڭ ءامىرشىسى» وتە قىزعانشاق، بىربەتكەي، تىڭ يدەيالارعا باي بولىپ كەلەدى. ولار توپتان دارالانىپ، كوشباسشى بولۋعا تالىپىنىپ جۇرەدى. جانە ءوز اينالاسىنداعىلارمەن ءتىل تابىسۋعا كوپ كوڭىل بولەدى.

مامان كەڭەسى. پسيحولوگ ماماندار ەموتسيونالدى جانە ەنەرگياعا باي جاندارعا باس بارماققا جۇزىك سالۋعا كەڭەس بەرەدى. ويتكەنى باس بارماققا تاعىلعان جۇزىك ويلاۋ قابىلەتىنىڭ دامۋىنا ىقپال ەتەدى ەكەن.

جۇزىك. كوك، جاسىل ءتۇستى كەز كەلگەن تاستان جاسالعان جۇزىكتەردى (ادامنىڭ ومىرگە دەگەن قۇشتارلىعىن وياتىپ، جۇيكە جۇيەسىن تىنىشتاندىراتىن قاسيەتى بار) جانە تاسى سارى ءتۇستى جۇزىكتى (جۇيكە جۇيەسىن نىعايتادى) تاڭداعان ءجون.

سۇق ساۋساقتاعى جۇزىك

مىنەزى. ساۋساقتىڭ اتى ايتىپ تۇرعانداي، ونىڭ قىزمەتى - جول كورسەتىپ، ءوز ءامىرىن جۇرگىزۋ، وي مەن ارەكەتتى باعىتتاۋ، بۇيرىق بەرۋ. ادەتتە، ساقيناسىن بۇل ساۋساققا سالىپ جۇرەتىن ادامدار ەركىندىكسۇيگىش، تاۋەلسىز جانە وزىنە تىم جوعارى باعا بەرەتىندەر بولىپ كەلەدى. ەگەر جۇزىك سۇق ساۋساققا ءجيى تاعىلاتىن بولسا، ادام ءوزىمشىل جانە تاكاپپار بولىپ كەتۋى ابدەن مۇمكىن.

مامان كەڭەسى. جاسقانشاق، ۇيالشاق جانە تابيعاتىنان شەگىنشەك، ورتامەن ءتىل تابىسۋعا قينالاتىن ادامدارعا تاعۋعا كەڭەس بەرىلەدى. ويتكەنى سۇق ساۋساقتاعى جۇزىك وزىنە دەگەن سەنىمدىلىك تۋدىرۋعا، كوشباسشىلىق قاسيەتتەردى ۇيالاتىپ، ماقسات قويا بىلۋگە جانە وزىنە باعا بەرە بىلۋگە ۇيرەتەدى.

جۇزىك. كوك جانە كوگىلدىر تاستى التىن جۇزىكتەردى تاققان ءجون. جىلتىر تاستار مەن مارجان تاستار دا جاقسى، ءبىراق كۇمىسكە جولاماعانىڭىز ءسىز ءۇشىن دۇرىس بولماق.

ورتاڭعى ساۋساقتاعى جۇزىك

مىنەز- قۇلىق. جۇزىك يەسى ادامگەرشىلىك قۇندىلىقتاردى بىلەدى جانە جوعارى باعالايدى. «ادالدىق» دەگەن ۇعىمدى اسقاق تۇتادى. اينالاسىنداعىلارعا «ۇستاز» بولۋعا جارايدى. ال كەيدە اتالعان ساۋساققا ساقينا سالىپ جۇرگەندى ۇناتاتىندار تۇيىق جانە جالعىزدىققا قۇمار بولىپ كەلەدى.

مامان كەڭەسى. ومىردە قيىندىققا جولىعىپ، ساتسىزدىكپەن جولداس بولىپ جۇرگەندەرگە، تۇراقتىلىق پەن اقىل جەتىسپەي، سارساڭعا ءتۇسىپ جۇرگەندەرگە تاعۋعا كەڭەس بەرىلەدى.

جۇزىك. تەمىردەن جانە كۇمىستەن جاسالعان اي (كوكشىل ءمولدىر تاس)، كۇلگىن، قارا تاستى جۇزىكتەردى تاققانىڭىز ءجون. التىن جۇزىكتەرگە قىزىقپاۋعا كەڭەس بەرىلەدى.

اتى جوق ساۋساقتاعى جۇزىك

مىنەز-قۇلقى. وتكەن جولى نەكە جۇزىگىنىڭ نە سەبەپتى اتى جوق ساۋساققا تاعىلاتىندىعىنا توقتالىپ وتكەن بولاتىنبىز. الايدا، ادامدار ءدال وسى ساۋساققا نەكە جۇزىگىن عانا تاقپايدى. ونداي ادامدار رومانتيكالىق جانە نازىك بولىپ كەلەدى. ولار ەرەكشە ءارى قايتالانباس نارسەلەرگە، سالتاناتقا، سەزىمگە قۇشتار ادامدار. كوبىنە اتى جوق ساۋساققا ساقينانى شىعارماشىلىق ادامدارى سالىپ جۇرەدى ەكەن.

مامان كەڭەسى. ىشكى جىلۋلىقتى كۇشەيتۋگە تالپىنىپ، ساتتىلىكپەن جولداس بولۋدى ارماندايتىندارعا، ءوز دارىنىن مويىنداتىپ، شىعارماشىلىقتىڭ بيىگىنە شىققىسى كەلەتىندەرگە تاعۋعا كەڭەس بەرىلەدى.

جۇزىك. ءىنجۋ، قىزىل، سارى ءتۇستى تاستى التىن جۇزىكتەر سىزگە ساي كەلەدى.

شىناشاقتاعى جۇزىك

مىنەز-قۇلقى. بۇل ادامنىڭ اكتەر، سۋرەتشى، جازۋشى نەمەسە ديزاينەر بولۋى ابدەن مۇمكىن. ال كەيدە ونىڭ قۇمار ويىنداردى ۇناتۋشى، جانكەشتى نەمەسە ايەلقۇمار جىگىت بولۋى دا ىقتيمال. ويتكەنى جۇزىكتى شىناشاققا قاراپايىم ادامدار سالا بەرمەيدى. قالاي بولعاندا دا، ولار كوپشىل، تەز ءتىل تابىسقىش بولىپ كەلەدى.

مامان كەڭەسى. ادامداردى تۇسىنۋدەن ماقۇرىم قالعان جانە ىسكەرلىك قاتىناستاردى ورناتۋدا جولى بولماي جۇرگەندەرگە شىناشاقتارىنا ساقينا سالىپ جۇرۋگە كەڭەس بەرىلەدى.

جۇزىك. سارى جانە جاسىل تاستى جۇزىكتەردى تاڭداپ العانىڭىز ابزال.

سوڭعى جاڭالىقتار