قارا جورعا ءبيى كوروناۆيرۋستان ەمدەلىپ جاتقان ناۋقاستارعا دەمەۋ بولدى - شەتەلدىك قازاق ءتىلدى باسپا سوزگە شولۋ

نۇر-سۇلتان. قازاقپارات- «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

«قارا جورعا» ءبيى ۋحانداعى كوروناۆيرۋستان ەمدەلىپ جاتقان ناۋقاستارعا دەمەۋ بولدى - قىتايدىڭ «ورتالىق حالىق راديوسى» (CNR)

شىڭجاڭنان ۋحانعا كومەككە بارعان تاجىريبەلى دارىگەر- حيرۋرگ باھارگۇل تولقىن قىزى كوروناۆيرۋستان ەمدەلىپ جاتقان ناۋقاستارعا قازاقتىڭ «قارا جورعا» ءبيىن بيلەپ بەردى، دەپ جازادى قىتايلىق kazakcnr.com سايتى.

اتالعان ب ا ق- قا سۇحبات بەرگەن باھارگۇل تولقىن قىزىنىڭ ايتۋىنشا، ول 5-اقپاندا شىڭجاڭنان كومەككە اتتانعان توپتىڭ قۇرامىندا ۋحانعا كەلگەن. شىڭجاڭنان كومەككە كەلگەن 102 ادامنىڭ 21 ى قىتايداعى قازاق، ۇيعىر، دۇڭعان، موڭعول سەكىلدى سانى از ۇلت ازاماتتارى ەكەن.

وسى مەديتسينالىق توپ جەتەكشىسىنىڭ ورىنباسارى باھارگۇل تولقىن قىزى ۋحان قالاسىنىڭ فان تسان اۋرۋحاناسىنىڭ س ايماعىندا وتكەن ينتەراكتيۆتى مادەني ءىس- شارادا قازاق حالقىنىڭ «قارا جورعا» ءبيىن بيلەگەن. قازىرگى كۇنى سول ناۋقاستاردىڭ ورتاسىندا قورعانىس كوستيۋمىمەن «قارا جورعا» ءبيىن بيلەگەن ۆيدەو الەمگە كەڭ تارالىپ جاتىر. ال وسى مادەني شارانى تاماشالاعان ادامدار «قارا جورعا» ءبيىن تۇڭعىش كورگەندەرىن جانە ەرەكشە بيدەن ۇلكەن اسەر العاندارىن ايتىپ، العىستارىن بىلدىرگەن.

«ءبىزدىڭ باقىلاۋىمىزعا بولىنگەن ناۋقاستاردىڭ جاعدايلارى ءبىرشاما جاقسى، ولاردىڭ اۋرۋلارى سالماقتى بولماعاندىقتان قالىپتى دەنە ارەكەتىن جاساۋىنا دا بولادى. مۇندا كوروناۆيرۋس جۇقتىرعان 200 گە جۋىق ناۋقاس بار. ناۋقاستارعا مەديتسينالىق وقشاۋلانۋدان، ەمدەۋدەن باسقا، پسيحولوگيالىق كومەك پەن سەنىمدى ارتتىرۋدىڭ دا ماڭىزى زور. سوندىقتان پاتسيەنتتەردىڭ فيزيكالىق كۇش- جىگەرىن شىڭداۋ ءۇشىن وسىنداي ينتەراكتيۆتى مادەني ءىس- شارا وتكىزدىك. مەن قازاق حالقىنىڭ «قارا جورعا» ءبيىن بيلەپ شىقتىم. ءبيدىڭ جۇمساق ءارى اسەم قيمىلىن ادەتتەگىدەن ءسال جىلدام جانە شارت قيمىلدارمەن وزگەرتىپ بيلەدىم. بۇلاي بيلەگەندە ادامنىڭ بارلىق بۋىنى قوزعالىسقا تۇسەدى. وسىلايشا ەرەكشە كورەرمەندەردىڭ الدىندا، ەڭ كەرەمەت ساحنادا، ەڭ تاماشا ءبيدى بيلەگەنىمە ءوزىم دە قۋانىشتىمىن»، - دەيدى باحارگۇل.

باھارگۇلدەن «اۋرۋ تاراپ جاتقان جەردىڭ الدىڭعى شەبىندە ءجۇرسىز، وزىڭىزگە كوروناۆيرۋس جۇقتىرىپ الۋدان قورىقپايسىز با؟»، - دەپ سۇراعان ءتىلشى.

بۇعان باھارگۇل «مەن قاراپايىم ادام رەتىندە شىندىعىندا ءوز دەنساۋلىعىمنان الاڭدايمىن، ءبىراق دارىگەر تۇرعىسىنان بەلگىسىز دەرتتىڭ ۋحان حالقىنا ودان سايىن كەڭ كولەمدە تارالۋىنان قورقامىن. كوروناۆيرۋس - ادامزاتتىڭ ورتاق جاۋى. سوندىقتان ونىمەن كۇرەسىپ اۋرۋدى جەڭۋىمىز كەرەك»، - دەپ جاۋاپ بەرگەن.

بايان- ولگەي ايماعىندا كوروناۆيرۋس جۇقتىرۋى مۇمكىن دەگەن كۇدىكتى تىركەلدى - kaznews.mn

بايان- ولگەي ايماعىنىڭ اۋرۋحاناسىنا دەنە قىزۋى بار ادام ءتۇسىپ، ول كوروناۆيرۋس جۇقتىرۋى مۇمكىن دەگەن كۇدىكپەن اۋرۋحانادا وقشاۋلانىپ، باقىلاۋعا الىنعان. بۇل تۋرالى ايماقتىق دەنساۋلىق ساقتاۋ باسقارماسىنىڭ باستىعى س. ايگۇل مالىمدەمە جاسادى، دەپ حابارلايدى موڭعوليانىڭ KAZNEWS اقپاراتتىق پورتالى.

«اتالعان كۇدىكتى ازامات 2020 -جىلى 10 -قاڭتار كۇنى قىتاي حالىق رەسپۋبليكاسىنا بارىپ، 6 -اقپاندا موڭعولياعا قايتقان. قوبدا ايماعى ارقىلى كەشە تۇنگى ساعات 21:00 كەزىندە بايان- ولگەيگە كەلگەن. كورونوۆيرۋس جۇقتىرۋى مۇمكىن دەگەن كۇدىكپەن اۋرۋحانادا باقىلاۋعا الىنعان ازاماتتىڭ قازىرگى كۇنى دەنە قىزۋى قالىپقا تۇسكەن. وسىعان بايلانىستى ايماقتىق توتەنشە كوميسسيا 2020 -جىلى 12-اقپان كۇنى تۇنگى ساعات 03:00 تە شۇعىل شاقىرىلىپ ايماقتا ەرەكشە ساقتىق شارالارىن قولعا الۋ تۋرالى شەشىم قابىلداعان»، - دەپ جازادى KAZNEWS.

دەرەككوزدىڭ مالىمەتىنشە، بايان- ولگەي ايماعىنىڭ توتەنشە كوميسسياسى كوروناۆيرۋس جۇقتىردى دەگەن كۇدىككە ىلىنگەن ادامنىڭ ماڭايىندا بولعان ازاماتتاردى وقشاۋلاپ باقىلاۋدا ۇستاۋ، قالاداعى ورتالىق بازارلاردى ۋاقىتشا جابۋ، مەيرامحانا، مەشىتتەردىڭ قىزمەتىن 2-ناۋرىزعا دەيىن توقتاتۋ سەكىلدى ساقتىق شارالارىن كۇشەيتۋ تۋرالى شەشىم شىعارعان.

ايتسە دە سوڭعى دەرەكتەرگە قاراعاندا، بايان-ولگەي ايماعىنىڭ تۇرعىنىنان كوروناۆيرۋس تابىلماعان. بۇعان بايلانىستى بايان-ولگەي ايماعى اكىمىنىڭ 2020 -جىلعى 14-اقپاندا شىعارعان ا/96 وكىمى بويىنشا «تىرلىك»، «اق ءدام» بازارلارى قايتا اشىلعان.

ا ق ش موڭعوليانىڭ 3500 ءتۇرلى تاۋارىنا ساۋدا جەڭىلدىكتەرىن جاسايدى - kaznews.mn

موڭعوليانىڭ ازىق-تۇلىك، اۋىل شارۋاشىلىعى جانە جەڭىل ونەركاسىپ ۆيتسە-ءمينيسترى ساۋلە ءجانىمحان قىزى ا ق ش-قا جۇمىس ساپارىمەن باردى، دەپ حابارلايدى موڭعوليانىڭ KAZNEWS اقپاراتتىق پورتالى.

«ساپار بارىسىندا ول ا ق ش ساۋدا مينيسترلىگىنىڭ ساۋدا ەكونوميكالىق ساياسات ءبولىمىنىڭ باسشىسى ەدۆارد گرەسسەرمەن جانە ا ق ش مەملەكەتتىك حاتشىسىنىڭ ورىنباسارى الان تەرليمەن كەزدەستى. كەزدەسۋدە ەكى ەل اراسىنداعى ساۋدا اينالىمىن ارتتىرۋ، ءجۇن، ءتۇبىت جانە كوسمەتيكالىق ونىمدەرىن ساتۋعا قولداۋ كورسەتۋ، اۋىل شارۋاشىلىعى مەن قارقىندى مال شارۋاشىلىعى سالاسىنداعى ىنتىماقتاستىق جونىندە ماسەلەلەر تالقىلاندى»، - دەپ جازادى kaznews.mn.

ا ق ش تارابى موڭعوليانىڭ 3500 ءتۇرلى تاۋارىنا ساۋدا جەڭىلدىكتەرىن قولدانۋ، اتالمىش ەلدىڭ وزىق تەحنيكا، تەحنولوگيالارىن ەنگىزۋدى قولداعان. ەكى ەلدىڭ كاسىپكەرلەرىنىڭ ءوزارا بيزنەس ورتامەن تاجىريبە الماسۋعا مۇمكىندىك بار ەكەنى اتاپ وتىلگەن.

مىرزاتاي جولداسبەكوۆتىڭ «جامبىل جابايەۆ - ۇلى دالا اقىنى» اتتى كىتابى تۇرىك تىلىنە اۋدارىلدى - TRT

انكارادا قازاقستاننىڭ تۇركياداعى ەلشىلىگى، كەچيورەن مۋنيتسيپاليتەتى جانە ەۋرازيا جازۋشىلار وداعىنىڭ ۇيىمداستىرۋىمەن بەلگىلى تۇركىتانۋشى، پروفەسسور مىرزاتاي جولداسبەكوۆتىڭ «جامبىل جابايەۆ - ۇلى دالا اقىنى» اتتى كىتابىنىڭ تۇرىكشە اۋدارماسىنىڭ تۇساۋكەسەرى بولىپ ءوتتى، دەپ جازادى تۇركيا راديو تەليەۆيزيا پورتالى.

اتالعان ب ا ق- تىڭ جازۋىنشا، كەچيورەن مۋنيتسيپاليتەتىنە قاراستى نەدجيپ فازىل كىساكۇرەك اتىنداعى تەاتر جانە كونگرەسس كەشەنىندە وتكەن كەشكە قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى، كەچيورەن مۋنيتسيپاليتەتى باسشىسى تۋرگۋت التىنوك، ەۋرازيا جازۋشىلار وداعىنىڭ ءتوراعاسى ياكۋب ومەروعلۋ، كەچيورەن ۇلتتىق ءبىلىم بەرۋ باسقارماسىنىڭ ديرەكتورى ايحان ىشىك، تۇرىكسوي باس حاتشىسىنىڭ ورىنباسارى بيلال چاكىدجى، ە ك و- ەۋرازيا قاۋىمداستىعىنىڭ ءتوراعاسى حيكمەت ەرەن، دەپۋتاتتار، ديپلوماتيالىق ميسسيا وكىلدەرى، قازاقستاندىق جاستار مەن جەرگىلىكتى حالىق قاتىسقان.

«تۇساۋكەسەر باعدارلاماسىندا العاشقى ءسوز كەزەگىن العان ەۋرازيا جازۋشىلار وداعىنىڭ ءتوراعاسى ياكۋب ومەروعلۋ ۇلى دالا اقىنىنىڭ كەڭەس وداعى كەزەڭىندەگى اقىندىق شەبەرلىگىمەن تەك قانا قازاق دالاسىنا ەمەس، بۇكىل الەمگە داڭقى شىققان اقساقال ەكەنىن ءتۇسىندىردى. قوعامدىق ماسەلەلەردى شەشۋگە بەلسەنە قاتىسقان ۇلى اقىننىڭ باتىرلاردى جىگەرلەندىرگەن شۋماقتارىمەن ۇلتجاندىلىعىن ورتاعا قويعانىن اتاپ كورسەتتى. ول ەۋرازيا جازۋشىلار وداعى شاڭىراعى استىندا قۇرىلعان كۇننەن باستاپ قازاق ادەبيەتىنىڭ بەدەلدى اقىن- جازۋشىلارى قالام تارتقان 100 دەن استام ولەڭ مەن حيكايانىڭ «كاردەش كالەملەر» (باۋىرلاس قالامدار) اتتى جۋرنالدا جارىق كورگەنىن جانە 40 تان استام قازاق ادەبيەتى تۋىندىسىنىڭ تۇرىك تىلىنە كىتاپ بولىپ اۋدارىلعانىن ايتتى»، - دەپ جازادى TRT.

سونداي- اق، كەش بارىسىندا انكارا حادجى بايرام ءۋالي ۋنيۆەرسيتەتىنىڭ وقىتۋشىسى دوتسەنت دجەميلە كىنادجى ءسۇيىنبايدىڭ مۇراگەرى جامبىلدىڭ ايتىس ونەرىن، ول ءومىر سۇرگەن داۋىردە حالىقتىڭ رۋحانياتىن بايىتقان ولەڭدەرىنىڭ ءرولى تۋرالى بايانداما جاساعان.

«كەشتىڭ سوڭىندا پروفەسسور مىرزاتاي جولداسبەكوۆتىڭ «جامبىل جابايەۆ - ۇلى دالا اقىنى» اتتى ەڭبەگىن تۇرىك تىلىنە اۋدارعان ەۋرازيا جازۋشىلار وداعى اتقارۋ كەڭەسىنىڭ مۇشەسى، ادەبيەتتانۋشى ۋفۋك تۋزمان قازاق ادەبيەتىنىڭ سان- الۋان رۋحاني ازىعىنىڭ تۇرىك حالىقتارى اراسىندا ءالى دە تولىق زەرتتەلىپ، اۋدارىلماعانىن جانە قازاق اۋىز ادەبيەتىنىڭ بايلىعىنىڭ زەرتتەلۋ كەرەكتىگىن ءتۇسىندىردى.

«جامبىل جابايەۆ - ۇلى دالا اقىنى» اتتى ەڭبەكتىڭ قازاق حالقىنىڭ ايتىس پەن جىراۋلىق ءداستۇرىنىڭ قىسقاشا تاريحى مەن جامبىلدىڭ ومىرىنە شولۋ ەكەنىن بايانداعان تۋزمان شىعارمانى وقىرماندارعا ۇسىندى»، - دەپ جازادى TRT.

قازاقستان مەن وزبەكستان اتوم ەنەرگياسىن بەيبىت ماقساتتا پايدالانۋ سالاسىندا ىنتىماقتاستىق جاسايدى - «ءوزا» اقپاراتتىق اگەنتتىگى

تاشكەنت قالاسىندا وزبەكستان رەسپۋبليكاسى ەنەرگەتيكا مينيسترلىگى مەن قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ باستاعان دەلەگاتسيا كەزدەسۋ وتكىزدى. وندا اتوم ەنەرگياسىن بەيبىت ماقساتتا پايدالانۋ جانە وسى سالادا ەكىجاقتىق ىنتىماقتاستىقتى دامىتۋ ماسەلەسى تالقىلاندى، دەپ جازادى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

«كەزدەسۋدە وزبەكستانداعى قۇرىلىپ جاتقان اەس جوباسىنىڭ ىسكە اسىرىلۋى جايلى جانە مەملەكەتتىك يادرولىق- ەنەرگەتيكالىق باعدارلامانىڭ جۇزەگە اسىرىلۋى مەن يادرولىق ينفراقۇرىلىمدى قۇرۋ سالاسىنداعى حالىقارالىق- قۇقىقتىق قۇجاتتاردىڭ ورىندالۋى تۋرالى اقپارات ايتىلىپ، الداعى ۋاقىتتا ماگاتە-نىڭ تالاپتارىنا ساي وزبەكستانمەن كورشى ەلدەر، سونىڭ ىشىندە قازاقستان اۋماعىندا وزبەكستاننىڭ اەس نىساندارىنىڭ جۇمىسىنا جانە ولاردان پايدالانۋعا قاتىستى قورشاعان ورتاعا اسەرىن باعالاۋ بويىنشا قوعامدىق تىڭداۋلار ءوتۋى كۇتىلۋدە. قازاقستان تاراپى كورشى مەملەكەتتىڭ اتوم ەنەرگياسى بويىنشا قابىلداعان شارالارىنا وڭ باعا بەرىپ، الداعى ۋاقىتتا اتوم ەنەرگياسىن بەيبىت ماقساتتا پايدالانۋ سالاسىندا ىنتىماقتاستىق جاساۋدى ۇسىندى. كەزدەسۋ قورىتىندىسىندا وسى باعىتتا بىرلەسكەن جۇمىس جۇرگىزۋ تۋرالى كەلىسىمگە قول جەتكىزىلدى»، - دەپ جازادى «ءوزا» مەملەكەتتىك اقپاراتتىق اگەنتتىگى.

ەسكە سالا كەتەيىك، وزبەكستانداعى اەس جىزاق وبلىسىنىڭ تۇزكەن كولى ماڭىندا سالىنۋدا.

اباي جىلى انكارادا باستاۋ الدى - TRT

انكارادا قازاقتىڭ ۇلى اقىنى، ويشىل، قوعام قايراتكەرى، دانا ابايدىڭ 175 جىلدىعىنا ارناپ ۇلكەن كونسەرت ۇيىمداستىرىلدى، دەپ جازادى تۇركيا راديو تەلەۆيزيا پورتالى.

«تۇرىك مادەنيەتىنىڭ حالىقارالىق ۇيىمى تۇرىكسويدىڭ ۇيىمداستىرۋىمەن، قازاقستان رەسپۋبليكاسىنىڭ تۇركياداعى ەلشىلىگىنىڭ قولداۋىمەن وتكەن كونتسەرت ارقىلى تۇركيادا اباي جىلى اشىلدى. تۇرىك الەمىنەن كەلگەن انشىلەر مەن تر پرەزيدەنتتىك سيمفونيا وركەسترىنىڭ انكارا تورىندەگى ورتاق كونتسەرتىنە جينالعان قاۋىم زالدى لىق تولتىردى. بەتاشار سوزىندە تۇرىكسوي باس حاتشىسى دۇيسەن قاسەيىنوۆ اباي جونىندە وتكىزىلەتىن ءاربىر شارانىڭ ۇلى دانانى ودان ءارى جاقسى تۇسىنۋگە سەپتىگىن تيگىزەتىنىن ايتتى. ءوز كەزەگىندە ەۋرازيا جازۋشىلار وداعى ءتوراعاسى ياكۋپ ومەروعلۋ بولسا، «ابايدىڭ سوزدەرى - بۇگىنگى قازاق ۇلتى ءۇشىن، تۇركى الەمى ءۇشىن جول كورسەتۋشى. اباي الەمى - تۇركى الەمى دەگەن ءسوز. 2020 اباي جىلى قۇتتى بولسىن. ابايدى تانىعان سايىن قازاق ۇلتىن تاني تۇسىنەمىز»، دەدى.

اتالعان ب ا ق- تىڭ جازۋىنشا، قازاقستاندىق اتاقتى ديريجەر ەربولات احمەدياروۆ باسقارعان كونسەرتتە ازەربايجان، قازاقستان، قىرعىزستان، وزبەكستان، گاگاۋىز ەلىنىڭ انشىلەرى تۇركيا رەسپۋبليكاسىنىڭ پرەزيدەنتتىك سيمفونيا وركەسترىنىڭ سۇيەمەلدەۋىمەن اباي اندەرىن شىرقاعان.

«ازەربايجاندىق سوپرانو ەلەونورا مۋستافايەۆا «جەلسىز تۇندە جارىق اي» ءانىن تامىلجىتا ورىنداسا، تۇرىكتىڭ تەنورى ليەۆەنت گۇندىز «ايتتىم سالەم، قالامقاستى» شىرقادى. ازەربايجاننىڭ ءانشىسى يلحام نازاروۆ «جارق ەتپەس قارا كوڭىلىمدى» ورىنداپ، وزبەكستاننان كەلگەن فەرۋزا يۋسۋپوۆا «قاراڭعى تۇندە تاۋ قالعىپ» ءانىن مايىن تامىزىپ شىرقادى. قازاقستاندىق انشىلەر زارينا التىنبايەۆا، تالعات مۇسابايەۆ، كلارا تۇلەنبايەۆا، شاحيماردان ابيلوۆ تا ۇلى اقىننىڭ كەرەمەت سازگەرلىگىن پاش ەتەتىن اندەرىن انكارا تورىندە اۋەلەتتى. «تۇرىك الەمى - اباي الەمى» اتتى كونسەرت سوڭىندا انشىلەر وركەستردىڭ سۇيەمەلدەۋىمەن ابايدىڭ «كوزىمنىڭ قاراسىن» بىرگە شىرقادى»، - دەپ جازادى TRT.

الىشەر ناۋايدىڭ تۋعانىنا 579 جىل - «ءوزا» اقپاراتتىق اگەنتتىگى

تۇركى جۇرتىنىڭ ۇلى اقىنى ءھام شىعىستىڭ ويشىل دانىشپانى بوپ ءومىر كەشىپ، عۇمىرىنىڭ كوپ بولىگىن ادەبيەتپەن مادەنيەتكە ارناعان الىشەر ءناۋايدىڭ تۋعانىنا 9-اقپان كۇنى 579 جىل تولدى، دەپ جازادى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

وسىعان وراي تاشكەنتتە ادەبيەت الەمىندەگى شىعىستىق مەنتاليتەتتى الەمگە پاش ەتكەن شايىردى ەسكە الۋ مەرەكەلىك شاراسى ۇيىمداستىرىلعان.

اۆتور: باقىتجول كاكەش