ىشكى ىستەر مينيسترلىگى قازاقستان جولدارىنداعى جاعداي تۋرالى ايتتى
«20 - قاڭتاردان باستاپ اۋا رايىنىڭ قولايسىزدىعىنا بايلانىستى قازاقستان وڭىرلەرىنىڭ باسىم بولىگىندە اۆتوموبيل جولدارىنىڭ 44 ۋچاسكەسى 418 رەت جابىلدى. بارلىق ۋچاسكەدە بلوك- بەكەتتەر قويىلدى. سول جەرگە كەلگەن تۇرعىندارعا اۋا رايىنىڭ قولايسىزدىعىنا بايلانىستى جول جابىلعانى تۋرالى اقپارات دەر ۋاقىتىندا بەرىلىپ تۇردى. كوپشىلىگى ەلدى مەكەندەرگە قايتۋعا شەشىم قابىلداسا، كەيبىرى جولدا قالىپ، اۋا رايىنىڭ جاقسارۋىن، جول تازالانۋىن كۇتۋدە. جىلىنۋ بەكەتتەرىنە 1,5 مىڭنان استام ادام ورنالاستىرىلعان. نۇر- سۇلتان قالاسىندا، اقمولا، اقتوبە، قاراعاندى جانە پاۆلودار وبلىستارىنداعى مۇنداي ورىنداردا ادامدار ءالى بار. جول بويىندا جەڭىل، جۇك كولىگى، اۆتوبۋس سىندى 2930-دان استام كولىك قۇرالى بولدى. ءبىرقاتار وڭىردە، ونىڭ ىشىندە نۇر- سۇلتان قالاسىندا توتەنشە جاعداي جاريالاندى. ەلوردادا ول ءالى دە ساقتالۋدا»، - دەدى يۋ. يلين.
ونىڭ دەرەگىنشە، اقمولا وبلىسىنىڭ ەرەيمەنتاۋ اۋدانىندا 100-دەن استام كولىك قۇرالى قار قۇرساۋىندا قالىپ قويدى. دەگەنمەن، كەشە بۇل كولىكتەر نوۆو- ماركوۆكا ەلدى مەكەنىنە جەتكىزىلگەن. ال بۇگىن توتەنشە جاعدايلار كوميتەتىنىڭ جول تەحنيكالارىنىڭ كومەگىمەن ەلورداعا جەتتى.
«قازىرگى ۋاقىتتا پاۆلودار باعىتىندا ءجۇرۋى ءتيىس شامامەن 110 ۇلكەن جۇك كولىگى نۇر- سۇلتاندا تۇر. بۇگىن ءتۇنى بويى «قازاۆتوجول» جولدى تازالاعاننان كەيىن بۇل كولىكتەر پاۆلودار وبلىسىنا اتتانادى»، - دەدى ول.
ۆيتسە- ءمينيستردىڭ ايتۋىنشا، نۇر- سۇلتاننان بۋراباي باعىتىندا دا 400-دەن استام كولىك جولدا قالىپ وتىر. نۇر- سۇلتان- اتباسار جولىنداعى جاعداي دا كۇردەلى.
اتباسار اۋدانىندا 400-دەن استام كولىك جينالىپ قالعان. جولدى قاردان تازالاۋ جۇمىستارى جۇرگىزىلىپ جاتىر.
بۇگىن جولدىڭ ءبىر جاق باعىتىندا قوزعالىس اشىلىپ، كولىكتەر ەلورداعا قاراي جىلجيتىن بولادى. جالپى جول 30- قاڭتار كۇنى تولىق اشىلماق.
اۆتور: مارلان جيەمباي