ديماشتىڭ ەۋروپا قالالارىنداعى كونسەرتى باستالدى

كراسنودار. قازاقپارات - ديماش قۇدايبەرگەننىڭ رەسەيدىڭ كراسنودار قالاسىندا «ارناۋ» باعدارلاماسىمەن كونسەرتى ءوتتى، دەپ حابارلايدى قازاقپارات dimashnews سايتىنا سىلتەمە جاساپ.

7500 ادامعا ارنالعان باسكەت-حولل زالى لىق تولعان. كورەرمەندەردىڭ اراسىندا سۇيىكتى ءانشىسىنىڭ جاندى داۋىسىنا قۇلاق قۇرىشىن قاندىرۋعا رەسەيدىڭ باسقا ايماقتارىنان كەلگەن ادامدار از ەمەس.

فويەدە قازاقستاندىق ءانشىنىڭ تالانتىن قادىرلەۋشىلەر فان-ايماقتا سۋرەتكە ءتۇسىپ، ونىڭ فوتوسۋرەتى بار پلاكاتتاردى ساتىپ الىپ جاتتى.

بۇعان دەيىن بەلگىلى بولعانداي، ديماش 16- اقپاندا كراسنوداردا (رەسەي)، 20- اقپاندا قازاندا (تاتارستان، رەسەي)، 23- اقپاندا ەكاتەرينبۋرگتا (رەسەي)، 7- ناۋرىزدا ريگادا (لاتۆيا)، 9- ناۋرىزدا ماسكەۋدە (رەسەي)، 11- ناۋرىزدا كيەۆتە (ۋكراينا)، 19- ناۋرىزدا گامبۋرگتە (گەرمانيا)، 21- ناۋرىزدا ديۋسسەلدورفتا (گەرمانيا)، 23- ناۋرىزدا شتۋتگاردتا (گەرمانيا)، 25- ناۋرىزدا پراگادا (چەحيا)، 4- ساۋىردە مينسكتە (بەلارۋس) جەكە كونسەرتىن وتكىزبەك.