اباي مەرەيتويى: ۆولونتەرلەر يۋنەسكو دەڭگەيىندەگى شارالارعا دايىندالۋدا

None
None
وسكەمەن. قازاقپارات - وسكەمەندە ءبىر جىلدىڭ ىشىندە ۆولونتەرلىك ۇيىمداردىڭ سانى ءۇش ەسەگە ارتقان.

بۇگىندە ولار ابايدىڭ 175 جىلدىعىنا وراي يۋنەسكو كولەمىندە بولاتىن مەرەيتويلىق شارالارعا دايىندىق ۇستىندە. بۇل جايلى قازاقپارات تىلشىسىنە قالالىق جاستار رەسۋرستىق ورتالىعى بازاسىنداعى ۆولونتەرلەر ورتالىعىنىڭ جەتەكشىسى سىرىم قايساربەكوۆ ايتىپ بەردى.

«2011 -جىلى وسكەمەن پوليتەحنيكالىق كوللەدجىندە وقىپ جۇرگەن كەزىمدە ۆولونتەرلىك جۇمىستارعا قاتىسا باستادىم. بىردە قالا اكىمدىگى مەن اۋعان سوعىسى ارداگەرلەرىنىڭ قوعامدىق بىرلەستىگى مۇقتاج جاندار مەن زەينەتكەرلەرگە كومىر الىپ بەردى. ەرىكتىلەر قارا وتىندى ءار ۇيگە تۇسىرۋگە كومەكتەستىك. سول كەزدە قازىنالى قارتتاردىڭ جانارىنان ريزاشىلىقتىڭ لەبىن بايقاعانىمدا ەرەكشە اسەرگە بولەنگەنىم راس. ءوزىمدى وسى باعىتقا ارناعىم كەلەتىنىن ءدال وسى مەزەتتە تۇسىنگەندەيمىن»، - دەيدى ول.

ءسويتىپ، سىرىم قايساربەكوۆ 2014 -جىلى قالالىق جاستار رەسۋرستىق ورتالىعىنا مامان بولىپ جۇمىسقا ورنالاسقان. ەرىكتى رەتىندە سان الۋان شارالارعا قاتىسىپ، كوپكە كومەك كورسەتۋدى ومىرلىك ماقساتىنا اينالدىرعان.


«شىعىستىڭ شىڭىلتىر ايازىندا دالادا جاۋراپ تۇرعان ادامدارعا ىستىق شاي ۇسىنىپ، مۇمكىندىگى شەكتەۋلى جانداردىڭ، قارتتاردىڭ اۋلالارىنداعى قاردى كۇرەيمىز. 1-ناۋرىز - العىس ايتۋ كۇنىندە كوپبالالى جانە از قامتىلعان وتباسىلاردىڭ ۇيلەرىنە ازىق-تۇلىك اپارامىز. شاھاردى كوگالداندىرۋ، اباتتاندىرۋ جۇمىستارىنا دا قاتىسامىز. مەنىڭ ويىمشا، ۆولونتەر اتانعىسى كەلگەندەردىڭ ءبىرىنشى كەزەكتە ادامگەرشىلىگى مول بولۋ كەرەك. سودان كەيىن اينالاسىنداعىلارعا دەگەن سۇيىسپەنشىلىك پەن قوعامعا تيتتەي دە پايدامدى تيگىزسەم دەگەن نيەت قاجەت»، - دەيدى ۆولونتەر.

قازىردە وسكەمەن قالاسىندا 737 ۆولونتەر بار. جىل سايىن ولاردىڭ سانى ارتىپ كەلەدى. مىسالى، بىلتىر تەك 2 جوعارى وقۋ ورنىندا ۆولونتەرلىك ۇيىم بولعان. ال بيىل اتالمىش ۇيىمدار تاعى 1 ۋنيۆەرسيتەت پەن 5 كوللەدجدە اشىلعان.

«وسى جىلدىڭ قاڭتار ايىنىڭ اياعىندا وسكەمەندە ۆولونتەرلەر ورتالىعى اشىلدى. مۇنداعى ماقسات - ەرىكتىلەردىڭ سانىن ارتتىرۋ، ولاردى قوعامدىق جۇمىستارعا تارتۋ. سول جەردە ەكى كوورديناتور جۇمىس ىستەيدى. بۇل ەرىكتىلەردىڭ باسىن قوسىپ، الداعى جوسپارلاردىڭ بۇگە- شۇگەسىن تالقىلاپ وتىرۋعا جاقسى مۇمكىندىك تۋدىردى»، - دەيدى سىرىم قايساربەكوۆ.

ونىڭ ايتۋىنشا، بۇگىندە ەرىكتىلەر ابايدىڭ 175 جىلدىعىنا وراي اباي اۋدانى قاراۋىل اۋىلىندا يۋنەسكو كولەمىندە بولاتىن مەرەيتويلىق شارالارعا دايىندالۋدا.

سونداي-اق توقسان سايىن ۇزدىك ۆولونتەرلەردى ماراپاتتاۋ ءۇشىن ءتيىستى ەرەجەلەر قۇرىلۋدا. ال جىل سوڭىندا «جىلدىڭ ۇزدىك ۆولونتەرى» جانە «جىلدىڭ ۇزدىك ۆولونتەرلىك ۇيىمى» اتتى ەكى نوميناتسيانىڭ جەڭىمپازدارى انىقتالماق.

سوڭعى جاڭالىقتار