داۋرەن ابايەۆ ساۋد ارابياسىنىڭ يسلام مينيسترىمەن جات اعىمداردان جاپا شەككەندەردى وڭالتۋ ماسەلەسىن تالقىلادى

ەر-رياد. قازاقپارات - قازاقستان رەسپۋبليكاسىنىڭ اقپارات جانە قوعامدىق دامۋ ءمينيسترى داۋرەن ابايەۆ ساۋد ارابياسى كورولدىگىنىڭ يسلام ءمينيسترى ابدەل لاتيف ءال-شەيحپەن ءدىني جات اعىمداردان جاپا شەككەن ازاماتتاردى وڭالتۋ ماسەلەسىن تالقىلادى، دەپ حابارلايدى قازاقپارات ءتىلشىسى مينيسترلىكتىڭ باسپا ءسوز قىزمەتىنە سىلتەمە جاساپ.

اتالمىش ماسەلە تالقىلانعان كەزدەسۋ 2020-جىلدىڭ 2- اقپانىندا ەر-رياد قالاسىندا ءوتتى.

داۋرەن ابايەۆ قازاقستان ساۋد ارابياسىنىڭ بۇكىل الەمدە يسلامنىڭ ءرولىن نىعايتۋعا، ءدىننىڭ شىنايى، بەيبىتشىلىكتى سۇيگىش ءمانىن ناسيحاتتاۋعا باعىتتالعان كۇش-جىگەرىن جوعارى باعالايتىنىن اتاپ ءوتتى.

«ءبىز ساۋد ارابياسىنىڭ بۇگىن دە راديكالدى ەكسترەميزم مەن تەرروريزمگە قارسى ىمىراسىز كۇرەس جۇرگىزىپ جاتقانىنان حاباردارمىز. قازاقستان ءارقاشان تەرروريزمنىڭ بارلىق فورماسى مەن كورىنىستەرىندە ايىپتاپ كەلەدى. سونىمەن بىرگە حالىقارالىق قاۋىمداستىقتىڭ وسى قۇبىلىستى جويۋ ءۇشىن ءتيىمدى ۇجىمدىق كۇش-جىگەردىڭ جۇمسالۋىن قولدايدى»، - دەپ سەندىردى مينيستر.

شەيح ابدەل لاتيف ءال-شەيح ساۋد ارابياسى كورولدىگى مەن قازاقستان رەسپۋبليكاسى اراسىنداعى باۋىرلاستىق قاتىناستاردىڭ تەرەڭدىگى مەن بەرىكتىگىن ەرەكشە اتاپ ءوتىپ، كورولدىكتىڭ يسلام ءدىنى كەڭ تارالعان ەلدەردەگى باۋىرلاستارىمەن قارىم-قاتىناستى جوعارى باعالايتىنىن اتاپ ءوتتى.

«مەيىرىمدى ءارى ادىلەتتى يمام سالمان بين ابدەل ءازيز ءال ساۋد جانە ونىڭ مۇراگەرى - مارتەبەلى حانزادانىڭ باسشىلىعىنداعى كورولدىك بۇكىل الەمدەگى مۇسىلمانداردىڭ مۇددەلەرىن ەسكەرىپ، يسلامى دۇشپاندارى بولىپ تابىلاتىن ەكسترەميستەر مەن تەرروريستەردىڭ زياندى اسەرىنەن قورعاۋ ءۇشىن قولدان كەلگەننىڭ ءبارىن جاسايدى»، - دەدى شەيح.

تاراپتار رۋحاني جانە ءدىني سالاداعى ەكىجاقتى ىنتىماقتاستىقتى دامىتۋ جولدارى تۋرالى جانە يسلامنىڭ قازىرگى جاعدايىنىڭ وزەكتى ماسەلەلەرى بويىنشا پىكىر الماستى.

كەزدەسۋ قورىتىندىسى بويىنشا مينيسترلەر راديكالدى ءدىني اعىمداردىڭ الدىن-الۋ جونىندە، اتاپ ايتقاندا، حالىقتى ەكسترەميستىك ءدىني يدەولوگيانىڭ اسەرىنەن قورعاۋ بويىنشا ناسيحات جۇمىستارى ارقىلى تاجىريبە مەن اقپارات الماسۋعا كەلىستى.

ساۋد ارابياداعى ارىپتەستەردىڭ وزىق تاجىريبەلەرىن زەردەلەۋ اياسىندا داۋرەن ابايەۆ مۇحاممەد بەن نايف اتىنداعى وڭالتۋ ورتالىعىنىڭ قىزمەتىمەن تانىسىپ، قورعانىس مينيسترلىگىنىڭ جانىنداعى يدەولوگيالىق سوعىس ورتالىعىندا بولدى.

سونداي-اق، ەر-ريادتا داۋرەن ابايەۆ ساۋد ارابياسىنىڭ اقپارات ءمينيسترى تۋركي بين ابدۋللا ءال-شابانمەن كەزدەستى. مينيسترلەر ب ا ق سالاسىنداعى ىنتىماقتاستىقتىڭ كەلەشەگىن تالقىلاپ، ەكى ەلدىڭ ءىرى اقپاراتتىق اگەنتتىكتەرى «قازاقپارات» ح ا ا مەن «ساۋد ارابياسىنىڭ اقپاراتتىق اگەنتتىگى» اراسىندا مەموراندۋم جاساسۋعا كەلىستى.

اۆتور: ايان بەكەن ۇلى