اسقار مامين تۇركىستان قالاسىندا ينفراقۇرىلىمنىڭ سالىنۋ بارىسىن تەكسەردى

تۇركىستان. قازاقپارات – ق ر پرەمەر- ءمينيسترى اسقار مامين جۇمىس ساپارى اياسىندا تۇركىستان قالاسىنداعى نىسانداردىڭ سالىنۋ بارىسىن تەكسەردى، دەپ حابارلايدى قازاقپارات ۇكىمەت باسشىسىنىڭ باسپا ءسوز قىزمەتىنە سىلتەمە جاساپ.

پرەمەر- مينيستر مەن تۇركىستان وبلىسىنىڭ اكىمى ءومىرزاق شوكەيەۆ تۇركىستان قالاسىنداعى جاڭا اۋەجايدىڭ جانە وعان اپاراتىن اۆتوموبيل جولىنىڭ سالىنۋ بارىسىمەن تانىستى. نىسان وبلىس ورتالىعىنان 16 شاقىرىم قاشىقتىقتا ورنالاسقان جانە بيىل قىركۇيەك ايىندا پايدالانۋعا بەرىلەدى. تەرمينالدىڭ وتكىزۋ قابىلەتى جىلىنا 3 ميلليون جولاۋشىنى قۇرايدى دەپ جوسپارلانۋدا.

ا. مامين كونگرەسس- حولل، وقۋشىلار سارايى، اكىمدىكتىڭ كەڭسەلەر عيماراتى، باسسەينى بار سپورت كەشەنى، 7 مىڭ ورىنعا شاقتالعان ستاديون، دراما تەاترى، وبلىستىق عىلىمي- امبەباپ كىتاپحانا، اتتراكسيوندارى بار قالالىق ساياباق، «ۇلى دالا ەلى» ورتالىعى جانە ق. ا. ياسساۋي مۋزەيى عيماراتتارىنىڭ قۇرىلىس الاڭدارىن ارالادى، سونداي- اق ۇلى جىبەك جولى ۇلتتىق قولونەرشىلەر ورتالىعى مەن كەلۋ ورتالىعىنىڭ عيماراتتارىنىڭ قايتا جوندەلۋ بارىسىن تەكسەردى.

ۇكىمەت باسشىسى ءارقايسىسى 120 بولمەدەن بولاتىن «Rixos Turkestan» جانە «Hampton by Hilton» قوناق ۇيلەرىنىڭ، سونداي- اق «Sembol construction» تۇرىك كومپانياسى سالىپ جاتقان، ينۆەستيتسيا كولەمى 80 ميلليارد تەڭگەنى قۇرايتىن «كەرۋەن- ساراي» كوپفۋنكسيونالدى تۋريستىك كەشەنىنىڭ قۇرىلىسى بارىسىمەن تانىستى. بۇل قوناق ءۇي- تۋريستىك نىسانداردىڭ بارلىعىن بيىل پايدالانۋعا بەرۋ كوزدەلگەن.

«تۇڭعىش پرەزيدەنت - ەلباسى نۇرسۇلتان ءابىش ۇلى نازاربايەۆ جانە مەملەكەت باسشىسى قاسىم- جومارت كەمەل ۇلى توقايەۆ تۇركىستان قالاسىنىڭ دامۋىنا ەرەكشە كوڭىل بولەدى. بيىل كۇزدە مۇندا تۇركى تىلدەس مەملەكەتتەردىڭ ىنتىماقتاستىعى كەڭەسىنىڭ ءسامميتىن وتكىزۋ جوسپارلانعان. وسىعان وراي بارلىق قاجەتتى نىسانداردىڭ قۇرىلىسىنىڭ ۋاقىتىلى ءارى ساپالى اياقتالۋىن قامتاماسىز ەتۋ قاجەت» ، — دەدى ا. مامين.