كوروناۆيرۋستى جەر شارىنىڭ ءار ءۇشىنشى تۇرعىنى جۇقتىرۋى مۇمكىن
دەرتكە شالدىققاندار قاتارىندا دارىگەرلەر دە از ەمەس كورىنەدى. كوز جۇمعاندار اراسىندا دا مەديتسينالىق قىزمەتكەرلەر بار. قىتايدا كوروناۆيرۋستى 1716 مەديتسينالىق قىزمەتكەر جۇقتىرعان. سولاردىڭ التاۋى كوز جۇمدى. مۇندا ىندەتپەن كۇرەسىپ جاتقان دارىگەرلەر حالىق اراسىندا «اق حالاتتى پەرىشتەلەر» دەپ اتالىپ كەتكەن.
لي ۆەنلياننىڭ ەسىمى تەك قازاسىنان كەيىن عانا بۇكىل الەمگە تانىمال بولدى. ول العاشقىلاردىڭ ءبىرى بولىپ بىلتىر جەلتوقساندا كوروناۆيرۋس تۋرالى حابارلاعان ەدى. الايدا بيلىك ونىڭ سوزىنە اسا ءمان بەرمەگەن. اقىرىندا دارىگەر ۆيرۋستى ءوزى جۇقتىرىپ، 35 جاسىندا ودان مەرت بولدى.
وسى رەتتە مەديتسينالىق قىزمەتكەرلەردىڭ قاۋىپسىزدىگىنە دە كوپ كوڭىل بولگەن ءجون. بۇعان دەيىن كوروناۆيرۋستى جەر شارى تۇرعىندارىنىڭ ۇشتەن ەكىسى جۇقتىرۋى مۇمكىن دەگەن بولجام ايتىلعان. ءتيىستى مالىمدەمەنى دۇنيەجۇزىلىك دەنساۋلىق ساقتاۋ ۇيىمى جانىنداعى كەڭەسشىسى ايرۋ لوندجيني جاساعان.
ايتۋىنشا، قالىپتى جاعدايدا ءاربىر ناۋقاس ىندەتتى ەكى نە ءۇش ادامعا جۇقتىرادى. بۇل كورسەتكىشتى ەكى ەسەگە ازايتقان كۇننىڭ وزىندە دە ىندەتپەن جەر شارىنىڭ ءار ءۇشىنشى تۇرعىنى اۋىرۋى مۇمكىن. اۋرۋدىڭ تارالۋىن تەك كارانتيندىك شارالار عانا باياۋلاتا الادى. الايدا ونداي جۇمىستار ىندەت قىتاي شەكاراسىنان اسىپ كەتكەنگە دەيىن جاسالۋى ءتيىس ەدى دەيدى ماماندار.
مايكل رايان، د د س ۇ وكىلى:
- دۇنيەجۇزىلىك دەنساۋلىق ساقتاۋ ۇيىمى مۇمكىندىگىنشە بارلىق ەلدەرگە كەڭەس بەرىپ، تەحنيكالىق كومەك كورسەتىپ جاتىر. ەمدەۋ جاعىنا كەلەتىن بولساق، ءبىز ۆيرۋسقا قارسى پرەپاراتتاردى قولدانۋدامىز. ولار بۇعان دەيىنگى ەپيدەميالار كەزىندە، ياعني ا ءتيپتى پنيەۆمونيا مەن تاياۋ شىعىستىق رەسپيراتورلىق سيندروم كەزىندە پايدالانىلعان. تاعى ءبىرقاتار ءدارىنىڭ تيىمدىلىگىن تەكسەرىپ جاتىرمىز. وعان بىرنەشە اپتا كەتەدى.
ازىرگە بۇل پرەپاراتتار تەكسەرىلىپ جاتقاندا، قىتاي دارىگەرلەرى كوروناۆيرۋستان تۋىندايتىن پنيەۆمونيانى ەمدەۋدىڭ ءتيىمدى ءادىسىن ويلاپ تاپقان. ولار ەمدەلگەن دونورلاردىڭ قان پلازماسىن ەندى اۋرۋحاناعا تۇسكەن ناۋقاستارعا قۇياتىن بولعان. بۇل ءتاسىلدىڭ ارقاسىندا اق حالاتتىلار حال ۇستىندە جاتقان وننان اسا ناۋقاستى امان الىپ قالعان.
قىتايلىقتارعا وزگە ەلدەر دە كومەك قولىن سوزۋدا. ءبىر ەلدەر اسا قاجەتتى تاۋار - بەتپەردەلەردى جىبەرىپ جاتسا، باسقالارى ءتۇرلى مەديتسينالىق قۇرالدار اتتاندىرعان. وسى رەتتە ءتۇرلى ەلدەردىڭ ديپلوماتتارى قىتايلىقتارعا قولداۋ سوزدەرىن ايتىپ، بەينەجازبالار جىبەرىپ جاتىر.
فيليپپيندە كوروناۆيرۋسقا قاتىستى تۇرعىندار ەرەكشە يدەيا ويلاپ تاپقان. مۇندا تۇرعىندار عاشىقتار كۇنىن تويلاپ جاتىر. الايدا جۇرت قاۋىپسىزدىك شارالارى جايلى دا ۇمىتپاعان. ءسويتىپ گۇل شوعىنا قوسىمشا رەتىندە مەديتسينالىق بەتپەردە مەن زارارسىزداندىرعىش قۇرالدار سالىنۋدا. ونىڭ باعاسى وزگەلەردەن قىمبات ەكەن. الايدا سوعان قاراماستان، مۇنداي گۇل شوقتارىنا سۇرانىس جوعارى كورىنەدى.
www.24.kz