تۇركىستان قالاسى تۋرالى جاڭا فيلم شىقتى
وبلىستىق قوعامدىق دامۋ باسقارماسىنىڭ تاپسىرىسىمەن «ساق» كينوستۋدياسى تۇسىرگەن كينو- نوۆەللادا تۇركىستاندىقتار مەن قوناقتاردىڭ اراسىنداعى ءوزارا دوستىق قاتىناستار كەڭىنەن كورسەتىلگەن.
جاڭا تۋىندى ەلجاندىلىق، وتانسۇيگىشتىك، ءتول تاريحتى ارداقتاۋدى كورەرمەن بويىنا سىڭىرە وتىرىپ، ادەمى ءازىل-قالجىڭمەن تۇركىستاننىڭ وزىندىك ەرەكشەلىكتەرى كورەرمەن نازارىنا ۇسىنىلعان.
سالتاناتتى شاراعا قاتىسقان جاستار رەسۋرستىق ورتالىعى باسشىسىنىڭ مىندەتىن اتقارۋشى امالبەك ءومىرتاي اسەرلى ءفيلمدى جارىققا شىعارعان شىعارماشىلىق ۇجىمعا العىسىن ءبىلدىردى.
«تۇركى دۇنيەسىنىڭ رۋحاني استاناسى بولعان تۇركىستان قالاسى وبلىس ورتالىعى مارتەبەسىن الىپ، ۇلكەن تاريحي قادام جاسادى. وسىنداي تاريحي، ماڭىزدى كەزەڭدى باسىنان وتكىزىپ وتىرعان تۇركىستان قالاسى از ۋاقىتتىڭ ىشىندە جاڭاشا تۇلەپ، رۋحىن قايتا جاڭعىرتىپ، حالىقتىڭ كوز قۋانىشىنا اينالىپ وتىر» - دەدى امالبەك ءومىرتاي.
كينو نوۆەللادا كونە شاھاردىڭ وتپەلى كەزەڭىندەگى شىنايى ومىرىمەن قوسا، جاڭارعان قالانىڭ تىنىس- تىرشىلىگى ءتۇرلى مىسالدار ارقىلى باياندالادى.
ءتورت بولىمنەن تۇراتىن فيلمدەگى رولدەردى داۋرەن ابيەۆ، رۋلان نۇعمان، ساپارا ءالايداروۆا، لاۋرا ماقاشاۆا سومداعان. ال، فيلمنىڭ باس رەجيسسەرى نۋريددين پاتتەيەۆ پەن فۋرحات سايپوۆ.
