كوروناۆيرۋس: قازاقستانعا شەكارانى جابۋ كەرەك پە

نۇر-سۇلتان. قازاقپارات – ق ر دەنساۋلىق ساقتاۋ ءمينيسترى ەلجان ءبىرتانوۆ قىتايداعى كوروناۆيرۋسقا بايلانىستى شەكارانى جابۋ ۇسىنىسىنا پىكىر ءبىلدىردى، دەپ حابارلايدى قازاقپارات.

«دۇنيەجۇزىلىك دەنساۋلىق ساقتاۋ ۇيىمى ازىرلەگەن «حالىقارالىق مەديتسينالىق-سانيتارلىق ەرەجەلەر» اتتى قۇجات بار. قازاقستان بۇل قۇجاتتى 2005-جىلى قابىلداعان جانە سايكەسىنشە وسى قاعيدالارعا سۇيەنەدى. ياعني، جاھاندىق قاۋىپ-قاتەر تۋعاندا دۇنيەجۇزىلىك دەنساۋلىق ساقتاۋ ۇيىمى شەكارانى جابۋ تۋرالى ۇسىنىم بەرەدى. ءبىز ازىرگە جاعدايدى باقىلاپ وتىرمىز. د د س ۇ مۇنداي ۇسىنىم بەرگەن جوق»، - دەدى مينيستر ۇكىمەت ۇيىندە وتكەن باسپا ءسوز ءماسليحاتىندا.

سونىمەن بىرگە، ق ر سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشيەۆ ەكى ەل اراسىندا ديپلوماتيالىق تۇرعىدا شەكتەۋلەر ەنگىزىلگەنىن جەتكىزدى.

قىتايداعى قازاقستان ەلشىلىگى، باس كونسۋلدىعى ق ح ر ازاماتتارىنا ۆيزا راسىمدەۋ تالاپتارىن، اسىرەسە دەنساۋلىق جاعدايى تۋرالى انىقتاما تالابىن كۇشەيتتى.

ۇكىمەت قىتايلىقتار ءۇشىن 72 ساعاتتىق ۆيزاسىز رەجىمدى ۋاقىتشا توقتاتۋ تۋرالى شەشىم قابىلدادى. ودان بولەك، قازىرگى ۋاقىتتا ق ح ر ازاماتتارى ءۇشىن اۋەجايدا ەلەكتروندى ۆيزا راسىمدەۋ توقتاتىلدى.

«شەكارانى جاپقان جاعدايدا ءوز وتانداستارىمىزدىڭ قىتاي اۋماعىنان شىعۋىن ۇيىمداستىرا المايمىز. بىزدەگى مالىمەتتەرگە سايكەس، قازىر قىتاي اۋماعىندا 1300 قازاقستاندىق بار. ونىڭ 635 ءى حاينان پروۆينتسياسىندا ءجۇر، 204 ەلشىلىك پەن كونسۋلدىقتىڭ، كومپانيالاردىڭ قىزمەتكەرلەرى، ولاردىڭ وتباسى جانە 445 قازاقستاندىق جالپى قىتاي اۋماعىندا ءجۇر. شىن مانىندە، قىتايداعى قازاقستاندىقتار سانى بۇدان دا كوپ ەدى. ويتكەنى، كوپتەگەن ستۋدەنتتەر قىتايدا ءبىلىم الاتىن. ءبىراق، اۋرۋدىڭ شىعۋ ۋاقىتى قىستىق كانيكۋلدارمەن تۇسپا-تۇس كەلدى. سوندىقتان، ءبىزدىڭ ستۋدەنتتەردىڭ كوپشىلىگى قازاقستاندا نەمەسە قىتاي اۋماعىنان تىس جەرلەردە ءجۇر»، - دەدى شاحرات نۇرىشيەۆ.

بۇعان دەيىن شاحرات نۇرىشيەۆ ۋحان قالاسىنداعى 98 قازاقستاندىق ستۋدەنتتىڭ جاي-كۇيى تۋرالى بايانداعان بولاتىن.