گازبەن جۇرەتىن كولىكتەرگە ارنايى بەلگى جاپسىرۋ ۇسىنىلدى

نۇر- سۇلتان. قازاقپارات - قازاقستاندا گازبەن جۇرەتىن كولىكتەرگە ارنايى بەلگى جاپسىرۋ مىندەتتەلۋى مۇمكىن، دەپ حابارلايدى قازاقپارات ءتىلشىسى.

بۇل تۋرالى ق ر ىشكى ىستەر مينيسترلىگى توتەنشە جاعدايلار كوميتەتىنىڭ ءتوراعاسى ۆلاديمير بەككەر ايتتى.

«ازىرگە ەكى بەلگىنىڭ ەسكيزى جاسالدى. ونىڭ بىرەۋى اۆتوكولىكتىڭ الدىڭعى تەرەزەسىنە جابىستىرىلادى. ول پاركينگتە كىرگەن جاعدايدا كورىنىپ تۇرۋى كەرەك. ولاردىڭ جابىق پاركينگكە كىرگەنىن كۇزەتشىلەر نەمەسە بەينەباقىلاۋ ارقىلى بىلۋگە بولادى. كەدەندىك وداقتىڭ تەحنيكالىق رەگلامەنتتەرىنە سايكەس، جول پوليسياسى بەنزيننەن گازعا اۋىسقان كولىكتىڭ تەحنيكالىق پاسپورتىنا ارنايى بەلگى سوعۋى ءتيىس» ، - دەدى كوميتەت ءتوراعاسى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ەكىنشى ەسكيز - گازبەن جۇرەتىن كولىكتەردىڭ جابىق اۆتوتۇراققا كىرۋىنە تىيىم سالاتىن بەلگى بولماق. تىيىم سالۋ بەلگىسى جابىق اۆتوتۇراقتىڭ كىرەبەرىسىنە قويىلادى.

ۆ. بەككەردىڭ ايتۋىنشا، ازىرگە بۇل بەلگىلەر قابىلدانعان جوق. شامامەن، 2020 -جىلدىڭ ورتاسىندا بەكىتىلۋى مۇمكىن.

ايتا كەتەيىك، 2019 -جىلدىڭ جەلتوقسانىندا ق ر ءورت قاۋىپسىزدىگى ەرەجەلەرىنە وزگەرتۋلەر مەن تولىقتىرۋلار ەنگىزگەن ۇكىمەت قاۋلىسى قابىلداندى، وندا گازبەن جۇرەتىن كولىكتەردىڭ جابىق پاركينگتەرگە كىرۋىنە تىيىم سالىندى.

«ق ر اكىمشىلىك قۇقىقبۇزۋشىلىق تۋرالى» كودەكسىنىڭ 410-بابى (ءورت قاۋىپسىزدىگى تالاپتارىن بۇزۋ نەمەسە ورىنداماۋ) بويىنشا ازاماتتىق قورعانىس ورگاندارى ەرەجە بۇزعاندارعا 5 ا ە ك نەمەسە 12 مىڭ تەڭگەدەن استام ايىپپۇل سالا الادى.