افريكانىڭ شىعىسىنداعى ەلدەردى شەگىرتكە قاپتادى

نۇر-سۇلتان. قازاقپارات – افريكانىڭ شىعىسىنداعى ەلدەردە شەگىرتكە قاپتاپ كەتتى. سالدارىنان ديقاندار وراسان زور شىعىنعا باتۋدا.

Africa news تەلەارناسىنىڭ حابارلاۋىنشا شەگىرتكە شابۋىلىنان اسىرەسە ەريترەيا، ەفيوپيا، ۋگاندا، كەنيا مەن سومالي قاتتى زارداپ شەگىپ وتىر.

كەيبىر ەلدەردە ءتىپتى توتەنشە جاعداي دا جاريالاندى. ماسەلەن، زيانكەستەر جاڭا كوكتەپ كەلە جاتقان ەگىس القاپتارىن وتاپ جاتىر. اقپارات كوزدەرىنىڭ حابارلاۋىنشا، الدىمەن ولار يەمەندە پايدا بولعان. وندا ماماندار قاناتتىلارعا قارسى دەر كەزىندە ۋ سەۋىپ ۇلگرمەگەندىكتەن زيانكەستەر كوبەيىپ وزگە ەلدەرگە تەز اۋىپ كەتكەن.

دومينيك بۋرگەن، ازىق- تۇلىك جانە اۋىل شارۋاشىلىق ۇيىمىنىڭ وكىلى:

- جاعدايدى رەتتەۋ ءۇشىن قازىردەن باستاپ ىسكە كىرىسۋ كەرەك. حالىقارالىق كومەك قاجەت دەپ ويلايمىن. شەگىرتكەمەن كۇرەسۋ ءۇشىن 76 ميلليون دوللار سۇرادىق. ونىڭ تەك 19-ىن عانا الدىق. دابىل قاقپاساق بۇل اپاتتىڭ زاردابى اۋىر بولۋى مۇمكىن. حالىقارالىق بىرلەستىكتەر ماسەلەنىڭ قانشالىقتى قيىن ەكەنىن ءتۇسىنۋ كەرەك. جەرگىلىكتى حالىق اشتىققا ۇشىراسا، بۇل پروبلەمانى شەشۋ وڭايعا سوقپايتىن بولادى.

www.24.kz