قوردايداعى وقيعا: زورلىق- زومبىلىققا شاقىرۋ ءىسى بويىنشا تەرگەۋ باستالدى

نۇر-سۇلتان. قازاقپارات - قورداي قاقتىعىسىنا قاتىستى جالعان اقپارات تاراتقان ءۇش ازاماتتىڭ جەكە تۇلعاسى انىقتالدى. بۇل تۋرالى باس پروكۋرورىنىڭ ورىنباسارى بولات دەمبايەۆتىڭ ۆەدومستۆونىڭ رەسمي سايتىندا جاريالانعان مالىمدەمەسىنەن بەلگىلى بولدى.

اتاپ ايتساق، 30 جانە 33 جاستاعى الماتىنىڭ ەكى تۇرعىنى فەيسبۋك جەلىسىندە زورلىق- زومبىلىق جاساۋعا ۇندەگەن. سونداي- اق 37 جاستاعى تاراز قالاسىنىڭ تۇرعىنى وسى سىندى ۇندەۋدى WhatsApp مەسسەندجەرى ارقىلى تاراتقان كورىنەدى.

ءىستىڭ ناسىرعا شابۋىنا ىقپال جاساعانى ءۇشىن بۇل ازاماتتاردىڭ ۇستىنەن قىلمىستىق كودەكستىڭ 272-بابىنىڭ 3-بولىگى، ياعني ازاماتتاردى زورلىق- زومبىلىققا شاقىرۋ ءىسى بويىنشا سوتقا دەيىنگى تەرگەۋ باستالدى. باس پروكۋراتۋرا قازاقستاندىقتاردى جاعدايدى ۋشىقتىرۋدى كوزدەيتىن اقپاراتقا سەنبەۋگە جانە وسى سىندى مالىمدەمەلەردى تاراتپاۋعا شاقىرادى.

www.24.kz