سەمەيلىك وقۋشىلار وبىردى ەمدەۋ سالاسىن زەرتتەپ، اۆتورلىق قۇقىق الدى

None
None
سەمەي. قازاقپارات - سەمەي قالاسىنداعى نازاربايەۆ زياتكەرلىك مەكتەبىنىڭ فيزيكا ادىستەمەلىك بىرلەستىگىنىڭ جەتەكشىسى اسحات جۇمابەكوۆ 11-سىنىپتا وقيتىن ءوز شاكىرتتەرى بەك كادەسوۆ جانە الىشەر رىمقانمەن بىرگە ونكوتەراپيادا قولدانىلاتىن التىن نانوبولشەكتەردىڭ قۇرىلىمىن زەرتتەگەن.

بۇل تابىستى جۇمىستارى ءۇشىن ولار اۆتورلىق قۇقىق الدى، دەپ حابارلايدى قازاقپارات.

ونەرتاپقىشتارعا وسى جوبانى ىسكە اسىرۋعا 1 جارىم جىلداي ۋاقىت كەتكەن. بۇل زەرتتەۋ حيميوتەراپيا جانە ساۋلەلىك تەراپيانىڭ ءداستۇرلى قۇرالدارىنا بالاما تابۋ ماقساتىندا جۇرگىزىلگەن.

مۇعالىم ءوز وقۋشىلارى بەك كادەسوۆ جانە الىشەر رىمقانمەن بىرلەسىپ ءبىرقاتار تاجىريبەلەر ناتيجەسىندە مەديتسينالىق ماقساتتا قولدانىلاتىن، دۇرىس سفەرالىق پىشىندەگى التىن نانوبولشەكتەردى الدى. وسى ماقساتقا جەتۋ ءۇشىن نازاربايەۆ زياتكەرلىك مەكتەبىنىڭ، سەمەي قالاسىنداعى شاكارىم اتىنداعى مەملەكەتتىك ۋنيۆەرسيتەتىنىڭ، د. سەرىكبايەۆ اتىنداعى ش ق م ۋ-دىڭ زەرتحانالارىندا ءارتۇرلى تۇراقتاندىرعىشتار، التىن نانوبولشەكتەرىن تابۋ جانە انىقتاۋ ادىستەرى زەرتتەلگەن ەكەن.

«شاكىرتتەرىم وتە جاقسى جۇمىس ىستەدى. الىنعان التىن نانوبولشەكتەردىڭ قۇرىلىمىن زەرتتەۋ ءۇشىن بولشەكتەردىڭ مورفولوگياسىن جانە ولاردىڭ مولشەرىن انىقتاۋدا سپەكترومەتريا جانە تاراتۋ ەلەكتروندى ميكروسكوپياسىن قولدانۋ ارقىلى تاجىريبەلەر جۇرگىزىلدى. ەڭ ۇزاق كەزەڭ - پايدالى ادەبيەتتى جانە وسى باعىتتاعى دەرەككوزدەردى زەرتتەۋ بولدى. كوزدەگەن ماقساتقا جەتۋ ءۇشىن وقۋشىلار فيزيكا، حيميا، ماتەماتيكا، بيولوگيا جانە كومپيۋتەرلىك مودەلدەۋ پاندەرىن قاتار قاراستىردى»، - دەيدى اسحات جۇمابەكوۆ.

ونىڭ ايتۋىنشا، بۇل زەرتتەۋ STEAM داعى ءپانارالىق جانە ونكولوگيالىق تەراپياداعى ادىستەردى جەتىلدىرۋگە ىقپال ەتەدى. التىن نانوبولشەكتەردى قولدانۋ كومپيۋتەرلىك مودەلدەۋمەن كورىنگەن.

«بولاشاقتا قاتەرلى ىسىك جاسۋشالارى بولىمدەرىندە التىن نانوبولشەكتەرىن سىناۋ جوسپارلانۋدا. ول ءۇشىن سەمەي قالاسىنداعى يادرولىق مەديتسينا جانە ونكولوگيا عىلىمي- زەرتتەۋ ينستيتۋتىمەن مەموراندۋم جاساۋ ويىمىزدا بار. وسى رەتتە بىزگە قولداۋ بىلدىرگەن مەكتەبىمىزگە، اتا- انالارعا، سەمەي قالاسىنىڭ شاكارىم اتىنداعى ۋنيۆەرسيتەتىنىڭ PhD اعا وقىتۋشىسى، عىلىمي كەڭەسشىمىز ا. كليۆەنكوعا، د. سەرىكبايەۆ اتىنداعى ش ق م ت ۋ باس مامانى ا. دجەسكە العىسىمىزدى بىلدىرەمىز»، - دەيدى جوبا جەتەكشىسى.

11-14-اقپان ارالىعىندا الماتى قالاسىنداعى ءال-فارابي اتىنداعى قازاق ۇلتتىق ۋنيۆەرسيتەتىندە ق ر ءبىلىم جانە عىلىم مينيسترلىگىنىڭ «دارىن» رەسپۋبليكالىق عىلىمي- پراكتيكالىق ورتالىعى جىل سايىنعى رەسپۋبليكالىق عىلىمي جوبالار بايقاۋىنىڭ قورىتىندى كەزەڭىن وتكىزدى. وعان بەك كادەسوۆ پەن الىشەر رىمقان قاتىسىپ، اۆتورلىق قۇقىق العان جوبالارىن ۇسىنعان. ءادىل- قازىلاردىڭ شەشىمىمەن جاس ونەرتاپقىشتار ەكىنشى ورىندى يەلەندى.

«وسىمەن توقتاپ قالمايمىز. ءالى الدا ىستە اسىرماق جوسپارلارىمىز از ەمەس. اۆتورلىق قۇقىق العان جوبامىزدى ارى قاراي جالعاستىرامىز. قازىرگى ۋاقىتتا مەكتەپتەر الدىندا 21-عاسىردىڭ جاڭا كوشباسشىلارىن قالىپتاستىرۋ جانە ولاردىڭ شىعارماشىلىق بەلسەندىلىگىن ارتتىرۋ مىندەتى تۇر. مۇعالىمدەر وقۋشىلاردىڭ وي- ءورىسىن دامىتىپ، عىلىمعا دەگەن قىزۋعۋشىلىقتارىن ارتتىرۋ كەرەك دەپ سانايمىن»، - دەيدى اسحات سوۆەتحان ۇلى.

اۆتور: تالعاتجان مۇحامەتبەك ۇلى

سوڭعى جاڭالىقتار