كاتار ءامىرى قازاقستانعا ساپارمەن كەلەدى

نۇر-سۇلتان. قازاقپارات - كاتار ءامىرى - شەيح تاميم بەن حاماد ءال-ءتانيدىڭ قازاقستانعا ساپارى جوسپارلانعان. بۇل تۋرالى ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.

«ءبىزدىڭ وتىرىسىمىز باستى سيپاتقا يە. ويتكەنى، ول ۇلى مارتەبەلى كاتار ءامىرى - شەيح تاميم بەن حاماد ءال-ءتانيدىڭ قازاقستانعا ساپارى قارساڭىندا ءوتىپ وتىر. وسىناۋ باستى شارا ەكى ەلدىڭ قارىم-قاتىناسىن جانداندىرۋعا قۋاتتى سەرپىن بەرۋگە قىزمەت ەتىپ، حالىقتارىمىز اراسىنداعى دوستىق بايلانىستى كورسەتە تۇسەدى. ءبىز ءۇشىن بۇل زور مارتەبە ءارى جوعارى دەڭگەيدەگى جاۋاپكەرشىلىك»، - دەدى بۇگىن قازاقستان- كاتار جوعارى دەڭگەيدەگى بىرلەسكەن كوميسسياسىنىڭ 5-وتىرىسىن اشقان رۋسلان دالەنوۆ.

قازاقستان ءمينيسترىنىڭ ايتۋىنشا، وتكەن جىلى ەكىجاقتى ءوزارا ءىس-قيمىل ءۇشىن ناتيجەلى بولدى. اتاپ ايتقاندا، 2019-جىلدىڭ ماۋسىمىندا ەكى ەلدىڭ باسشىلارى ا و ى س ش ك ءسامميتى الاڭىندا جۇزدەستى. قىركۇيەكتە ءبىرقاتار پارلامەنتارالىق كەزدەسۋلەر بولسا، قاراشادا ق ر پرەزيدەنتى اكىمشىلىگىنىڭ باسشىسى باستاعان قازاقستاندىق دەلەگاتسيا كاتارعا ساپارلادى. سول كەزدە قازاقستان مەن كاتاردىڭ جاۋاپتى ۆەدومستۆولارى اراسىنداعى بىرلەسكەن جۇمىستىڭ وڭ سەرپىنى اتالىپ ءوتىلدى.

«تەك سوڭعى بىرنەشە ايدىڭ ىشىندە عانا قازاقستان باسشىلىعى ەلدەرىمىز اراسىنداعى ىنتىماقتاستىقتى كەڭەيتۋگە باعىتتالعان ماڭىزدى شارالار كەشەنىن قابىلدادى. ءسوز كاتار ازاماتتارىن 2019-جىلدىڭ 1- قازانىنان ۆيزالىق تالاپتارىن جەڭىلدەتۋ، اۋە قاتىناسى تۋرالى مەموراندۋمعا قول قويۋ جايىندا بولىپ وتىر. مەموراندۋمعا سايكەسە، «Qatar Airways» كومپانياسى نۇر-سۇلتان مەن الماتى قالالارىنا اپتاسىندا 7 جولاۋشىلار رەيسىن، سونداي-اق دوحا مەن الماتى اراسىندا 7 جۇك رەيسىن ورىنداي الادى. وسى وقيعالاردىڭ بارلىعى دا سان قىرلى ىنتىماقتاستىقتى تەرەڭدەتۋگە ەكى جاقتىڭ دا ۇمتىلىسىنا دالەل بولا الادى»، - دەدى ول.