ەلىمىزدىڭ جەڭىل ونەركاسىپتەگى ءوندىرىس كولەمى جەدەل ءوسىپ كەلەدى
جەڭىل ونەركاسىپ سالاسىنىڭ ىشىندە، توقىما بۇيىمدارى ءوندىرىسى %8,7، كيىم-كەشەك ءوندىرىسى %5,2، سونداي-اق بىلعارى جانە وعان جاتاتىن ونىمدەر ءوندىرىسى %5,9 ءوسىم كورسەتتى.
«بۇل وسىمگە ماقتا تالشىعى، دايىن توقىما بۇيىمدارى، سىرتقى كيىم، اياق كيىم ءوندىرىسىن ۇلعايتۋ، سونداي-اق «بال تەكستيل» ج ش س كىلەم جانە كىلەم بۇيىمدارى ءوندىرىسى بويىنشا ءۇشىنشى سەحىن، «QazProdGroup» ج ش س اياق كيىم ءوندىرىسىن، «ЕKOHIM « ج ش س جىپتەر، سينتەتيكالىق جىپتەر، باۋلار، جەلىلەردى ءورۋ، ارقان-ءجىپ بۇيىمدارىن ءوندىرۋ جوبالارىن 2019 -جىلى ىسكە قوسۋ ەسەبىنەن بارلىق كىشى سالالارىندا بايقالدى»، دەلىنگەن حابارلامادا.
بۇگىنگى تاڭدا جەڭىل ونەركاسىپ سالاسىن دامىتۋ - باسىم باعىتتاردىڭ ءبىرى بولىپ وتىر. ويتكەنى، سالانىڭ حالىقتى جۇمىسپەن قامتۋدا الەۋمەتتىك ماڭىزى زور.
2015-2019 -جىلدارى يندۋستريالاندىرۋ كارتاسى اياسىندا جالپى سوماسى 19 ميلليارد تەڭگەنىڭ 22 جوباسى ىسكە قوسىلدى. 1 732 جۇمىس ورنى اشىلدى. جەڭىل ونەركاسىپ ءوندىرىسى كولەمى 2015 -جىلى 71,6 ميلليارد تەڭگە بولسا، 2019 -جىلى ول 112,7 ميلليارد تەڭگەگە جەتتى.
سونىمەن قاتار، «قاراپايىم زاتتار ەكونوميكاسىن» نەسيەلەۋ تەتىگى اياسىندا ەكىنشى دەڭگەيلى بانكتەر 6,6 ميلليارد تەڭگە سوماسىنا 30 جەڭىل ونەركاسىپ جوباسىن ماقۇلدادى.
«قازىرگى ۋاقىتتا جەڭىل ونەركاسىپ كاسىپورىندارىن قولداۋ ءونىم ەكسپورتىن دامىتۋ، ەڭبەك ونىمدىلىگىن ارتتىرۋدى ىنتالاندىرۋ، تاۋارلاردى ىشكى نارىققا ىلگەرىلەتۋ، «بيزنەستىڭ جول كارتاسى 2020« باعدارلاماسى سياقتى وڭدەۋ ونەركاسىبىن دامىتۋعا باعىتتالعان جۇيەلى شارالار شەڭبەرىندە كورسەتىلەدى. بۇدان باسقا، مينيستىرلىك جەڭىل ونەركاسىپتى دامىتۋ جونىندەگى 2019-2021 -جىلدارعا ارنالعان جول كارتاسىن ازىرلەپ، ونى ۇكىمەت ماقۇلدادى»، دەلىنگەن حابارلامادا.
جەڭىل ونەركاسىبىنىڭ تاۋارلارى 2019 -جىلعى 1-شىلدەدەن باستاپ مەملەكەتتىك ساتىپ الۋلار الدىن الا بىلىكتىلىك سۇرىپتاۋمەن كونكۋرس تاسىلىمەن وتكىزىلەتىن تاۋارلار، جۇمىستار مەن قىزمەتتەر تىزبەسىنە ەنگىزىلدى. مەملەكەتتىك ساتىپ الۋدا الدىن الا بىلىكتىلىك ىرىكتەۋدەن وتكەن كەزدە يندۋستريالىق سەرتيفيكات بەرۋ قاراستىرىلعان.
بۇدان بولەك، كيىم مەن اياق كيىمدى مىندەتتى تاڭبالاۋ جانە باقىلاۋ بويىنشا پيلوتتىق جوبا ىسكە قوسىلدى. قازىرگى ۋاقىتتا وسى باعىتتا جول كارتاسى مەن ادىستەمەلىك ۇسىنىستار ازىرلەندى.
«قازىر ماقتا- توقىما كلاستەرىن قۇرۋ بويىنشا جول كارتاسى ازىرلەندى. ول ماقتا تالشىعىن قايتا وڭدەۋدى 2 ەسە ۇلعايتۋدى كوزدەيدى. سونداي-اق جەڭىل ونەركاسىپ كاسىپورىندارى پايدالاناتىن شيكىزاتقا (ماتالار، جىپتەر، فۋرنيتۋرا جانە ت. ب. ) كەدەندىك اكەلۋ باجدارىن تومەندەتۋ ماسەلەسىن شەشۋ مىندەتى تۇر»، دەلىنگەن حابارلامادا.