ا ق ش سەناتى ترامپتىڭ اسكەري وكىلەتىن شەكتەيتىن رەزوليۋتسيانى ماقۇلدادى
قاڭتار ايىنىڭ باسىندا وكىلدەر پالاتاسى قۇجاتتى ماقۇلداعان. سەناتتاعى 47 دەموكراتتان بولەك 8 رەسپۋبليكاشىل قۇجاتتى قولداپ داۋىس بەردى. 45 ءى قارسى بولدى.
بۇعان دەيىن دونالد ترامپ رەسپۋبليكاشىلداردى قۇجاتتى قولداماۋعا شاقىرعان.
«ا ق ش سەناتى يران بويىنشا اسكەري وكىلەت تۋرالى رەزوليۋتسياعا داۋىس بەرمەۋى ءتيىس، بۇل ەلدىڭ قاۋىپسىزدىگى ءۇشىن ماڭىزدى. بىزدە يران بويىنشا ءبارى جاقسى، قازىر السىزدىك كورسەتەتىن ۋاقىت ەمەس» دەپ جازدى ترامپ Twitter- دە.
ەگەر ترامپ قۇجاتقا ۆەتو قويسا، قۇجاتتىڭ قابىلدانۋى ءۇشىن 67 سەناتوردىڭ داۋىسى كەرەك. ساراپشىلار مۇنداي جاعدايدا قۇجات قابىلدانا قويماس دەپ بولجايدى.
قاڭتار ايىندا باعدات اۋەجايىندا يراندىق گەنەرال كاسەم سۇلەيماني ءولتىرىلىپ، ا ق ش پەن يران اراسىنداعى جاعداي ۋشىققان كەزدە وكىلدەر پالاتاسى وسىنداي رەزوليۋتسيانى قابىلداعان. گەنەرال ولىمىنەن كەيىن يران ا ق ش- تىڭ يراكتاعى اۋە بازاسىن زىمىرانمەن اتقىلادى.
قۇجاتتى تالقىعا شىعارعان دەموكراتتار ا ق ش پەن يران اراسىنداعى ءىرى جانجالعا جول بەرگىسى كەلمەيتىنىن، الايدا ترامپتىڭ ارەكەتى سوعان يتەرمەلەيتىنىن ايتقان.
رەسپۋبليكاشىلداردىڭ باسىم بولىگى سۇلەيمانيگە قارسى وپەراتسيانى دا، پرەزيدەنتتىڭ قاجەت كەزدە يرانعا قارسى قارۋلى كۇشتەردى قولدانۋ قۇقىعىن قولدادى.
«ازاتتىق»