داۋرەن ابايەۆ قورداي وقيعاسىنا قاتىستى پىكىرتالاس تۋرالى: بۇل - قالىپتى ءۇردىس
«قوعام ەكىگە جارىلىپ كەتتى دەۋ - ارتىقتاۋ. ءيا، ادامدار ءسوز تالاستىرادى، سەبەبى اركىمنىڭ ءوز ويى بار. بۇل - قالىپتى ءۇردىس. ءبىراق قوعامدا ءارتۇرلى ماسەلەگە قاتىستى پىكىرتالاس ءجۇرىپ جاتاتىنىن ءتۇسىنۋ كەرەك. ءبىراق بارلىق ەموتسيا مەن كوڭىل تولقىنىسىن قويا تۇرساق، قازاقستان ازاماتتارىنىڭ كوبى مىناداي قاعيداتتى قولدايتىن سياقتى: ءبىرىنشى، كەزەكتە ءبىزدىڭ ەلدە ءبارى دە بەيبىتشىلىك پەن كەلىسىمنىڭ بولعانىن قالايدى. ەكىنشىدەن، بولعان وقيعانىڭ شىنايى سەبەبىن بىلگىسى ءارى ونى رەتتەگىسى كەلەدى. ۇشىنشىدەن، ادامدار قاقتىعىسقا كىنالىلەردىڭ انىقتالعانىن ءجون دەپ بىلەدى. تورتىنشىدەن، ادامدار مۇنداي وقيعانىڭ ەندى قايتالانعانىن قالامايدى. بۇل - ەڭ باستى ماسەلە»، - دەدى مينيستر.
داۋرەن ابايەۆ پىكىرتالاستاردىڭ شۇعىل مالىمدەمەلەرگە ۇلاسىپ كەتۋى مۇمكىن ەكەنىن ايتىپ ءوتتى.
«بالكىم، بۇرىن ايتقانىمىزداي بىزدە بەلگىلى ءبىر دارەجەدە اشىق پىكىر تالاستىرۋ دا دامىماي تۇرعان بولار. ادامدار ەموتسيامەن ءبىر- ءبىرىن جابىرلەۋگە دەيىن بارادى. كەي جاعدايدا كەز كەلگەن ماسەلەگە بايلانىستى، كەز كەلگەن سالانىڭ مامانى رەتىندە پىكىر ءبىلدىرىپ وتىرعان «ساراپشىلاردىڭ» دا وتقا ماي قۇيىپ وتىراتىنى بار. اركىم ءوز ءسوزىن ايتىپ قالعىسى كەلەدى. وكىنىشكە قاراي، كەيبىرەۋ ءتىپتى اشىقتان- اشىق «حايپ ۇستاعىسى» كەلەدى. بۇعان قارسى شارا قولدانۋ مۇمكىن ەمەس سەكىلدى. ءسوز ەركىندىگى - وسى بولار»، - دەدى داۋرەن ابايەۆ.