قازاقستاندا ۋران ءوندىرۋشى كومپانيالارعا جاڭا مىندەتتەر جۇكتەلمەك

نۇر- سۇلتان. قازاقپارات - قازاقستان ۋران ءوندىرۋشى كومپانيالارعا جاڭاشا مىندەتتەمە جۇكتەگەلى وتىر، دەپ حابارلايدى قازاقپارات ءتىلشىسى.

ادىلەت مينيسترلىگىندە وتكەن ۆەدومستۆوارالىق كوميسسيا وتىرىسىندا ماجىلىسمەندەر كوتەرگەن «ق ر جەر قويناۋى جانە جەر قويناۋىن پايدالانۋ» كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ ۋران ءوندىرۋ ماسەلەسى بويىنشا بولىگى قارالدى.

«ءبىز ۋران قورى بويىنشا الەمدە كوشباسشىمىز. سول سەبەپتى ينۆەستورلار بىزگە كەلگەندە زاڭنامالىق تالاپتار ايقىن رەتتەلىپ تۇرۋ كەرەك. ۋران ءوندىرۋ كەلىسىمشارتىنىڭ مەرزىمىن ۇزارتۋ ماسەلەسى ينۆەستورلار ءۇشىن وتە ماڭىزدى. ءبىراق كەلىسىمشارت مەرزىمىن ۇزارتۋ - ينۆەستيتسيالىق مىندەتتەمەلەر اياسىندا ىسكە اسۋى ءتيىس دەپ تالاپ قويىپ وتىرمىز. سەبەبى ينۆەستورلار ۋران وندىرىلەتىن وڭىرلەردەگى حالىقتىڭ رادياتسيالىق قاۋىپسىزدىگى مەن قورشاعان ورتا تازالىعىنا عانا ەمەس، ايماق ەكونوميكاسىنىڭ دامۋىنا، قوسىمشا جۇمىس ورىندارىنىڭ اشىلىپ، الەۋمەتتىك ينفراقۇرىلىمنىڭ قالىپتاسۋىنا كوڭىل ءبولۋى كەرەك» ، - دەدى ق ر پارلامەنت ءماجىلىسىنىڭ ەكولوگيا جانە تابيعات پايدالانۋ ماسەلەلەرى بويىنشا كوميتەت مۇشەسى يرينا ۋنجاكوۆا ۆەدومستۆوارالىق كوميسسيانىڭ وتىرىسىنان كەيىن تىلشىلەرگە.

ونىڭ ايتۋىنشا، 2019 -جىلدىڭ 1 -قاڭتارىنداعى زاڭ تالابى بويىنشا جەر قويناۋىن پايدالانۋشىلار ۋران قورى العاش كورسەتىلگەن مولشەردەن كوپ ەكەنى انىقتالعان جاعدايدا كوممەرتسيالىق بونۋس رەتىندە ارتىق قوردىڭ ءبىر پايىزىنا تەڭ تولەم اۋدارۋ كەرەك. جاڭادان ۇسىنىلىپ وتىرعان زاڭ تالابىندا بۇل بونۋس ءالى ناقتىلانباعان. ءبىراق بۇل تالاپ ۋران قورى باستاپقى مولشەردەن 30 پايىزعا پايىز ارتىق بولعاندا عانا اۋدارىلادى.

ال ەنەرگەتيكا ۆيتسە- ءمينيسترى اسەت ماعاۋوۆتىڭ ايتۋىنشا، بۇرىن ۋران كەنىشىنەن قوسىمشا قور تابىلسا، سالىق ورگاندارى كوممەرتسيالىق بونۋستى تالاپ ەتىپ كەلگەن كورىنەدى. ال قوسىمشا قوردىڭ بارى دالەلدەنبەسە، شىققان شىعىندى ەشكىم قايتارمايتىن.

«ەندى بارلاۋ كومپانيالارىن ىنتالاندىرۋ ءۇشىن بۇل بونۋستى الىپ تاستادىق. ونىڭ ورنىنا ەلەۋلى مولشەردە قوسىمشا كەن تابىلسا، ينۆەستور بەلگىلى ءبىر پايىزىن جەرگىلىكتى ايماقتىڭ دامۋىنا باعىتتايتىن بولادى. وسىعان بايلانىستى ەندى ينۆەستور ءوز جوباسىمەن بىرگە ءوڭىردى دامىتۋعا قاتىستى جوسپارلارىن دا ۇسىنۋعا مىندەتتەلەدى. بۇل وزگەرىسكە ءبىرىنشى كەزەكتە مەملەكەت مۇددەلى» ، - دەيدى اسەت ماعاۋوۆ.