قاپشاعايدا جەدەل جاردەم قىزمەتكەرلەرى كوروناۆيرۋس جايلى جالعان اقپارات تاراتقان
قازىر ەكى ازاماتتىڭ ۇستىنەن قىلمىستىق ءىس قوزعالدى، دەپ حابارلايدى قازاقپارات ءتىلشىسى.
الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 29 - قاڭتار كۇنى «ۆاتساپ» جەلىسى ارقىلى ەكى ادامنىڭ كوروناۆيرۋس ىندەتىن جۇقتىردى دەگەن كۇدىكپەن تۇسكەندىگى جونىندە اقپارات تاراعان. قۇزىرلى ورگان اقپاراتتى تەكسەرگەندە بۇل حابارلامانىڭ جالعان ەكەنى انىقتالعان.
«جەدەل-ىزدەستىرۋ بارىسىندا ەكى كۇدىكتى ۇستالدى. ولار قاپشاعاي قالاسىنىڭ پوليتسيا بولىمشەسىنە جەتكىزىلدى. ەكەۋى دە جەرگىلىكتى اۋرۋحاناداعى جەدەل-جاردەمنىڭ كولىك جۇرگىزۋشىسى بولىپ جۇمىس ىستەيدى. ەكى ەر ازاماتقا جالعان اقپارات تاراتۋىنا نە تۇرتكى بولعانى تەرگەۋ بارىسىندا انىقتالادى»، دەپ مالىمدەدى اتالعان ۆەدومستۆونىڭ باسپا ءسوز قىزمەتىنەن.
قازىر ەكى كۇدىكتى جالعان اقپارات تاراتقانى ءۇشىن ق ر ق ك 274-بابىنىڭ 1-تارماعىنا سايكەس زاڭ الدىندا جاۋاپقا تارتىلادى. ءىستى قاپشاعاي قالاسىنىڭ تەرگەۋشىلەرى جۇرگىزىپ جاتىر. تەرگەۋ بارىسىندا ۇستالعان كۇدىكتىلەر ارنايى قولحاتپەن جىبەرىلگەن.