قاسىم- جومارت توقايەۆ شەيح سۋرۋر بەن مۇحاممەد ءال ناحايانمەن كەزدەستى

ءابۋ دابي. قازاقپارات - پرەزيدەنت ءابۋ دابي امىرلىگىن بيلەۋشى اۋلەتىنىڭ وكىلى، بىرىككەن اراب امىرلىكتەرىندەگى ءىرى بيزنەس وكىلى، «ەtihad Towers» كوپفۋنكتسيونالدى كەشەنىنىڭ يەسى، «First Abu Dhabi Bank» اكسيونەرى شەيح سۋرۋر بەن مۇحاممەد ءال ناحايانمەن كەزدەستى، دەپ حابارلايدى اقوردانىڭ باسپا ءسوز قىزمەتى.

كەزدەسۋدە مەملەكەت باسشىسى بىرىككەن اراب امىرلىكتەرى قازاقستاننىڭ تاياۋ شىعىستاعى سەنىمدى سەرىكتەستەرىنىڭ ءبىرى ەكەنىن، ساپار بارىسىندا ءابۋ دابيدىڭ تاق مۇراگەرى، شەيح مۇحاممەد بەن زايد ءال ناحايانمەن ەكىجاقتى ىنتىماقتاستىقتى ودان ءارى دامىتۋعا ۋاعدالاسقاندارىن اتاپ ءوتتى.

شەيح سۋرۋر بەن مۇحاممەد ءال ناحايان قازاقستان پرەزيدەنتىنە ءوزىنىڭ «West Hydrocarbons Commercial Investment LLC» كومپانياسىنىڭ باتىس قازاقستان وبلىسىندا مۇناي وڭدەۋ زاۋىتىن سالىپ جاتقانىن ايتتى.

الداعى ۋاقىتتا دا قازاقستانمەن بىرلەسىپ جۇمىس ىستەۋگە، جاڭا جوبالارعا ينۆەستيتسيا سالۋعا نيەت ءبىلدىردى.