قارجى ءمينيسترى تاۋار باعاسىن ۇستاپ تۇرۋ نەلىكتەن مۇمكىن بولماعاندىعىن ءتۇسىندىردى

نۇر-سۇلتان. قازاقپارات – ق ر پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ تاۋار باعاسىن ۇستاپ تۇرۋ نەلىكتەن مۇمكىن بولماعاندىعىن ءتۇسىندىردى، دەپ حابارلايدى قازاقپارات ءتىلشىسى.

«تولىقتاي العاندا بىزدە تۇتىنۋ تاۋارلار باعاسىنىڭ ءوسىمى جەلتوقسان ايىندا 2018-جىلدىڭ جەلتوقسانىمەن سالىستىرعاندا 5,4 پايىزدى قۇرايدى. ال ازىق-تۇلىك تاۋارلارىنىڭ باعاسى ءبىرشاما جوعارى ءوسىم كورسەتتى»، - دەدى ول ۇكىمەت وتىرىسىنان كەيىن ب ا ق وكىلدەرىنىڭ ساۋالىنا وراي.

دەگەنمەن، ونىڭ دەرەگىنە قاراعاندا، ينفلياتسيانى بۇعان دەيىن بولجانعان 4-6 پايىز دالىزىندە ۇستاپ قالۋعا مۇمكىندىك بولدى.

«جالپى بارلىق تۇتىنۋ تاۋارلارىنا باعا تۇراقتىلىعى مونوپوليستەرمەن رەتتەلەتىن كوممۋنالدىق قىزمەتتەر تاريفتەرىن تومەندەتۋ ەسەبىنەن قامتاماسىز ەتىلدى. بيىل ازىق-تۇلىك تاۋارلارى باعاسىنىڭ ءوسىمىن ءبىز تارگەتتەپ وتىرعان 4-6 پايىزدىق دالىزدە ۇستاپ تۇرۋ ءۇشىن بارلىق كۇش-جىگەردى جۇمسايمىز»، - دەدى ءاليحان سمايىلوۆ.