قازاق سايتتارى ءبىر-بىرىنە ۇقساپ كەتتى - ايدوس سارىم

نۇر-سۇلتان. قازاقپارات - بۇرىن ب ا ق-تى ءتورتىنشى بيلىك دەسە، قازىر «ب ا ق - بەسىنشى، التىنشى بيلىك» دەگەن ۇعىم پايدا بولدى.

بۇل تۋرالى ەلوردادا وتكەن قازاق ءتىلدى ونلاين كونتەنت جاساۋشىلاردىڭ ІV فورۋمىندا ايتىلدى، دەپ حابارلايدى قازاقپارات ءتىلشىسى.

«بۇرىن ب ا ق-تى ءتورتىنشى بيلىك دەسە، قازىر «ب ا ق - بەسىنشى، التىنشى بيلىك» دەگەن ۇعىم پايدا بولدى. بەسىنشى بيلىك - الەۋمەتتىك جەلى بولسا، التىنشى بيلىك - مەسسەندجەر. ءبىز وسىنىڭ بارىنە بەيىمدەلە الماي جاتقان سياقتىمىز»، - دەيدى ايدوس سارىم.

ول قازاق باسپا ءسوزى ءوزىن-ءوزى شەكتەپ كەلە جاتقانىن ايتتى.

«مەنىڭ ويىمشا، قازاق باسپا ءسوزى ءوزىن-ءوزى شەكتەيدى، ەكىنشىدەن بيلىككە تاۋەلدى، ۇشىنشىدەن قوعامدىق پىكىرگە تاۋەلدى. ءبىز تەك لايك جينايتىن، وزەكتىلىگى جوق ماسەلەلەر تۋرالى جازامىز. ءداستۇرلى باسپا ءسوز (گازەت - اۆت. ) ينتەرنەتپەن جارىسا المايتىندىقتان، تەرەڭ ساراپتامالىق ماقالالار جازۋى كەرەك»، - دەيدى ول.

سونداي-اق، ول قازاق ءتىلدى سايتتار ءبىر-بىرىنە ۇقساپ كەتكەنىن ايتتى.

«قازىر قازاق باسپا ءسوزىنىڭ ءيىسى دە قالماعان سياقتى. قازاق گازەتتەرى دە، سايتتارى دا ءبىر-بىرىنە ۇقساپ كەتتى. ءبىزدىڭ باسپا سوزدە ساياسي رەڭ پايدا بولىپ، وڭشىل گازەتتەر، سولشىل گازەتتەر، ورتا تاپتىڭ ماسەلەسىن كوتەرەتىن گازەت، سايتتار پايدا بولسا دەيمىن. قازاق كوبىنەسە سولشىل قوعام، بىزگە قازىر وڭعا بۇرىلىس كەرەك. قوعام اراسىندا جاڭا يدەيا، جاڭا پىكىرتالاستارعا جول اشۋ - ءوز قولىمىزداعى نارسە»، - دەيدى ساياساتتانۋشى.