قازاقستاندا كوروناۆيرۋسقا قارسى ۆاكتسينا ازىرلەنە مە - مينيستر جاۋابى

None
None
نۇر-سۇلتان. قازاقپارات – ق ر دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋسقا قارسى ۆاكتسينا ازىرلەۋ تۋرالى تىلشىلەر سۇراعىنا جاۋاپ بەردى، دەپ حابارلايدى قازاقپارات ءتىلشىسى.

«قازاقستان ۇكىمەتى ءۇشىن نەگىزگى ماقسات - ينفەكتسيانىڭ كىرمەۋى جانە تارالماۋى بولىپ وتىر. سوندىقتان، نەگىزگى قاراجات حالىق پەن مەديتسينالىق قىزمەتكەرلەردى، شەكاراشىلاردى قورعاۋعا باعىتتالعان. ودان بولەك، كوروناۆيرۋس كۇدىگى بار پايتسەنتتەردىڭ بارلىعىن جەتكىلىكتى تۇردە تەكسەرىپ، دارىلىك زاتتار قورىن جاساۋ ءۇشىن دياگنوستيكالىق تەحنولوگيالارعا ءمان بەرىلگەن»، - دەدى ە. ءبىرتانوۆ ەلوردادا وتكەن باسپا ءسوز ءماسليحاتىندا.

ونىڭ ايتۋىنشا، ءبىلىم جانە عىلىم مينيسترلىگى مەن وعان باعىنىشتى عىلىمي ورتالىقتار وسىنداي ۆاكتسينانى ازىرلەۋگە دايىن ەكەندىكتەرىن حابارلاعان.

«ءبىزدىڭ ەلىمىزدە ۆاكتسينا جاساۋ بويىنشا جاقسى تاجىريبە بار. بۇل جاعدايدا سايكەس عىلىمي ورتالىقتاردا بەلگىلى ءبىر جۇمىستار بار. الايدا، مۇنىڭ قيىن تەحنولوگيالىق پروتسەسس ەكەنىن ءتۇسىنۋ قاجەت جانە بارلىق حالىقارالىق عىلىمي ورتالىقتارمەن ۇيلەستىرى ءجۇمىستارىن جۇرگىزۋ كەرەك. قازىر ۆاكتسينا جاساۋ بويىنشا وزگە ەلدەردىڭ عالىمدارىمەن بىرلەسىپ جۇمىس ىستەۋ مۇمكىندىگىن قاراستىرىپ جاتىرمىز»، - دەدى ول.

ارينە، مۇنداي ۆاكتسينا شىعارىلسا، ول وتە ساپالى جانە قاۋىپسىز بولۋى كەرەك.

«ەكىنشىدەن، حالىققا قولجەتىمدى بولۋى كەرەك. قازىر ءبىر نارسەنى ناقتى ايتۋعا ەرتە. بالكىم، قازاقستان مەن وزگە دە مەملەكەتتەر جاساعان سانيتارلىق شارالار ينفەكتسيانىڭ ازايۋىنا ىقپال ەتكەن شىعار. بۇل ىندەتتى جاقىن ارادا ەڭسەرەمىز دەپ ۇمىتتەنەمىن جانە ۆاكتسينانى ازىرلەۋ جۇمىستارىن قاتار جۇرگىزە بەرەمىز»، - دەدى ەلجان ءبىرتانوۆ.

سوڭعى جاڭالىقتار