شىر كوبەلەك اينالعان تۇستەر...

نۇر-سۇلتان. قازاقپارات - الەمدە ساۋلەتى ءبىر-ءبىرىن قايتالامايتىن ءسانى بولەك مەشىتتەردىڭ قاتارىندا يراننىڭ شيراز قالاسىندا ورىن تەپكەن ءناسىر مولك مەشىتىنىڭ ءجونى بولەك - ءوز الدىنا ءبىر توبە وزگەشەلىگىمەن، ورنەگىمەن باۋراپ الادى.

ءبىر باسىندا ءبىر ەمەس، بىرنەشە اتاۋى بار مەشىتتىڭ بۇل ەرەكشەلىگى دە، ياعني، ءتۇرلى اتاۋعا يە بولۋىنىڭ استارىندا دا اتالعان مەشىتتىڭ سان قىرلى ارتىقشىلىعى جاتىر. «تۇستەر مەشىتى»، «كەمپىرقوساق مەشىتى»، «قۇبىلمالى مەشىت»، ت. ب. مۇسىلمانداردىڭ قۇلشىلىق ءۇيى كۇن ساۋلەسىنەن قۇلپىرىپ، شىر كوبەلەك اينالا بيلەگەن ءداۋرىشتى كوز الدىڭا اكەلەدى. تۇستەر ءبيى... العاشقى كۇن ساۋلەسىنەن ءبىر عانا قىزىل تۇستەن مىڭداعان كوبەلەك ۇشىپ شىققانداي اسەرگە بولەيدى.

اتالعان عيبادات عيماراتىن تاڭدى تاڭعا ۇرىپ جىرلاۋعا بولادى. 1876 -جىلى ءناسىر مولك دەگەن اتپەن تانىمال مىرزا حاسان ءالى حان ەسىمدى پارسى پروۆينتسياسىنىڭ بيلەۋشىسىنىڭ پارمەنىمەن تۇرعىزىلعان مەشىت قۇرىلىسى 1888 -جىلى اياقتالادى. 2216 شارشى مەتر اۋماقتا الىپ جاتقان مەشىتتىڭ اجارىن اشاتىن ەلەمەنتتەر تەك تۇستەردەن تۇرمايدى، ونىڭ جابىنقىلارى الەمدە تەك وسى مەشىتتەن عانا كەزدەستىرە الاسىز.

ءبىر قىزىعى، بۇل مەشىتتىڭ كۇمبەزى جوق. ساۋلەتشى مۇحاممەد حاسان- ي- مەمار مەن مۇحاممەد رەزا قاشى پاز- ي- شيرازي ۆيتراجدى (مونۋمەنتالدى ونەر ءتۇرى، دەكوراتيۆتى ونەردىڭ بەينەلەۋ تۋىندىسى، ءتۇرلى ءتۇستى ورنەك سيپاتىندا كورىنىس تابادى) قولدانعاندىقتان مەشىتتىڭ ىشكى جاعى جارقىن تۇستەردەن قۇلپىرىپ، قۇبىلىپ كوز جاۋىن الادى.

حاس ونەر تۋىندىسىنا اينالعان مەشىتتىڭ بار سۇلۋلىعىن كورگىڭىز كەلسە، كۇز مەزگىلىنىڭ جانە قىستىڭ ورتا شەنىندە بارىڭىز - قيعاش كۇن ساۋلەسى شۇعىلادان شاشۋ شاشقان كورىنىسكە تاپ بولاسىز.

islam.kz