ەلوردالىق ونەرپاز عيماراتتارعا ەرەكشە اجار بەرۋدىڭ ءتاسىلىن تاپتى

نۇر-سۇلتان. قازاقپارات - استانالىق ونەرپاز الماز دۇيسەبايەۆ Photoshop گرافيكاسى ارقىلى ەلوردا عيماراتتارىن جەراستى كورىنىستەرى ارقىلى باسقاشا قىرىنان كورسەتتى.

تىلسىمعا تولى ەرەكشە فوتوسۋرەتتەر الەۋمەتتىك جەلىلەر كومەگىمەن لەزدە تارالىپ، جۇرتشىلىقتىڭ قىزىعۋشىلىعىن تانىتتى. وسى ورايدا قازاقپارات ءتىلشىسى كومپيۋتەرلىك شىعارماشىلىق تۋىندىلاردىڭ اۆتورىمەن تىلدەسكەن بولاتىن.

«جاقىندا بولعان بوران، بۇرقاسىن كۇندەرى مەن سۋرەتكە ءتۇسىپ، ۇيگە كەلگەن سوڭ كوڭىلدىرەك بولۋى ءۇشىن وعان پينگۆين جانە ايۋدىڭ سۋرەتىن قوستىم. ونى Facebook, Instargam الەۋمەتتىك پاراقشالارىما جۇكتەدىم. كەيىن بايقالعانداي، بۇل كوپ ادامدارعا ۇناپ، «لايك» باسىپ، پىكىرلەرىن قالدىردى. سودان سوڭ نۇر-سۇلتانداعى عيماراتتاردى Photoshop ارقىلى باسقاشا كورسەتۋ يدەياسى كەلدى. جالپى مۇنداي شىعارماشىلىق جۇمىستاردى بۇرىن شەتەلدىك پابليكتەردەن كورگەنمىن. سول ەسىمە ءتۇسىپ، ەلورداداعى بىرنەشە عيماراتتى تاڭداپ الدىم. ونىڭ ۇستىنە نۇر- سۇلتان باسقا قالالارعا قاراعاندا وزىندىك ارحيتەكتۋرالىق ستيلىمەن ەرەكشەلەنەدى. باسىندا 1-2 عيماراتقا Photoshop رەداكتسيالاۋ ارقىلى باسقاشا جان ءبىتىرىپ كوردىم. كوپ ادامدار جازىپ، ءوز پىكىرلەرىن ءبىلدىرىپ جاتتى. ۇناتقان ادامداردىڭ سانى كوپ بولدى، دەگەنمەن «قورقىنىشتى كورىنەدى» دەگەندەر دە تابىلدى»، - دەيدى الماز دۇيسەبايەۆ.

استانالىق ونەرپازدىڭ شىعارماشىلىق نىساندارىنىڭ قاتارىندا ەلورداداعى اقوردا، بەيبىتشىلىك جانە كەلىسىم سارايى، ۇلتتىق ارحيۆ عيماراتى، ەكسپو، «حان شاتىر» و س و، J‎san Bank، استانا LRT، «قازاق كونسەرت» عيماراتتارى بار.

«بۇل جەردە ونەرپازدىق تالعامنان بولەك، فوتوشوپپەن جۇمىس ىستەۋ ءبىلۋ ماڭىزدىراق. ايتار بولساق، ءبىر عيماراتتىڭ سۋرەتىن دايىنداۋعا 1-2 ساعات ۋاقىت جۇمسالادى. وسىلايشا ءبىر كۇندە 2-3 عيماراتتى ازىرلەپ شىقتىم. وسىدان سوڭ ۇسىنىستار دا كەلىپ تۇسە باستادى. جاقىندا بالالارعا ارنالعان فيلم تۇسىرۋشىلەر ءوز تۋىندىلارىنىڭ ىشىندە فەنتەزي ستيلىندە مەنىڭ جۇمىستارىمدى قولدانۋدى سۇرادى. ءبىراق مەنىڭ جۇمىستارىم فيلم دەڭگەيىنە جەتپەيدى، ول ءۇشىن باسقا فورماتتا جاساپ جەتىلدىرۋ قاجەت. ازىرگە فيلم تۇسىرۋشىلەر ويلاناتىندىقتارىن ايتتى»، - دەيدى ول.

الماز دۇيسەبايەۆ ءبىراز جىلدار تەلەۆيدەنيە سالاسىندا جۇمىس ىستەگەن. سوڭعى ۋاقىتتا ءوز ءىسىن اشىپ ۆيدەوعا ءتۇسىرۋ، 3D گرافيكا، جارنامامەن اينالىسادى.

ايتا كەتسەك، ەلوردالىق ونەرپاز جاساعان فانتاستيكالىق فوتوسۋرەتتەر الەۋمەتتىك جەلى ارقىلى تارالىپ، كوپ قولدانۋشىلاردىڭ ىقىلاسىنا بولەنگەن بولاتىن.

فوتو: www.instagram.com/almaz_duisebayev