قوسشى كەنتىنىڭ مارتەبەسى وزگەرۋى مۇمكىن

كوكشەتاۋ. قازاقپارات - اقمولا وبلىسىنىڭ تسەلينوگراد اۋدانىنداعى قوسشى كەنتىنىڭ مارتەبەسى وزگەرۋى مۇمكىن. بۇل تۋرالى ەلەكتروندى ۇكىمەت پورتالىنىڭ «اشىق ديالوگ» الاڭىندا ايماق باسشىسى ەرمەك مارجىقپايەۆ جازدى، دەپ حابارلايدى قازاقپارات ءتىلشىسى.

«قوسشى اۋىلى نۇر- سۇلتان قالاسىنان وڭتۇستىك- باتىسقا قاراي ورنالاسقان، وڭىردەگى ءىرى جانە قارقىندى دامىپ كەلە جاتقان ەلدى مەكەن. تۇرعىنداردىڭ سانى ارتقان سايىن ەلدى مەكەننىڭ ينفراقۇرىلىمى دا دامۋدا. مەملەكەتتىك قولداۋدىڭ ارقاسىندا مەديتسينالىق، ءبىلىم بەرۋ جانە وزگە دە الەۋمەتتىك قىزمەت جەلىسىن دامىتۋ شارالارى قولعا الىنۋدا. قازىرگى ۋاقىتتا سەلينوگراد اۋدانىنداعى قوسشى اۋىلىنىڭ مارتەبەسىن وزگەرتۋ ماسەلەسى قارالىپ جاتىر» ، - دەدى ەرمەك مارجىقپايەۆ.

ەسكە سالساق، وتكەن جىلى ساۋىردە قازاقستان پرەزيدەنتى قاسىم- جومارت توقايەۆ قوسشى اۋىلىنا جۇمىس ساپارىمەن باردى.

مەملەكەت باسشىسى جۇمىس ساپارى بارىسىندا ينجەنەرلىك- كولىكتىك ينفراقۇرىلىم احۋالىمەن تانىسىپ، جەرگىلىكتى سۋ تاراتۋ ستانتسياسىن ارالاپ كورگەن ەدى.