قىتايدا دەمالىپ كەلگەن كوكشەتاۋلىق بالالاردان كوروناۆيرۋس ينفەكسياسى تابىلمادى

كوكشەتاۋ. قازاقپارات - قىتايدا دەمالىپ كەلگەن كوكشەتاۋلىق بالالاردان كوروناۆيرۋس ينفەكسياسى انىقتالمادى. بالالاردان تۇماۋدىڭ ا ءتيپى تابىلدى، دەپ حابارلايدى قازاقپارات ءتىلشىسى اقمولا وبلىستىق دەنساۋلىق ساقتاۋ باسقارماسىنا سىلتەمە جاساپ.

ايتا كەتەيىك، Telegram الەۋمەتىك جەلىسىندە كوكشەتاۋداعى جۇقپالى اۋرالار اۋرۋحاناسىنا كوروناۆيرۋس كۇدىگىمەن ناۋقاس ءتۇستى دەگەن اقپارات تاراعان بولاتىن.

وسىعان وراي، قازاقپارات ءتىلشىسى اقمولا وبلىستىق دەنساۋلىق ساقتاۋ باسقارماسىنا حابارلاسىپ، ءمان- جايدى سۇراپ بىلگەن ەدى.

ۆەدومستۆودان اتاپ وتكەندەي، بۇگىن قاڭتاردىڭ 28-دە ج ر ۆ ي (جەدەل رەسپيراتورلىق- ۆيرۋستىق ينفەكسيالارى) دياگنوزىمەن 2 جانە 5 جاسار ەكى بالا وبلىستىق كوپ بەيىندى بالالار اۋرۋحاناسىنا تۇسكەن. اتالمىش وتباسى 6-21 قاڭتار ارالىعىندا قىتايدا (حاينان) دەمالىستا بولعان.

اقمولا وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى ناۋقاستاردان كوروناۆيرۋس ينفەكتسياسىنا بايلانىستى سىناما الدى. اتا- اناسى مەن بالانىڭ ۇلكەنىندە ج ر ۆ ي (جەدەل رەسپيراتورلىق- ۆيرۋستىق ينفەكسيالارى) بەلگىلەرى تابىلمادى. سىناما قورىتىندىسى بىرەر ساعاتتا دايىن بولادى دەگەن ەدى.

«اقمولا وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى ساراپتاما قورىتىندىسى بويىنشا وبلىستىق كوپ بەيىندى بالالار اۋرۋحاناسىنا تۇسكەن ناۋقاستاردان تۇماۋدىڭ ا ءتۇرى انىقتالدى، كوروناۆيرۋس ينفەكسياسى راستالمادى»، - دەپ ءتۇسىندىردى اقمولا وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى.

اۆتور: اسلان وسپانوۆ