قىتايداعى كوروناۆيرۋستىق ينفەكتسيا پويىزبەن جۇك تاسىمالداۋعا ەش اسەر ەتپەيدى - قايرات ساۋىربايەۆ

نۇر-سۇلتان. قازاقپارات - قىتايدا كوروناۆيرۋستىق ينفەكتسيانىڭ تارالۋ جاعدايى پويىزبەن جۇك تاسىمالداۋعا ەش اسەر ەتپەيدى.

بۇل تۋرالى ەلوردادا وتكەن بريفينگتە «ق ت ج - جۇك تاسىمالى» ا ق باس ديرەكتورى قايرات ساۋىربايەۆ ايتتى.

«بۇل ماسەلە نەگىزىندە جولاۋشىلار تاسىمالداۋعا قاتىستى. ءبىز جولاۋشىلاردىڭ قاۋىپسىزدىگىن قامتاماسىز ەتۋىمىز كەرەك. وسى ماقساتتا ق ت ج- دا ارنايى شتاب قۇرىلدى. بىزدە قىتايعا باراتىن ەكى پويىز بار. ءبىز جولاۋشىلاردىڭ دا، قىزمەتشىلەردىڭ دە قاۋىپسىزدىگىن قامتاماسىز ەتۋ شارالارىن ۇيىمداستىرامىز. ال جۇك تاسىمالداۋعا قاتىستى ەشقانداي ماسەلە جوق»، - دەيدى قايرات ساۋىربايەۆ.

ول مينيسترلىككە قىتايعا باراتىن جولاۋشىلار پويىزدارىن ۋاقىتشا توقتاتۋ تۋرالى ۇسىنىس ايتىلىپ وتىرعانىنا توقتالدى.

«دوستىق» جانە «التىن كول» ستانتسيالارىنان قىتايعا قاراي ەكى پويىز جۇرەدى. ءبىز مينيسترلىككە جولاۋشىلاردىڭ از بولۋىنا بايلانىستى پويىزدى ۋاقىتشا توقتاتا تۇرۋ تۋرالى ۇسىنىس ايتتىق. مەندەگى مالىمەت بويىنشا، «دوستىق» ستانتسياسىنان 8-9 ادام وتىرسا، «التىن كول» ستانتسياسىنان 35-36 ادام وتىرادى. وسى سەبەپتى ەكى جولاۋشىلار پويىزىن ۋاقىتشا توقتاتقىمىز كەلەدى»، - دەيدى ول.