سولتۇستىك قازاقستاندا جوعارى وقۋ ورنىنا جانە قازاق مەكتەبىنە اباي ەسىمى بەرىلەدى
اباي قۇنانبايەۆتىڭ مەرەيتويىنا ارنالعان سالتاناتتى ءىس- شارالار وبلىستىڭ بارلىق ءبىلىم ورداسىندا كەڭ كولەمدە ۇيىمداستىرىلماق. س ق و ءبىلىم باسقارماسى ارنايى جوسپار قۇرىپ، بەكىتتى. بۇگىن پەتروپاۆل قالاسىنداعى وقۋشىلار سارايىندا وتكەن «حاكىم اباي دانالىعى» اتتى كەش سونىڭ باستاۋى بولدى.
«وبلىستاعى بارلىق مەكتەپتەردە اباي ورتالىقتارىن اشۋ جوسپارلانعان. ول جەردە اباي تانۋ پاندەرى قوسىمشا ساباق رەتىندە وتەتىن بولادى. جالپى جوسپارىمىز اۋقىمدى. ءتۇرلى ۆيكتورينالار، تاربيە ساعاتتارى، كونكۋرستار جوسپارلانعان. ۇستازدار اراسىندا حالىقارالىق فورۋم ۇيىمداستىرامىز، سونداي- اق مۇعالىمدەردىڭ عىلىمي زەرتتەۋلەرى بويىنشا كىتاپ شىعارامىز»، - دەيدى وبلىستىق ءبىلىم باسقارماسىنىڭ جەتەكشىسى گۇلميرا كارىموۆا.
كەشتە ابايدىڭ ولەڭدەرى وقىلىپ، اندەرى ايتىلدى. كورەرمەننىڭ نازارىنا تەاترلاندىرىلعان كورىنىس ۇسىنىلدى. ءوڭىردىڭ زيالى قاۋىم وكىلدەرى جاستار ونەگە الار ويلارىمەن ءبولىستى.
«ابايدىڭ بويىنداعى، ونىڭ ناقىل سوزدەرىندەگى بار جاقسى قاسيەت ءار قازاقتىڭ بويىنان تابىلسا ەكەن دەيمىز. اباي وسىدان 1,5 عاسىر بۇرىن ءومىر سۇرسە دە، سول كەزدەگى قازاقتىڭ مىنەز- قۇلقىنداعى، سالت- ساناسىنداعى جاعدايلار ءالى وزگەرگەن جوق»، - دەيدى كەشتىڭ قۇرمەتتى قوناعى، قازاقستاننىڭ ەڭبەك سىڭىرگەن قايراتكەرى، پروفەسسور زارقىن تايشىباي.
جاقىندا ۇلى اقىننىڭ مەرەيتويىنا وراي پەتروپاۆلداعى 19 ىقشام اۋداندا ورنالاسقان قازاق مەكتەپ- گيمنازياسىنا اباي ەسىمى بەرىلمەك. وبلىستىق ءبىلىم باسقارماسىنىڭ باسپا ءسوز حاتشىسى جانسايا قايىپوۆانىڭ ايتۋىنشا، قازىرگى ۋاقىتتا قاجەتتى قۇجاتتار ازىرلەنىپ جاتىر. بۇدان باسقا م. قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى جانىنداعى ءتىل جانە ادەبيەت ينستيتۋتىنا دا قازاقتىڭ ءبىرتۋار اقىنىنىڭ ەسىمى بەرىلەدى دەپ جوسپارلانعان.
