پرەزيدەنت تاپسىرمالارىن ورىنداۋ ءۇشىن اسقار ماميننىڭ توراعالىعىمەن جۇمىس توبى قۇرىلماق
بۇل تۋرالى بۇگىن ۇكىمەت وتىرىسىندا ق ر ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.
«ۇكىمەتتىڭ كەڭەيتىلگەن وتىرىسىندا مەملەكەت باسشىسى ەكونوميكانىڭ ساپالى ءوسۋىن قامتاماسىز ەتۋ جانە حالىقتىڭ تابىسىن ارتتىرۋ جونىندە ناقتى مىندەتتەر قويدى. جالپى 80 نەن استام تاپسىرما بەرىلدى. ورتا مەرزىمدى كەزەڭگە ارنالعان ەكونوميكالىق دامۋ جوسپارىن ازىرلەۋ قاجەت. 3 زاڭ اكتىسى قابىلدانادى. بۇل: جاڭا رەداكتسياداعى «تەحنيكالىق رەتتەۋ تۋرالى» زاڭ، بيۋدجەت كودەكسىنە وزگەرىستەر جانە دەنساۋلىق كودەكسى. 3 باعدارلامالىق قۇجات بەكىتىلەدى. بۇل: اقشا-كرەديت ساياساتى ستراتەگياسى، ساۋدا ساياساتى باعدارلاماسى جانە سۋ رەسۋرستارىن باسقارۋ باعدارلاماسى»، - دەدى مينيستر.
ونىڭ ايتۋىنشا، مەملەكەت باسشىسىنىڭ ءاربىر تاپسىرماسىن مازمۇندى جانە جەدەل پىسىقتاۋ قاجەت.
«وسىعان بايلانىستى، اسقار ۇزاقباي ۇلى، ءسىزدىڭ باسشىلىعىڭىزبەن ۇكىمەتتە جۇمىس توبىن قۇرۋ ۇسىنىلادى. جۇمىس توبى اياسىندا 10 شاعىن توپتى ايقىنداۋ ۇسىنىلادى. بۇل توپتار مەملەكەت باسشىسىنىڭ بارلىق تاپسىرمالارىن قامتيدى. مەملەكەتتىك ورگانداردىڭ ءبىرىنشى باسشىلارى شاعىن توپتاردى باسقارادى جانە ولارعا دەربەس جاۋاپكەرشىلىك جۇكتەلەدى»، - دەدى ول پرەمەر-مينيستر اسقار مامينگە قاراتا.
ءمينيستردىڭ سوزىنە قاراعاندا، وسى جۇمىسقا ساراپتامالىق قوعامداستىق پەن «اتامەكەن» ۇلتتىق كاسىپكەرلەر پالاتاسىنىڭ وكىلدەرىن بەلسەندى تارتۋ جوسپارلانعان.
«شاعىن توپتاردىڭ جۇمىسىن ۇيلەستىرۋدى ءسىزدىڭ ورىنباسارلارىڭىزعا جەتەكشىلىك ەتەتىن سالالارىنا سايكەس بەكىتۋ ۇسىنىلۋدا»، - دەدى رۋسلان دالەنوۆ.