+7 (701) 759 90 19
16 °С : نۇر-سۇلتان
20 °С : الماتى
USD 443.50 EUR 479.47
RUB 5.79 CNY 62.51
جاڭالىقتار

بەردىبەك ساپاربايەۆ العاشقى جۇمىس ساپارىن قورداي اۋدانىنان باستادى

15 اقپان 08:39
:ءبولىسۋ
بەردىبەك ساپاربايەۆ العاشقى جۇمىس ساپارىن قورداي اۋدانىنان باستادى

تاراز. قازاقپارات - قورداي اۋدانىنا جۇمىس ساپارىمەن بارعان جامبىل وبلىسىنىڭ اكىمى بەردىبەك ساپاربايەۆ ءبىرقاتار الەۋمەتتىك نىسانداردىڭ جۇمىسىمەن تانىسىپ، اۋىل تىرشىلىگىنىڭ قالىپتى جاعدايعا ءتۇسۋ بارىسىن كوردى، دەپ حابارلايدى قازاقپارات ءتىلشىسى.

ايماق باسشىسىنا وبلىس پروكۋرورى نۇرعالىم ءابدىروۆ، ۇلتتىق قاۋىپسىزدىك كوميتەتى دەپارتامەنتىنىڭ باستىعى مارات يرمەنوۆ جانە پوليتسيا دەپارتامەنتىنىڭ باستىعى جانات سۇلەيمەنوۆ ەرىپ ءجۇردى.


الدىمەن ب. ساپاربايەۆ 3,5 مىڭ تۇرعىنى بار قاراسۋ اۋىلىنداعى دارىگەرلىك امبۋلاتورياعا ات باسىن بۇردى. ەمدەۋ مەكەمەسى بارلىق قاجەتتى جابدىقتارمەن قامتاماسىز ەتىلگەن. وتكەن جىلى اۋىلدا 70 ءسابي دۇنيەگە كەلگەن. جەرگىلىكتى تۇرعىنداردى ۆاكسيناتسيالاۋ جانە سكرينينگتىك تەكسەرۋ دەڭگەيى 95 پايىزعا جەتتى.

بۇل رەتتە، 1991 -جىلى سالىنعان مەكەمە عيماراتى كۇردەلى جوندەۋدى قاجەت ەتەدى. وبلىس اكىمى بۇل ۇسىنىستى قولدادى. ول ءۇشىن ءتيىستى قۇجاتتامالار دا دايىن.

مەديتسينالىق قىزمەتكەرلەرمەن كەزدەسۋ بارىسىندا بەردىبەك ساپاربايەۆ دارىگەرلەردى بيۋروكراتيالىقتان اۋلاق بولۋعا، تۇرعىندارعا ساپالى جانە ۋاقىتىلى دارىگەرلىك كومەك كورسەتۋگە، پاتسيەنتتەرمەن سىپايى قارىم- قاتىناس ورناتۋعا شاقىردى.

ايماق باسشىسى بارعان كەلەسى نىسان اۋىلداعى «بالاپان» بالاباقشاسى بولدى. وندا مەملەكەتتىك تىلدە بارلىعى 75 بالا تاربيەلەنۋدە.

سونداي-اق، اتالعان ەلدى مەكەندەگى №7-ورتا مەكتەپتە 1033 وقۋشى ءبىلىم الۋدا. ساباقتار قازاق جانە ورىس تىلدەرىندە جۇرگىزىلەدى. وتكەن جىلى وقۋ ورنىن 31 تۇلەك بىتىرسە، ءبىرىنشى سىنىپقا 134 بالا قابىلدانعان. ءوڭىر اكىمى مەكتەپتەگى تەحنولوگيا ساباعىنا قاتىسىپ، جوعارى سىنىپ وقۋشىلارىن اڭگىمەگە تارتتى. مۇعالىمدەرمەن كەزدەسۋ بارىسىندا تاۋەلسىز قازاقستان تاريحىندا العاش رەت «پەداگوگ مارتەبەسى تۋرالى» زاڭ قابىلدانعانىن، مۇعالىمدەردىڭ جالاقىسى جوسپارلى تۇردە ارتىپ وتىرعانىن اتاپ وتكەن ب. ساپاربايەۆ، بۇل ورايدا، مۇعالىمدەردىڭ دە بالالارعا ساپالى جانە زاماناۋي ءبىلىم بەرۋى مىندەتتىلىگىن باسا ايتتى.

بۇدان سوڭ ماسانشى اۋىلىنا بارعان وبلىس اكىمى №13-ورتا مەكتەپتىڭ باسشىلىعىن قاتاڭ سىنعا الدى. اتالعان ءبىلىم ورداسىنىڭ وقۋشىلارى بۇعان دەيىن بىردە-ءبىر رەت «التىن بەلگى» نەمەسە ۇزدىك اتتەستاتقا يە بولا الماسا، مەكتەپتىڭ ءبىر عانا تۇلەگى ج و و بويىنشا مەملەكەتتىك گرانتقا قول جەتكىزگەن. جامبىل وبلىسىنىڭ باسشىسى وقۋ ورداسىن ارالاپ شىققان كەزدە وقۋشىلاردىڭ تەك 27 پايىزى عانا ساباقتا بولعاندىعى انىقتالدى.

«بايقاپ تۇرعانىمىزداي، مۇعالىمدەر مەن اتا-انالار اراسىندا تىعىز بايلانىس جوق، وقۋ ۇدەرىسىنىڭ ساپاسىنا، وسكەلەڭ ۇرپاقتى پاتريوتيزم، مادەني-ادامگەرشىلىك قۇندىلىقتار مەن داستۇرلەر رۋحىندا تاربيەلەۋگە ءتيىستى كوڭىل بولىنبەيدى»، - دەپ اتاپ ءوتتى بەردىبەك ساپاربايەۆ.

ءوڭىر باسشىسى جاۋاپتى تۇلعالارعا كەلەر دۇيسەنبى كۇنى بارلىق وقۋشىلار ساباققا تۇگەل كەلۋىن قامتاماسىز ەتۋ بويىنشا ناقتى تاپسىرما بەردى.

وبلىس اكىمى ماسانشى اۋىلىنداعى اۋرۋحانا ۇجىمىمەن اڭگىمە بارىسىندا مىندەتتى مەديتسينالىق ساقتاندىرۋ جۇيەسىن ەنگىزۋ شارالارىنا نازار اۋداردى. بۇل ورايدا اعىمداعى جىلدىڭ 1-ساۋىرىنە دەيىن بارلىق ازاماتتار ساقتاندىرىلۋى كەرەكتىگىنە كوڭىل ءبولدى. بۇگىندە مەديتسينالىق ۇيىمدار قىزمەتكەرلەرىنىڭ جالاقىسى ارتىپ كەلە جاتقانىن تىلگە تيەك ەتكەن ايماق باسشىسى، ەمدەۋ مەكەمەلەرىنىڭ ماتەريالدىق- تەحنيكالىق بازاسىن جاقسارتۋدا جۇيەلى جۇمىستار جۇرگىزىلىپ جاتقاندىعىن جەتكىزدى.

اتالعان اۋرۋحاناداعى دارىگەرلەردىڭ ايتۋىنشا، ءدارى- دارمەكپەن قامتاماسىز ەتۋ، ەكپە ەگۋ شارالارى جوسپارلى تۇردە ورىندالىپ، «دامۋمەد» ەلەكتروندىق باعدارلاماسى جۇيەلى جۇمىس ىستەۋدە. الايدا، ولار تۇرعىن ۇيمەن قامتاماسىز ەتۋ ماسەلەسىن العا تارتتى.


سونداي-اق، وبلىس باسشىسى قاراكەمەر اۋىلىنداعى ءابىل نۇسىپبايەۆ اتىنداعى №14-ورتا مەكتەپتىڭ، 100 ورىندىق «ايسۇلتان» بالاباقشاسى مەن «مولداسەيىت» سپورت كەشەنىنىڭ جۇمىسىمەن تانىستى. پەداگوگتارمەن كەزدەسۋدە وقۋشىلاردىڭ رۋحاني تاربيەسىنە، ساباقتاستىقتىڭ ساقتالۋىنا اسا نازار اۋدارۋدىڭ ماڭىزدىلىعىن قاداپ ايتتى.

«بالالار ۇلتتىق- مادەني داستۇرلەردەن سىرت قالماي، رۋحاني بايلىقتاردى جەتە ءتۇسىنىپ ءوسۋى كەرەك. اعا بۋىن وكىلدەرىمەن تۇراقتى تۇردە كەزدەسۋلەر ۇيىمداستىرىلىپ، مەكتەپتەر ءوز تۇلەكتەرىمەن تىعىز بايلانىس ورناتىپ وتىرۋى قاشاندا ماڭىزدى»، - دەدى بەردىبەك ساپاربايەۆ.

جامبىل وبلىسى اكىمىنىڭ قورداۋ اۋدانىنا جۇمىس ساپارى اۋقاتتى اۋىلىندا جالعاستى. وندا تىرەك پوليتسيا بەكەتىندەگى قۇرىلىمدىق كۇشتەر باسشىلارىنىڭ قاتىسۋىمەن قىزۋ اڭگىمە ءوتتى. ايتا كەتەيىك، اتالعان پوليتسيا بەكەتى بىرنەشە جىل بۇرىن جاقىن ماڭداعى التى اۋىلدىق وكرۋگتە كريمينوگەندىك جاعدايدى جاقسارتۋ ءۇشىن قۇرىلعان. بۇگىندە بەكەتتە 19 قىزمەتكەر جۇمىس جاسايدى.

ءتارتىپ ساقشىلارى اۋىل تۇرعىندارىنىڭ قاتىسۋىمەن كەزدەسۋلەر مەن ارنايى جيىندار ءجيى وتكىزىلىپ تۇراتىنىن تىلگە تيەك ەتتى. وسى ورايدا بەكەت جۇمىسىنا قاتىستى ماسەلەلەر دە جوق ەمەس. ولاردى شەشۋمەن وبلىستىق دەپارتامەنت پەن اۋداندىق پوليتسيا ءبولىمىنىڭ جاڭا باسشىلىعى اينالىساتىن بولدى.


بۇدان سوڭ وبلىس اكىمى اۋقاتتىداعى 100 بالاعا ارنالعان «ءتىلاشار» جەكە مەنشىك بالاباقشاسىنىڭ جۇمىسىنا قانىقتى. سونىمەن قاتار، اۋىل مەشىتىنە قاراستى كەڭ زالدا سورتوبە، اۋقاتتى، قاراكەمەر، ماسانشى، قاراسۋ جانە قاراساي اۋىلدىق وكرۋگتەرىنىڭ تۇرعىندارىنان قۇرالعان قوعامدىق كەلىسىم كەڭەسىنىڭ وتىرىسىنا قاتىستى. وندا جاڭا قۇرىلىمنىڭ جۇمىس باعىتتارى مەن ناقتى ءىس- قيمىل جوسپارى تالقىلاندى.


سورتوبە اۋىلىنداعى 450 وقۋشى وقيتىن №48-ورتا مەكتەپ مۇعالىمدەرىمەن كەزدەسكەن ب. ساپاربايەۆ مەملەكەتتىك ءتىلدى ۇيرەنۋگە، اسىرەسە وعان ورىس مەكتەپتەرىندە كوبىرەك كوڭىل ءبولۋ كەرەكتىگىنە نازار اۋدارتتى. بالالاردىڭ بوس ۋاقىتىن ۇتىمدى ۇيىمداستىرۋعا كوڭىل ءبولدى.

اۋدانداعى جۇمىس ساپارىن قورىتىندىلاي كەلە ايماق باسشىسى ادامگەرشىلىك-تاربيە باعىتىنداعى جۇمىستى كۇشەيتە ءتۇسۋ كەرەكتىگىنە ايرىقشا توقتالدى.

«ءبىز وسكەلەڭ ۇرپاققا ساپالى ءبىلىم بەرۋگە ءتيىسپىز. قورداي اۋدانىندا ورىن العان وقيعانىڭ باستى سەبەپتەرىنىڭ ءبىرى جاستاردى تاربيەلەۋدەگى كەتكەن كەمشىلىكتەر دەسەك قاتەلەسپەيمىز. سوندىقتان دا ءبىز وسىعان اسا نازار اۋدارعانىمىز ءجون. جاس قازاقستاندىقتاردى پاتريوتيزم مەن توزىمدىلىك رۋحىندا تاربيەلەۋدىڭ پارمەندى جۇيەسىن قۇرۋىمىز كەرەك»، - دەپ قورىتىندىلادى ءوز ءسوزىن بەردىبەك ساپاربايەۆ.


باستى سوزدەر: ايماق,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049

مۇراعات