ەلوردانىڭ ىرگەسىندەگى كۇن ەلەكتر ستانساسى سالىنىپ بىتۋگە تايادى

None
None
كوكشەتاۋ. قازاقپارات - بيىل ناۋرىز ايىندا اقمولا وبلىسىندا كۇننەن ەنەرگيا وندىرەتىن قۋاتى 100 مۆت ەلەكتر ستانساسى سالىنىپ بىتەدى.

بۇل تۋرالى جۋرناليستەرمەن كەزدەسكەن سەلينوگراد اۋدانىنىڭ اكىمى ءمالعاجدار تاتكەيەۆ ايتتى، دەپ حابارلايدى قازاقپارات ءتىلشىسى.

اۋدان اكىمىنىڭ ايتۋىنشا، جوبا قازاقستان مەن رەسەي ارىپتەستىگىنىڭ ايماقارالىق 16-فورۋمىندا قول قويىلعان مەموراندۋم شەڭبەرىندە جۇزەگە اسىرىلىپ جاتىر.

«كۇننەن ەنەرگيا وندىرەتىن قۋاتى 100 مۆت ەلەكتر ستانساسىنىڭ قۇرىلىسى قابانباي باتىر اۋىلىندا جۇرگىزىلۋدە. «حەۆەل قازاقستان» سەرىكتەستىگى قولعا العان جوبانىڭ قۇنى 30 ميلليارد تەڭگەنى قۇرايدى. جوبانى بيىلعى جىلدىڭ ناۋرىز ايىندا جۇزەگە اسىرۋ جوسپارلانعان»، - دەدى ءمالعاجدار تاتكەيەۆ.

جاڭا كۇن ەلەكتر ستانساسى بالامالى ەنەرگيا كوزىن 40 پايىزعا دەيىن ارتتىرۋعا مۇمكىندىك بەرەدى. سونىمەن قاتار، 30 ادامعا جۇمىس ورنى اشىلىپ، قورشاعان ورتانىڭ لاستانۋىن ازايتۋعا سەپتىگىن تيگىزبەكشى.

ايتا كەتەيىك، اۋداننىڭ 2019-جىلعى الەۋمەتتىك-ەكونوميكالىق دامۋىنىڭ قورىتىندىسى بويىنشا جەرگىلىكتى بيۋجەتتىڭ كىرىسى 29 ميلليارد تەڭگەنى قۇرادى. اۋدان ەكونوميكاسىن دامىتۋ ءۇشىن 67,3 ميلليارد تەڭگە ينۆەستيتسيا تارتىلدى. وسىنىڭ ناتيجەسىندە ونەركاسىپ ونىمدەرىنىڭ كولەمى 35,7 ميلليارد تەڭگەگە جەتتى.

اۋداندا جالپى قۇنى 6,3 ميلليارد تەڭگەنى قۇرايتىن 6 ينۆەستيتسيالىق جوبا جۇزەگە اسىرىلۋدا. كەلەشەكتە بۇل جوبالاردى كاسىپكەرلىكتى دامىتۋ كارتاسىنا ەنگىزۋ جوسپارلانعان.

سوڭعى جاڭالىقتار