پرەزيدەنتتىڭ گەرمانياعا جۇمىس ساپارى: بىرنەشە مەملەكەتتىڭ باسشىلارىمەن كەزدەسۋلەر وتكىزەدى

نۇر-سۇلتان. قازاقپارات - مەملەكەت باسشىسى قاسىم- جومارت توقايەۆ ميۋنحەن قالاسىنا (گەرمانيا) جۇمىس ساپارىمەن بارادى.

بۇل تۋرالى قازاقپارات ق ر پرەزيدەنتىنىڭ باسپا ءسوز حاتشىسى بەرىك ۋاليگە سىلتەمە جاساپ حابارلايدى.

«مەملەكەت باسشىسى قاسىم-جومارت توقايەۆ 14-16-اقپان ارالىعىندا قاۋىپسىزدىك جونىندەگى 56-ميۋنحەن كونفەرەنسياسىنا قاتىسۋ ءۇشىن ميۋنحەن قالاسىنا (گەرمانيا) جۇمىس ساپارىمەن بارادى. ساپار باعدارلاماسى بويىنشا پرەزيدەنت ميۋنحەن قاۋىپسىزدىك كونفەرەنسياسىنىڭ پانەلدىك پىكىرتالاسىنا قاتىسادى جانە بىرنەشە مەملەكەتتىڭ باسشىلارىمەن، حالىقارالىق ۇيىمداردىڭ، گەرمانيانىڭ ءىرى كومپانيالارىنىڭ جەتەكشىلەرىمەن، سونداي-اق، اكادەميالىق توپتاردىڭ وكىلدەرىمەن ءبىرقاتار ەكىجاقتى كەزدەسۋلەر وتكىزەدى دەپ جوسپارلانعان»، - دەپ جازادى بەرىك ءۋالي facebook پاراقشاسىندا.

اتالعان ءىس-شاراعا 40 قا جۋىق مەملەكەتتىڭ باسشىلارى، 100 دەن استام سىرتقى ىستەر جانە قورعانىس مينيسترلەرى، حالىقارالىق قاتىناستار سالاسىنداعى بەدەلدى ساراپشىلار قاتىسادى.

قاۋىپسىزدىك جونىندەگى ميۋنحەن كونفەرەنتسياسى - ەڭ ءىرى جاھاندىق بەيرەسمي فورۋمداردىڭ ءبىرى. كونفەرەنسيادا قازىرگى زاماننىڭ كوكەيتەستى سىن-قاتەرلەرى مەن قاۋىپتەرى تالقىلانادى.

ەسكە سالساق، قاسىم-جومارت توقايەۆ ميۋنحەن قاۋىپسىزدىك كونفەرەنسياسىنا قاتىساتىندىعىن بۇعان دەيىن دە حابارلاعان بولاتىنبىز.