اباي ولەڭدەرىنە جازىلعان قانداي رومانستار بار
كاسىبي ورتادا عانا تانىمال بۇل شىعارمالار، نوتاعا ءتۇسىرىلىپ، قازاقستان كومپوزيتورلار وداعىندا تىركەلگەنىمەن، ۇلكەن ساحنالاردا ورىندالماعان. «جارق ەتپەس قارا كوڭىلىم» رومانسى «اباي جولى» شىعارماسىنداعى اباي مەن توعجاننىڭ سوڭعى كەزدەسۋىن كوز الدىمىزعا كەلتىردى» . بۇل - كومپوزيتور سىدىق مۇحامەدجانوۆتىڭ تىرناقالدى تۋىندىسىنا بۇلبۇل ءانشى كۇلاش بايسەيىتوۆانىڭ بەرگەن باعاسى. ابايدىڭ ىشكى تولعانىسىن ءدال بەرگەن كەڭ تىنىستى رومانس ەرمەك سەركەبايەۆتىڭ ورىنداۋىندا مۋزىكا تاريحىندا قالدى. الايدا ويشىل اقىننىڭ سەزىمگە تولى ليريكالىق ولەڭدەرىنە جازىلعان باسقا دا كلاسسيكالىق شىعارمالاردىڭ بار ەكەنىن كوپشىلىك كورەرمەن بىلە بەرمەيدى.
ابايدىڭ ولەڭىنە جازىلعان كومپوزيتور ءابىلاحات ەسپايەۆتىڭ «مەن سالەم جازامىن.. .» رومانسى كاسىبي مۋزىكانتتارعا عانا تانىس. نوتاسى تۇسىرىلگەن شىعارمانى تابيعي داۋىستا ورىنداعان اباي اتىنداعى وپەرا جانە بالەت تەاترىنىڭ سوليسى بولات بوكەنوۆ ۇلى اقىننىڭ بۇل رومانستارى ۇلكەن ساحنالاردا ورىندالۋى ءتيىس دەيدى. قۇندى دۇنيەلەر ازىرگە اباي تانۋشىلاردىڭ نازارىنان تىس قالىپتى.
ءاليا سابىروۆا، ابايدىڭ مۋزىكاسىن زەرتتەۋشى:
- ابايدىڭ ولەڭدەرىندە ءان قانداي بولۋ كەرەكتىگى ايتىلادى. ەڭ باستى ويى سوندا - ابايدىڭ ءانى ويلى، ەستى بولۋ كەرەك. ياعني ابايدىڭ تۇسىنىگىندە ءان ادامعا وي سالۋ كەرەك، ول تەرەڭ مازمۇندى بولۋ شارت، مىنە وسى كەزەكتە ەگەر ابايدىڭ ۋاعىزداعان ءان مودەلىن ۇزدىك ءان ۇلگىسىن كوبىرەك ناسيحاتتاساق، ارينە ءبىزدىڭ قوعامىمىز باسقاشا كوزقاراستا بولار ما ەدى؟!
بۇل دا ابايدىڭ سوزىنە جازىلعان كومپوزيتور ماكالىم قويشىبايەۆتىڭ «قۇيقىلجىر كوڭىل قۇسى شارتاراپقا» رومانسى. ءبىر قىزىعى، بۇل شىعارما تۋرالى مۋزىكاتانۋشىلاردان تۇشىمدى پىكىر ەستي المادىق. عالامتوردا دا مالىمەت جوق. ابايدىڭ كوبەسى سوگىلمەگەن مۇرالارىنىڭ قاتارىن تولىقتىرىپ تۇرعان بۇل شىعارمالار اقىننىڭ 175 جىلدىعىندا جارىققا شىقسا يگى.
www.24.kz