سوورونباي جەەنبەكوۆ قىرعىزستاندىقتاردى قىتايدان ەۆاكۋاتسيالاعانى ءۇشىن قازاقستانعا العىس ءبىلدىردى

نۇر- سۇلتان. قازاقپارات – ق ر پرەزيدەنتى قاسىم- جومارت توقايەۆ قىرعىزستان باسشىسى سوورونباي جەەنبەكوۆپەن تەلەفون ارقىلى سويلەستى. قازاقپارات بۇل تۋرالى اقورداعا سىلتەمە جاساپ حابارلايدى.

مەملەكەتتەر باسشىلارى قازاق- قىرعىز ستراتەگيالىق سەرىكتەستىگى مەن وداقتاستىق قاتىناستاردىڭ قازىرگى احۋالىن جانە ونى ودان ءارى نىعايتۋدىڭ پەرسپەكتيۆالارىن تالقىلادى.

اڭگىمەلەسۋ بارىسىندا قازاقستان پرەزيدەنتىنىڭ 2019 -جىلعى قاراشادا قىرعىز رەسپۋبليكاسىنا جاساعان مەملەكەتتىك ساپارىنىڭ قورىتىندىلارى بويىنشا قول جەتكىزگەن ۋاعدالاستىقتاردى ساپالى جۇزەگە اسىرۋ قاجەتتىگى ايتىلدى.

تاراپتار كەدەن بەكەتتەرىندەگى جۇك تاسىمالى راسىمدەرىن جەڭىلدەتۋ ماقساتىندا تسيفرلىق تەحنولوگيا سالاسى بويىنشا ىقپالداستىق ورناتۋ ماسەلەسىن قاراستىردى.

قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ قاسىم- جومارت توقايەۆقا قازاقستاننىڭ ۋحان (ق ح ر) قالاسىنان قىرعىز ازاماتتارىن ەۆاكۋاتسيالاۋعا كورسەتكەن كومەگى ءۇشىن العىس ءبىلدىردى.

تەلەفون ارقىلى سويلەسۋگە قىرعىز تاراپى باستاماشى بولدى.

ەسكە سالايىق، 2 - اقپاندا قازاقستان رەسپۋبليكاسى ازاماتتارىنىڭ دەنساۋلىق قاۋىپسىزدىگىن قامتاماسىز ەتۋ ماقساتىندا ق ر د س م ۇلتتىق شۇعىل مەديتسينا ۇيلەستىرۋ ورتالىعى ق ح ر- دىڭ ۋحان قالاسىندا جۇرگەن 83 قازاقستاندىقتى، ونىڭ ىشىندە 80 ستۋدەنتتى ەلگە جەتكىزدى.

وسى كۇنى سونداي- اق ارنايى بورتپەن نۇر- سۇلتان قالاسى ارقىلى 18 قىرعىز ستۋدەنتى بىشكەككە جەتكىزىلدى. «ولار اۋەجايدا ءتيىستى تەكسەرۋدەن وتكىزىلىپ، بىشكەك قالاسىنىڭ ماڭىنداعى اۋرۋحاناعا جاتقىزىلدى» ، - دەپ ءمالىم ەتكەن بولاتىن قازاقستاننىڭ دەنساۋلىق ساقتاۋ مينيسترلىگىنەن.