سەمەيدە ابايدىڭ مەرەيتويىنا وراي جاڭا سپەكتاكل قويىلماق

وسكەمەن. قازاقپارات - سەمەي قالاسىنداعى «داريعا- اي» جاستار تەاترى مۇحتار اۋەزوۆتىڭ «عاجايىپ تراگەدياسى» سپەكتاكلىنىڭ تۇساۋكەسەرىن وتكىزبەك، دەپ حابارلايدى قازاقپارات.

بۇل قويىلىم ۇلى اقىننىڭ ءومىر جولى مەن شىعارماشىلىعى تۋرالى سىر شەرتەدى. دايىندىعى ءتورت ايعا سوزىلعان سپەكتاكلدە 13 اكتەر ونەر كورسەتەدى. ال ساحنا دەكوراتسياسىنا ەلوردادان ماماندار شاقىرىلعان. رەجيسسەر گاۋحار ادايدىڭ ايتۋىنشا، اكتەرلەرگە قويىلعان باستى تالاپ - كەيىپكەرلەردىڭ سىرت بەينەسىن اينىتپاي بەرۋ ەمەس، ءوز شەبەرلىكتەرى ارقىلى ولاردىڭ مىنەز- قۇلقىن، جان دۇنيەسىن كورەرمەنگە شىنايى جەتكىزە ءبىلۋ.

«ساحناداعى كورىنىستەر ارقىلى اۋديتوريانى تەرەڭ ويعا جەتەلەگىمىز كەلەدى. اباي بەينەسىن سومدايتىن اكتەردە كوزىمىز ۇيرەنگەن اقىن بەينەسىندەگى ساقال، باسقا دا بەت- الپەت ۇقساستىعى بولمايدى»، - دەيدى رەجيسسەر.

اباي بەينەسىن سومدايتىن ەركەبۇلان نۇعىمانوۆتىڭ ويىنشا، حاكىمنىڭ ءرولىن ويناۋ زور قۇرمەت.

«كەز كەلگەن اكتەر وزىنە بەرىلگەن كەيىپكەردى شىنايى بەينەلەۋگە تىرىسادى. ال اباي بەينەسىن سومداۋ - اكتەر ءۇشىن ناعىز باقىت ءارى ۇلكەن جاۋاپكەرشىلىك. كورەرمەندەردىڭ ويىنان شىعۋ ءۇشىن بارىنشا تىرىسۋدامىز»، - دەيدى ول.

ايتا كەتەيىك، سپەكتاكلدىڭ تۇساۋكەسەرى اقپاننىڭ 21-22 - كۇندەرى وتەدى.

اۆتور: تالعاتجان مۇحامەتبەك ۇلى