نيۋ-يوركتە مەيرامحانا اشقان قازاق قىزى: گولوۆكين مەن ديماشتىڭ جانكۇيەرلەرى بىزدەن تاماقتانادى
شەت ءتىلىن تەرەڭ مەڭگەرۋ ماقساتىندا مۇحيت اسىپ بارعان جەرلەسىمىز قازىرگى كۇنى ا ق ش-تا ءوز كاسىبىن دوڭگەلەتىپ وتىر. ميلليونداعان ادامداردىڭ ءبىر كورۋ ارمانىنا اينالعان الەمدىك مەگوپوليس نيۋ-يوركتە ءوز ءىسىن اشقان وتانداسىمىز قازاقپارات تىلشىسىمەن تىلدەسكەن بولاتىن.
«مەن قاراعاندى قالاسىنىڭ تۋماسىمىن. سوندا تۋىپ-ءوسىپ، اعىلشىن ءتىلى ماماندىعىن يگەرگەن سوڭ، ءتىل مەڭگەرۋدى جەتىلدىرۋ ماقساتىندا 2011 -جىلى نيۋ- يورككە (ا ق ش) كەلدىم. قالا ماعان بىردەن ۇنادى، سودان قالامىن دەپ شەشتىم. ا ق ش-تاعى وقۋىمدى ءبىتىرىپ، قازاقستانعا كەلگەن سوڭ، كوپ ۇزاماي امەريكاعا ارمان قۋالاپ قايتا كەلدىم.
ول كەزدە مەن مۇندا ەشكىمدى بىلمەدىم، ەشقانداي تانىس-تۋىسىم بولمادى. كەلە سالا جۇمىس ىزدەۋگە كىرىستىم. وسىندا سىرتتان كەلگەندەردىڭ كوبىسى «ەڭ باستىسى جۇمىسقا تۇرسام بولدى، كىم بولىپ ىستەگەنىم ماڭىزدى ەمەس» دەيدى.
ياعني بالا كۇتۋشى، ءۇي قىزمەتشىسى، ىدىس جۋۋشى جانە تاعى باسقا جۇمىستار. مەن وزىمە بىردەن كەڭسەدە جۇمىس ىستەيتىن بولامىن دەپ ماقسات قويدىم، كوپ ۇزاماي جىلجىمايتىن مۇلىك كومپانياسىنا حاتشى بولىپ جۇمىسقا ورنالاستىم»، - دەدى فاريدا عابباسوۆا.
سونداي-اق، جەرلەسىمىز نيۋ-يوركتە كەزدەستىرگەن جىگىتىنە تۇرمىسقا شىققان.
«جولداسىم يتاليالىق. تانىستىقتان كەيىن كوپ ۇزاماي جارتى جىلدىڭ ىشىندە وتاۋ قۇردىق. جۇمىس ىستەپ ءجۇرىپ، بالا كۇنگى ارمانىمدى ورىنداۋ ماقساتىندا ءسان جانە ديزاين ۋنيۆەرسيتەتىنە وقۋعا ءتۇستىم. وسى سالانى تەرەڭىرەك تانۋ ءۇشىن، ءسان ءۇيى ديرەكتورىنىڭ كومەكشىسى (اسسيستەنت) بولىپ جۇمىسقا تۇردىم. سول كەزدەن باستاپ كۇنى بۇگىنگە دەيىن سول جەردە جۇمىس ىستەيمىن.
قازىرگى كۇنى بۇكىلالەمدىك تانىمال جەلى «Orient Craft LTD» كومپانياسىنىڭ ا ق ش-تاعى وكىلدىگىنىڭ جەتەكشىسىمىن. ءبىز H- M، ZARA جانە تاعى باسقا تانىمال برەند كيىمدەردىڭ ديزاينىن جاسايمىز. كومپانيادا جۇمىس ىستەپ ءجۇرىپ، ماعان ءوز مەيرامحانامدى اشۋ يدەياسى كەلدى. 2015 -جىلى مانحەتتەننەن عيمارات ساتىپ الىپ، ءوز مەيراحانامدى اشتىم، بۇل ىسكە ىنىمدە كومەكتەستى. باسىندا ءبىز تەك امەريكالىق اس ءمازىرىن ۇسىنۋدى ءجون سانادىق، ول ءۇشىن ارنايى باس اسپاز جالدادىق، ءبىزدىڭ جالداعان باس اسپاز كەزىندە بەلگىلى اكتەر روبەرت دە نيروعا جۇمىس ىستەگەن بولىپ شىقتى. دەگەنمەن ۋاقىت وتە كەلە ول ويدان باس تارتتىق. سەبەبى امەريكالىقتاردى ءوز اسحاناسىمەن تاڭ قالدىرا المايسىڭ، ونىڭ ۇستىنە مۇندا باسەكەلەستىك جوعارى»، - دەيدى ول.
ۋاقىت وتە كەلە وتانداسىمىز مەيرامحاناعا كەلگەن مەيماندارعا پالاۋ، ءمانتى، سامسا تاعامدارىن ۇسىنا باستاعان.
«ءبىر قىزىعى امەريكالىق اس مازىرىنەن گورى، ءبىزدىڭ ورتاازيالىق تاعامدارعا دەگەن سۇرانىس ارتا باستادى. سونى بايقاعان ءبىز، مەيرامحانانى ۋاقىتشا جوندەۋگە جاۋىپ، 2018 -جىلى تازا شىعىس اسحاناسى ەتىپ، اتاۋىن «Farida» Central Asian Cuisine and Grill دەپ وزگەرتىپ قايتا اشتىق. شىعىس اسحاناسىنا كوشكەن سوڭ، ءبىز شىعىس تاعامدارىن ازىرلەي الاتىن اسپازداردى ىزدەدىك، قازىرگى كۇنى ءبىزدىڭ اسپازداردىڭ بارلىعى ورتالىق ازيا ەلدەرىنىڭ وكىلدەرى. اس مازىرىنە كەلسەك، ارينە ەتتەن باستاپ، باۋىرساق، ءسۇتتى ءشاي ءبارى بار. ۇلتتىق تاعامىمىزدى قولعا العان ساتتەن باستاپ، بىزگە كەلۋشىلەردىڭ دە سانى ارتا باستادى. بۇگىندە ءبىزدىڭ مەيرامحانادان جۇرتتار كەزەككە تۇرىپ تۇسكى نەمەسە كەشكى اس ىشەدى»، - دەدى ف. عابباسوۆا.
ونىڭ ايتۋىنشا، قازاقتىڭ ۇلتتىق تاعامدارىنىڭ ءدامىن تاتقان شەتەلدىكتەر قازاقستانعا قىزىعۋشىلىق تانىتىپ، تۋريست رەتىندە بارعىسى كەلەدى ەكەن.
«قازاقستانعا بارىپ كەلگەن امەريكالىقتار «ەلدەرىڭىزدە بولدىق، تاعامدارى وتە ءدامدى» دەپ ىقىلاسىن ءبىلدىرىپ، بىزدەن تاماقتانىپ تۇرادى. ال ەلىمىزدە بولىپ كورمەگەن ءبىراق ءبىزدىڭ ۇلتتىق تاعامنىڭ ءدامىن تاتىپ كورگەن امەريكالىقتار قازاقستاندى كورۋدى ارماندايدى. ودان بولەك، اتاقتى جەرلەستەرىمىز گەنناديي گولوۆكين مەن ديماش قۇدايبەرگەننىڭ جانكۇيەرلەرى بىزگە كەلىپ تاماقتانادى. ديماشتىڭ نيۋ- يوركتەگى كونسەرتىنەن سوڭ قىزىق وقيعا بولدى. ونىڭ وسىنداعى جانكۇيەرلەرى ءبىزدىڭ مەيرامحاناعا ارنايى كەلىپ، ديماشتىڭ جانە جالپى قازاق حالقىنىڭ قانداي تاعام جەيتىنىن سۇراپ، وزدەرى دە سول اسقا تاپسىرىس بەردى. ءتىپتى ولار ءۇشىن تەلەديداردان ارنايى ديماشتىڭ كونسەرتىن قوسىپ قويدىق»، - دەيدى ا ق ش-تاعى جەرلەسىمىز.
جەرلەسىمىزدىڭ سوزىنە سەنسەك، قازاقتىڭ ۇلتتىق تاعامىن ۇسىناتىن مانحەتتەن (نيۋ-يورك) تورىندەگى مەيرامحانا قالاداعى ۇزدىك توپ-20 مەيرامحانا قاتارىنا كىرەدى.
«جۋىردا ۇلكەن تاپسىرىس الدىق. ناقتى ايتقاندا، وسى اقپان ايىندا لوس- اندجەلەستەن امەريكالىق ستۋدەنتتەر توبى كەلەدى. بەلگىلى بولعانداي، ستۋدەنتتەر ورتالىق ازيا حالىقتارىنىڭ ءتول مادەنيەتىن زەرتتەۋدە. ونىڭ ىشىندە قازاقستاندا بار. ستۋدەنتتەر ءبىزدىڭ مەيرامحانا تۋرالى ءبىلىپ، قازاقتىڭ ۇلتتىق مادەنيەتىمەن قاتار، اسحاناسىمەن تانىسۋ ماقساتىندا كەلە جاتىر»، - دەيدى ول.
سونىمەن قاتار، ف. عابباسوۆا وزگە ەلدە ءوز ءىسىن اشقىسى كەلەتىن جاندار ءۇشىن كەڭەسىن ايتىپ، بولاشاققا جوسپارىمەن ءبولىستى.
«ءبىزدىڭ العا قويعان ماقسات- جوسپارىمىز كوپ، اتاپ ايتساق جۋىردا نيۋ-يوركتە ەكىنشى مەيرامحانا اشقالى جاتىرمىز. سەبەبى، ءبىزدىڭ تۇراقتى تۇتىنۋشىلارىمىزدىڭ سانى كۇن ساناپ ارتۋدا، سوندىقتان ەكىنشى ورىندى اشقىمىز كەلەدى. ودان بولەك، اقش بويىنشا فرانشيزا اشۋدى جوسپارلاپ وتىرمىز، ءبىزدىڭ ماقسات - ەل نارىعىن تۇگەل قامتۋ. ال شەت ەلدە ءوز كاسىبىن دوڭگەلەتكىسى كەلەتىن ازاماتتارعا ايتارىم، ءسىز ۇسىناتىن ءونىم نەمەسە تاۋار ەرەكشە بولۋى قاجەت. سەبەبى، ءسىز ءقازىر نارىقتا بار دۇنيەنى ۇسىنساڭىز وعان ەشكىم قىزىقپايدى. سونىمەن قاتار، ەرەكشە ءىسىڭىزدىڭ ۇزدىگى بولۋىڭىز كەرەك»، - دەپ اتاپ ءوتتى ول.