اقتوبەدە كيىك اتقان براكونەر ۇستالدى

اقتوبە. قازاقپارات - اقتوبەدە كيىك اتىپ، ءمۇيىزىن كەسىپ العان كۇدىكتى ۇستالدى، دەپ حابارلايدى قازاقپارات ءتىلشىسى.

اقتوبە وبلىستىق پوليسيا دەپارتامەنتى 7 - اقپان كۇنى ايتەكە بي اۋدانىنىڭ ۇلعايسىن اۋىلى ماڭىندا قاردا جۇرەتىن كولىكتەن ەكى كيىكتىڭ تۇتاس ەتىن تاپتى. ولاردىڭ ءمۇيىزىن كەسىپ العان.

«جەدەل ىزدەستىرۋ جۇمىسى كەزىندە قاردا جۇرەتىن كولىك يەسى انىقتالدى. ول ايتەكە بي اۋدانىنىڭ تۇرعىنىنا كولىگىن ساتىپ جىبەرگەن. ال قاردا جۇرەتىن كولىكتى ساتىپ العان ادام تانىسىنا ۋاقىتشا بەرگەن. پوليسيا قىزمەتكەرلەرى بارلىق بايلانىستى انىقتاپ، 27 جاستاعى كۇدىكتىنى قولعا ءتۇسىردى. ول جىلقى باعىپ جۇرگەن كەزدە ەكى كيىك اتىپ العانىن جاسىرمادى. كەيىن ەن دالاداعى قىستاققا قارۋىن تىعىپ كەتكەن. ال قاردا جۇرەتىن كولىگى بۇزىلعان.

قازىر وسى دەرەك بويىنشا قىلمىستىق كودەكستىڭ 337 - بابىمەن تەرگەۋ ءجۇرىپ جاتىر. كيىك ەتى مەن ءمۇيىزى زاتتاي ايعاق رەتىندە تاركىلەندى. كۇدىكتى تەرگەۋ يزولياتورىنا قاماۋعا الىندى» ، - دەدى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.

ايتا كەتەيىك، ەلىمىزدە براكونەرلەرگە قاتىستى زاڭ كۇشەيتىلگەن بولاتىن.