12:41, 10 - اقپان 2020 | GMT +6
ۇكىمەت كوميسسياسى قورداي وقيعاسىنان قازا تاپقان دارحان ءابدىراحىمنىڭ وتباسىنا باردى
قورداي. قازاقپارات - ۇكىمەت كوميسسياسى ءالجان اپا اۋىلىندا قورداي اۋدانىندا بولعان قايعىلى وقيعا سالدارىنان قازا تاپقان دارحان ءابدىراحىمنىڭ وتباسىنا باردى.
بۇل تۋرالى قازاقپارات primeminister.kz سىلتەمە جاساپ حابارلايدى.
پرەمەر-ءمينيستردىڭ ورىنباسارى بەردىبەك ساپاربايەۆ پەن جامبىل وبلىسىنىڭ اكىمى اسقار مىرزاحمەتوۆ ەل باسشىلىعىنىڭ اتىنان ونىڭ تۋعان-تۋىستارى مەن جاقىندارىنا كوڭىل ايتىپ، قولداۋ ءبىلدىردى.
بەردىبەك ساپاربايەۆ دارحاننىڭ قازا تابۋىنا كىنالىلەر انىقتالىپ، زاڭ بويىنشا جازالاناتىنىنا سەندىردى.
«پرەزيدەنت قاسىم-جومارت توقايەۆتىڭ اتىنان مارقۇمنىڭ وتباسى مۇشەلەرىنە كوڭىل ايتامىز. بەرىك بولىڭىزدار. وتباسى ءۇشىن وسى قيىن كۇندەردە بەرىك بولۋ كەرەك. ءبىز كىنالىلەردى انىقتايمىز، ولار زاڭ بويىنشا جازالانادى»، — دەدى ول.
سونىمەن قاتار، ۆيتسە-پرەمەر قازا تاپقان ازاماتتىڭ وتباسىنا مەملەكەتتىك قولداۋ كورسەتىلەتىنىن، بارلىق قاجەتتى كومەكتىڭ بەرىلەتىنىن جەتكىزدى.