سەرىك ءابىل ۇلى، كاسىبي ديكتور: ابايدان باستاپ قازاق كلاسسيكتەرىنىڭ اۋديوكىتابىن شىعارعىم كەلەدى

نۇر- سۇلتان. قازاقپارات - سەرىك ءابىل ۇلى قىتايداعى قازاق راديوسىندا ۇزاق جىلدار قىزمەت ەتىپ، سول ەلدەگى قانداستاردىڭ مادەنيەتىنە ەلەۋلى ۇلەس قوسقان تۇلعانىڭ ءبىرى.

ول قازاقتىڭ تاڭداۋلى 50 ءانىن قىتاي تىلىنە اۋدارتىپ، ۇلتىمىزدىڭ كەڭ تاراعان 500 كۇيى مەن 200 حالىق ءانىن تاسپاعا تۇسىرگەن، ونعا جۋىق كىتاپتىڭ، 100-گە جۋىق ءان ءماتىنى مەن كوپتەگەن ءاننىڭ اۆتورى، راديو ەفيرىندە 30-عا تارتا رومان وقىعان تانىمال ديكتور، اقىن، ءانشى، سازگەر. قۇلاققا جاعىمدى قازاقى قوڭىر داۋىس يەسى سەرىك ءابىل ۇلىنىڭ اتامەكەنگە ورالعانىنا دا كوپ بولعان جوق. وسىعان وراي، «قازاقپارات» ءتىلشىسى ارنايى سۇحباتتاسقان بولاتىن.

- ءسىز شيرەك عاسىرداي ۋاقىت قىتايداعى قازاق راديوسىندا قىزمەت اتقاردىڭىز. جالپى ەڭبەك جولىڭىزدى قالاي باستادىڭىز؟

- مەن ەڭ العاشقى ەڭبەك جولىمدى اۋداندىق مادەنيەت ۇيىنەن باستادىم. قاندا بار قاسيەتتەن شىعار، ونەرگە بالا كۇنىمنەن اۋەستەنىپ، باستاۋىش مەكتەپتە- اق ء«انشى بالا» اتانىپ، ەل كوزىنە تۇسە باستادىم. ورتا مەكتەپتە وقىپ جۇرگەندە اۋدان، ايماق، ءتىپتى ولكە كولەمىندەگى جارىستارعا دەيىن قاتىسىپ، جۇلدەلى ورىندار الىپ، كوپتىڭ القاۋىنا يە بولدىم.

ءسويتىپ، ورتا مەكتەپتى بىتىرگەن سوڭ- اق، ەش جەردە ارنايى كاسىپتىك ءبىلىم الماسامدا، اۋداندىق مادەنيەت ۇيىندە ءانشى بولىپ بىردەن قىزمەتكە قابىلداندىم. جۇمىس جولىم سولاي باستالىپ كەتتى. مادەنيەت ۇيىندە جۇرگەندە ادەبيەتكە جاقىن بولعاندىقتان بولار، گازەت- جۋرنالداردا ولەڭدەرىم جارىق كورسە، راديوعا «ەرىكتى ءتىلشى» دەگەن اتپەن اقپاراتتارىم جاريالانا باستادى. سونىمەن قاتار وبلىستىق، ايماقتىق ونەر بايقاۋلارىندا ءان، تەرمە ايتۋدان بىرنەشە مارتە باس جۇلدە الىپ، تانىمالدىعىم ارتا ءتۇستى.

ودان كەيىن ايماقتىق راديو- تەليەۆيزيا مەكەمەسىنە ديكتور جانە ءتىلشى بولىپ قىزمەتكە اۋىستىم. اتالعان ورىندا جۇرگەندە، ونەر جانە كاسىپتىك ءبىلىم جاعىنان پراكتيكالىق تاجىريبەلەرمەن العا ىلگەرىلەۋ بولسا دا، رەسمي ساۋاتىم ورتا مەكتەپتىك دەڭگەيدە عانا بولدى. سوندىقتان شىڭجاڭ ۋنيۆەرسيتەتىنىڭ فيلولوگيا فاكۋلتەتىنە سىرتتاي وقۋ بولىمىنە ءتۇسىپ، ەكى جارىم جىلدان كەيىن باكالاۆر دارەجەسىن الدىم. ءسويتىپ جۇرگەندە 1994 -جىلى شىڭجاڭ حالىق راديو ستانتسياسىنىڭ 2042 ۇمىتكەر قاتىسقان ديكتورلىق ەمتيحانىندا سىناقتان وتكەن 2 ادامنىڭ ءبىرى بولىپ، اتالعان راديوعا جۇمىسقا قابىلداندىم.

- ءبىر سۇحباتىڭىزدا ەڭ العاشقى اۋديوكىتاپتى مەن شىعاردىم دەگەن ەكەنسىز. سول تۋرالى تولىعىراق ەتىپ ايتىپ بەرسەڭىز...

- شىڭجاڭ حالىق راديو ستانسياسىنىڭ قىتاي، قازاق، ۇيعىر، موڭعول، قىرعىز تىلدەرىنە ورتاق «ادەبيەت، كوركەمونەر ءبولىمى» دەيتىن مادەني ءبولىم بار. سول بولىمگە 2000 -جىلى باسشىنىڭ ورىنباسارى بولىپ تاعايىندالدىم. بۇل وڭتايلى ءساتتى پايدالانىپ، 60-70-جىلداردا ءساتسىز تاسپالانعان نەشە جۇزدەگەن قازاق ءان-كۇيلەرىن قايتادان جاڭعىرتىپ، سوزدەرىن جاڭالاپ، رەتتەپ حالىقتىڭ جاقسى باعاسىن الدىق.

قىتايداعى ءار ۇلت راديولارىندا ءار كۇن سايىن جارتى ساعات ادەبي شىعارمالار (اڭگىمە، پوۆەست، رومان، ولەڭ، داستان، ت. ب، ) وقۋ دەگەن ءداستۇر بار. ول سوناۋ 80-شى جىلداردىڭ ورتاسىندا باستالعان. سودان ابايدىڭ 160 -جىلدىعىنا وراي «اباي جولى» رومانىن ءۇنتاسپاعا جازىپ، راديودا بەرۋگە كۇش سالدىق. ابايدى ول جاقتا شەتەلدىك اقىن دەپ «اباي جولىن» حالىققا ۇسىنۋ ءۇشىن كوپتەگەن قۇجاتتار دايىنداۋ كەرەك بولدى.

سوعان ءبىراز جۇگىرىپ، اقىرىندا 160 كۇنگە ءبولىپ، 80 ساعات وقىلعان ايگىلى روماندى حالىق يگىلىگىنە ۇسىندىق. كەيىننەن اباي تۋىندىلارى يۋنەسكو تىزىمىنە ەنگىزىلگەن سوڭ قىتاي دا مويىنداپ، «اباي جولى» راديودا 4-5 قايتالانا تاراتىلىپ، ەلدىڭ ەرەكشە ىقىلاسىنا بولەندى. بۇنى مەنىڭ ۇلى اقىننىڭ تۋىندىلارىن دارىپتەۋگە سىڭىرگەن ءبىر ەڭبەگىم دەۋگە بولادى. سودان كەيىن، راديودا وقىلار روماندار تىزىمىنە بىرتىندەپ «كوشپەندىلەر» تريلوگياسى، «ماحاببات قىزىق مول جىلدار» ، «مەنىڭ اۋەزوۆىم» سەكىلدى قازاقستاننىڭ ايگىلى جازۋشىلارىنىڭ شىعارمالارىن ەنگىزدىك.

ءبىر كۇنى ماعان ءبىر وي كەلدى. جالپى سوڭعى ۋاقىتتا كوپ ادام كىتاپ وقىعاندى قويا باستادى. ودان كەيىن قالىڭ قىتايشا وقىعان جاستار ءوسىپ كەلەدى. ال قاريالاردىڭ كىتاپ وقۋعا كوزدەرى شىدامايدى. سوندىقتان كوپشىلىگى تىڭداۋعا اۋەس ەكەنىن سەزىندىم. تىڭداۋ دەگەن ۋاقىت المايدى. زەرتتەپ كورسەم اۋديوكىتاپ دەگەن ءالى ەشقايدا شىقپاپتى. ءسويتىپ، ەڭ العاش رەت ورالحان بوكەيدىڭ «اتاۋ كەرە» پوۆەسىن شىعاردىم.

تۋرا سول كەزدە قازاقستاندىق تانىمال اقىن، باسپاگەر ەسەنعالي راۋشانوۆ بىزگە بارا قالدى. ەساعاڭمەن اقىلداسا كەلە، بەيجىڭنەن قازاقشا اۋديوكىتاپتار سەرياسىن شىعارايىق دەپ شەشتىك. العاشقى تىزىمگە «اتاۋ كەرە» مەن بىرگە اۋەزوۆتىڭ «اباي جولى»، ءابىش كەكىلبايەۆتىڭ «كۇي ءدارياسى»، سوسىن ابايدىڭ ولەڭدەرى ەندى. وسى اۋديوكىتاپ سەرياسى جوعارىدا اتالعان بىرنەشەۋىمەن شەكتەلىپ قالعان جوق. جازۋشى باتىرحان قۇسبەگيننىڭ «زۋقا باتىرى»، ەسەنبەرليننىڭ «كوشپەندىلەرى» ، زەينوللا قابدولوۆتىڭ «مەنىڭ اۋەزوۆىمى»، ءا. نۇرشايىقوۆ اتامىزدىڭ «ماحاببات قىزىق مول جىلدارى»، موڭعوليالىق جازۋشى سۇلتان تاۋكەيدىڭ «اقىر جانىبەگى»، شايسۇلتان قىزىردىڭ «بۇلاڭ دۇنيەسى»، «دابىلى»، ماعاز رازدان ۇلىنىڭ «التايدىڭ اقيىقتارى» جانە عاپپار ءبىلالدىڭ «عاسىرلىق قۋعىنى» سىندى 10 روماندى وقىپ، اۋديوكىتاپ ەتىپ شىعاردىق. وعان قوسا 20 ءبولىمدى راديو پەسا ءبىر البوم بولىپ تىڭدارمانىمەن قاۋىشتى.

- بۇل اۋديوكىتاپتاردى وقىعان ديكتورلار كىم ەدى؟

- اۋديوكىتاپتى تانىمال ديكتورلار مۇراتبەك تەسەبايەۆ، ەركىن ءابىش ۇلى، قانات ەرەجەپ ۇلى جانە مەن وقىدىم.

- جالپى ءوزىڭىز راديو ەفيرىندە قانشا رومان وقىدىڭىز؟

- مەن باسقا ادەبي تۋىندىلاردى(پوۆەست، اڭگىمە، راديو پەسا، ولەڭ ت، ب. ) قوسپاعاندا راديو ەفيرىنەن 30 عا جۋىق رومان وقىدىم.

- ءسىزدى بىلايعى جۇرت سازگەر دەپ جاتادى. قانشا مۋزىكالىق تۋىندىنىڭ اۆتورىسىز؟

- ءيا، مەن ءبىر ۇلكەن كومپوزيتسيالىق تۋىندىلار شىعارعان سازگەر ەمەسپىن. ءبىراق 30 عا تارتا ءان، 3-4 كۇي، وننان استام تەرمەنىڭ اۆتورىمىن. ودان بولەك 100 گە جۋىق ءان ماتىندەرىن جازدىم. سونداي-اق، «بەسىگىم»، «قۇلىن داۋىس»، «اقىت جىرلارى»، «باۋىرىم»، «اجەمنىڭ ءيىسى» قاتارلى ءوزىم ورىنداعان ءان كاسسەتالارىمدى كوپشىلىككە ۇسىندىم.

- كىتاپتارىڭىز دا از ەمەس سەكىلدى...

- 4 جىر جيناقتىڭ، 4 پۋبليتسيستيكالىق كىتاپتىڭ (ادەبي وچەركتەر، ەسسەلەر) اۆتورى اتاندىم. شىڭجاڭداعى تانىمال قازاق ونەر تۇلعالارىنىڭ ءومىرى مەن شىعارماشىلىعىن زەرتتەگەن «شولپان»، «سامال» اتتى ەكى كىتابىم جارىق كوردى. سونداي-اق ءوزىمنىڭ رۋحاني ۇستازىم تانىمال ديكتور مۇراتبەك تەسەبايەۆتىڭ ءومىرى جايلى «ءداريعا» دەگەن رومان-ەسسە جازىپ وقىرمانعا ۇسىندىم.

- بيىل ابايدىڭ 175 جىلدىق مەرەيتويى ەكەنىن بىلەسىز. ۇلى اقىننىڭ تۋىندىلارىن دارىپتەۋگە ءبىر كىسىلىك ۇلەس قوستىڭىز. سول تۋرالى ايتىپ بەرسەڭىز.

- 2017 -جىلى ءبىر كومپانيانىڭ قارجىلىق قولداۋىمەن ابايدىڭ قارا سوزدەرىن قىتايشا، ۇيعىرشا، قازاقشا ءۇش تىلدەگى نۇسقاسىن بەيجىڭنەن كىتاپ ەتىپ، اۋديو نۇسقاسىمەن قوسا شىعاردىق. قازاقشاسىن مەن وقىدىم، ۇيعىرشاسىن شىڭجاڭدىق ۇيعىر ديكتور دوسىما، ال قىتايشاسىن بەيجىڭدىك قىتاي ديكتورعا وقىتتىق. سول دەمەۋشىنىڭ قارجىسىمەن قازاقستاندىق قاسىم امانجول دەگەن جۋرناليستىڭ 10 ءبولىمدى «انىق اباي» دەرەكتى سەريالىن قوسا شىعاردىق. سونداي-اق، «اباي جولىن» اۋديوكىتاپ ەتتىك جانە قاراسوزدەرى مەن بىرگە ولەڭدەرىن ءوزىم وقىپ، حالىققا ۇسىندىق. بۇنى وزىمە اتاق جينايىن دەپ نەمەسە جەكە باستىڭ پايداسى ءۇشىن ىستەگەن جوقپىن. بۇل مەنىڭ دانىشپان اقىننىڭ ۇلى يدەيالارىن، ويلارىن دارىپتەۋدە ورىنداۋعا ءتيىستى ازاماتتىق پارىزىم دەپ ءبىلدىم.

- ونەردىڭ ءبارى ءبىر بويىڭىزدان تابىلادى. ءتىپتى دراماتۋرگيا سالاسىندا دا شىعارمالارىڭىز بار...

- دراماتۋرگيادا دەگەندە، راديو-پەسا جانرى بار عوي. ءوزى جاندى دۇنيە بولعان سوڭ ونى حالىق ءسۇيىپ تىڭدايدى ەكەن. سوندىقتان بۇل جانرعا مەندە كوپ قالام تەربەدىم. راديوعا جازۋشىلاردى شاقىرىپ، جىل سايىن جينالىس اشىپ، 20 جىلدا مىڭداعان ءبولىم راديو-تەاتردى ەفيردەن ۇسىندىق. سونىڭ ىشىندە مەن جازعانى وتىزدان استام بولدى.

- ءسىزدى دومبىرادا جاقسى وينايدى، كوپ كۇي بىلەدى دەپ تە ەستىگەن ەدىك...

- ارينە، كاسىبي دومبىراشى ەمەسپىن. الايدا 100 دەن اسا قازاق كۇيىن تولىققاندى ورىنداي الامىن. بۇل ەندى قاندا بار قاسيەت دەپ ايتۋعا بولادى. سەبەبى مەنىڭ اتا-بابالارىمنان كۇيشى، قوبىزشى، باقسى-بالگەر دەگەندەر كوپ شىققان ەكەن...

- «اق جاۋىن»، «سالتانات» سەكىلدى ءبىرقاتار تانىمال كۇيلەرگە ارنالعان ولەڭدەرىڭىز بار. اتالعان كۇيلەردى شەرتە وتىرىپ، ولەڭىن وقيدى ەكەنسىز. بۇنداي يدەيا قايدان پايدا بولدى؟

- كۇيگە ولەڭ جازۋدى جۇمەكەننەن ۇيرەندىم دەسەم بولاتىن شىعار. ءوزىم كۇي تارتام. كۇي بىتكەندى جۇرتتىڭ ءبارى تۇسىنە بەرمەيدى. مەن دارىندى ونەرپازدار تۋرالى كىتاپتار جازدىم دەدىم عوي. سوندا كەرەمەت كۇيشىلەرمەن بىرگە ءجۇرىپ، ولاردىڭ شىعارماشىلىعىن زەرتتەۋ بارىسىندا بۇعان كوزىم انىق جەتتى. كۇيدى اركىم ءوزىنىڭ مۋزىكالىق ساۋاتىنا، كوڭىل-كۇيىنە، تۇيسىگىنە قاراي قابىلدايدى. ورىنداۋشى تىڭدارمانعا شەرتكەن كۇيىنىڭ تاريحىن، مازمۇنىن سوزبەن تۇسىندىرە كەتۋدى ۇمىتپاسا، وندا كۇيدىڭ قۇدىرەتى ارتا تۇسەدى.

سوندىقتان مەن «اق جاۋىن»، «سالتانات» سىندى بىرنەشە تانىمال كۇيگە ولەڭمەن ورنەك سالدىم. كۇيدى تۇسىنە بەرمەيتىن ادامدار ولەڭىمنىڭ سوزىنەن شىعارمانىڭ تۇپكى ويىن بىلە الادى. وسى جەردە ايتا كەتەيىن، كۇي مەن ءاندى قولداۋ ماقساتىندا «كەرۋەن سازى»، «شاڭىراعىمىزدا شالقىعان اندەر» دەگەن اتپەن اۋديو تاسپادا (CD ديسكىمەن) 500 كۇي، 200 ءاندى 2015 -جىلى حالىققا ۇسىندىم. بۇلاردىڭ بارلىعى وڭايلىقپەن قولعا كەلە سالمادى. قارجىسىن تاپقاندا، ساياسي رۇقساتتار، قولداۋلار بولماسا ءبىر قادامعا العا جۇرە المايسىڭ. ءجانابىل سماعۇل ۇلى، نۇرلان ءابىلماجىن ۇلى سىندى ەل اعالارىنىڭ ەرەكشە قولداۋى ارقاسىندا بۇل ۇسىنعان يگىلىكتى جوبالارىمىز ىسكە استى. وسى اعالاردىڭ قولداۋى ارقاسىندا قازاق حالىق اندەرى، قازاقستان مەن قىتايداعى قازاق كومپوزيتورلارىنىڭ 50 تانىمال ءانىن قىتاي تىلىنە اۋدارىپ، قىتايدىڭ بەلگىلى انشىلەرىنە ورىنداتتىق.

جانە سول 50 انگە تولىقتاي بەينەبايان جاساتىپ، ميلليارد كورەرمەنگە ۇسىنۋعا مۇرىندىق بولدىم. ول كليپتەرگە سول ەلدەگى قازاق دالاسىن تۇسىردىك. شىڭجاڭداعى قازاقتاردىڭ اتاقونىسى سانالاتىن وڭىرلەرىمەن ۇلتىمىزدىڭ سالت-ءداستۇرىن دە ەنگىزدىك. ونداعى ماقسۇت بۇل كليپتەردى 50 جىلدان كەيىن كورسە دە، كليپكە ەنگەن جەرلەردىڭ ءتۇپ يەسى كىمدەر ەكەنىن ءبىلدىرۋ بولدى. قىتايشا نۇسقالارىن بۇكىل قىتايدىڭ ءار ولكەسىندەگى مادەنيەت ورتالىقتارىنا، كىتاپحانالارىنا، راديولارىنا بەستەن، وننان تاراتتىق...

- شىڭجاڭداعى قازاق راديوسىنىڭ بۇرىنعى جانە قازىرگى ءجاي-كۇيى قالاي؟ قىسقاشا توقتالساڭىز.

- تەحنيكالىق جاقتان كوپ دامۋ بار. ال مازمۇنى جاعىنان ايتساق كوپتەگەن وزگەرىسكە ۇشىرادى. ءار ۇلتتىڭ راديولارىندا سوڭعى بەس جىلدا ۇلتتىق بوياۋلار سولعىندادى. مىسالى ۇيعىر راديولارىندا قازاقشا، قىتايشا، ال قازاق راديوسىندا قىتايشا، ۇيعىرشا دەگەندەي، ءبىر-بىرىمەن ارالاستىرىپ بەرە باستادى. راديولارىدا، تەلەۆيزياسى دا سولاي بولىپ كەتتى.

جالپى قىتاي قازاقتارىنىڭ تىلىندە ۇلتتىق بوياۋ قانىق دەپ جاتادى. ونىسى راس بولسا دا، ال ونەر مەن مادەنيەتتىڭ دامۋى جاعىنان ول جاقتاعى اعايىندار مەن بۇل جاقتاعى قازاقتاردى سالىستىرۋعا كەلمەيدى. ويتكەنى قازاقستاندا كەز كەلگەن ماماندىقتى وقۋعا مۇمكىندىك بار. مىسالى ءبىز ديكتورمىز دەسەك، ءبىزدى وقىتار ارنايى كاسىپتىك وقۋ ورىنى بولمادى. وزدىگىمىزشە ۇيرەنۋمەن جەتتىك. قازاقستانداعى نەمەسە باسقا ەلدەردەگى اتاقتى ديكتورلار داۋىسىنا ەلىكتەۋمەن ءومىر سۇردىك. ياعني بىزگە جوقتان باردى جاساۋعا تۋرا كەلدى...

- ول جاقتىڭ راديوسىنىڭ ارتىقشىلىعى دا بار شىعار...

- ارتىقشىلىعى دەگەندە.. . قازاقستان راديولارىندا ءان مەن كۇي وتە باسىم سياقتى سەزىلە بەرەدى. ال قىتاي جاقتاعى راديولارداعى ورتاق وزگەشەلىك - مازمۇنعا باي دەپ ايتۋعا بولادى. قاي تىلدەگى بولسادا سولاي. مىسالى قازاقشاسىن ايتار بولساق، كوكتەمدە اۋىلشارۋاشىلىق، مال شارۋاشىلىعى جايىندا كوپتەگەن باعدارلامالار ۇسىنىلادى. كۇز كەزىندە استىقتى قالاي جيناۋ كەرەك دەگەن سياقتى مازمۇندارعا توقتالىپ، تىڭدارماندارعا كوپتەپ، تىنىمدىق كەڭەس بەرەدى. سوعان سايكەس سۇحباتتار جاسالادى. مىسالى تولدەۋلىك كەزىندە مالدى قالاي تولدەتەدى.

قىس كەزىندە قىسقى جەم- ءشوپتى قالاي ساقتايدى، مالدى اۋرۋ-سىرقاۋدان قالاي امان ۇستاۋعا بولادى، دەگەن سەكىلدى مالعا بايلانىستى بىلىمدەر بەرىلەدى. ال ەگىستىك، اۋىل شارۋاشىلىعى تۋراسىندا دا بىرنەشە باعدارلامالار بار. بۇلار قاراپايىم تىڭدارمانعا وتە قاجەتتى. سوسىن ادام دەنساۋلىعى تۋرالى تۇراقتى باعدارلامالار بار دەگەندەي. ال قازاقستاندىق راديولار كوڭىل كوتەرەتىن باعدارلامالارعا كوبىرەك ءمان بەرەتىن سەكىلدى...

- قازاقستانعا قاشان كەلدىڭىز، قازىر قايداسىز جانە بولاشاق جوسپارىڭىز جايىندا نە ايتاسىز؟

- اتامەكەنگە 2014 -جىلى ءبىر رەت كەلىپ، شىعارماشىلىق كەش وتكىزىپ كەتكەنمىن. ال، 2018 -جىلى تامىز ايىندا ءبىرجولا كوشىپ كەلدىك. قازىر سارىارقانىڭ توسىندە، ەسىلدىڭ جاعاسىندا، ەلوردادامىز. ول جاقتا جاۋاپتى قىزمەتتەر اتقارعان سوڭ، ارمانداعان تۋعان وتانعا كوشەردە كوپتەگەن كەدەرگىلەر بولدى. اقىرىندا اللا ءساتىن سالىپ، امان- ەسەن اتامەكەنگە تابان تىرەدىك.

الداعى جوسپارلار تۋرالى ايتار بولساق، ءدال قازىر بالەندەي شارۋالار تىندىرا قويمادىم. ءبىراق، اركىم وزىندە بارمەن ءىس قىلادى. اقىن، سازگەر رەتىندە تاۋەلسىز وتانىمنىڭ شاتتىققا تولى كۇندەرىن جىرلاسام دەيمىن. ال كاسىبي ديكتور رەتىندە قازاق كلاسسيكتەرىنىڭ ادەبي شىعارمالارىنان اۋديوكىتاپتار شىعارساق دەيتىن ويلار بار. سول ارقىلى قازاق رۋحانياتىنا ازدا بولسا ۇلەس قوسسام دەيمىن. ويتكەنى ءبىز بۇل جاقتان ءبىر نارسە الايىق دەپ ەمەس، بەرەيىك دەپ كەلدىك ەمەس پە؟!

مەن قازاقستانعا اتتاناردا «ورەلى كەر» دەگەن ءانى بار ولەڭ جازعانمىن. ارينە وزىمە ارناپ. ءار قازاق سەكىلدى جىلقى تۇلىگىنە جانىم جاقىن بولعاندىقتان ءوزىمدى «كەر» دەپ الدىم. بۇل ولەڭدەگى «ورە» دەگەنىم زامانا سيپاتى.

مەنىڭ قازاقستانعا كەلۋدەگى وي، كوڭىلىم وسى «ورەلى كەردىڭ» ىشىندە. ەندەشە، بۇگىنگى ويىمدى وسى ولەڭمەن قورتىندىلايىن.

«ورەلى كەر»

كەلەدى ەلەڭ قاعىپ ورەلى كەر،

كەكىلىن جانۋاردىڭ وبەدى جەل.

ناردىڭ دا ءىزى قالعان كەشە كۇنى،

الدىندا اساتۇعىن كوپ ەدى بەل.

قاراماي كۇندىزىنە، ءتۇن ىشىنە،

باسقانىڭ جۇرە بەرمەي مىنىسىنە،

اسقانىڭ اسۋلاردان قانداي عاجاپ،

جولىڭدا جورعا ءتۇسسىن جۇرىسىڭە.

بارادى ورەلى كەر بەلدەن اسىپ،

جۇرگىسى كەلمەگەن سوڭ ەندى اداسىپ.

ورەسىن تورەسى الىپ تاستار ءالى،

تەل وسەر، تەلقوڭىر مەن تەڭ جاراسىپ.

ورەلى كەر، ورەلى كەر،

تايىڭدا تاڭداي قاققان كوپ ەدى ەل،

ورەلى كەر، ورەلى كەر،

قىزىققان قۇلىنىڭدا كوپ ەدى ەل.

ورەلى كەر، ورەلى كەر،

ارقاڭدى جاۋىر قىلعان كوپ ەدى ەر،

ورەلى كەر، ورەلى كەر،

جانىڭدى جاۋىر قىلعان كوپ ەدى ەل، ورەلى كەر»

اۆتور: بەيسەن سۇلتان ۇلى