اۆتوجولدارداعى جاعداي ءالى دە كۇردەلى - ەرلان تۇرعىمبايەۆ
ىشكى ىستەر ءمينيسترى اۋا رايىنىڭ قولايسىزدىعىنا بايلانىستى تۇرعىندارعا جولعا شىعۋ جوسپارىن كەيىنگە شەگەرە تۇرىپ، جولدىڭ اشىق نەمەسە جابىق ەكەنىن باقىلاپ وتىرۋدى سۇرايدى. اسىرەسە، ەلوردادا جاعداي كۇردەلى. جۋىق ارادا جەل كۇشەيىپ، اياز باستالادى جانە اۋا تەمپەراتۋراسى تومەندەيدى دەپ كۇتىلۋدە.
«ەۆاكۋاتسيالىق- قۇتقارۋ جۇمىستارىنا شامامەن 2 مىڭداي پوليتسيا قىزمەتكەرى، توتەنشە جاعداي جانە ۇلتتىق ۇلان اسكەري قىزمەتكەرلەرى تارتىلدى. جولدا جۇرۋدە جوعارى مۇمكىندىگى بار 700-دەن استام ارنايى تەحنيكا جۇمىلدىرىلعان. جۇمىستىڭ ءبارى اۋا رايىنىڭ قيىن جاعدايىندا جۇرگىزىلىپ جاتىر. سوندىقتان ازاماتتار ءوز قاۋىپسىزدىگى ءۇشىن ەلدىمەكەندەر اراسىنداعى جولدارمەن جۇرۋدەن اۋلاق بولۋى كەرەك. مۇنداي جاعدايدا «ءوزىم بىلەمدىك» قايعىلى جاعدايعا اكەلىپ سوعۋى مۇمكىن»، - دەيدى ەرلان تۇرعىمبايەۆ.
حابارلانىپ وتىرعانداي، 26-27 - قاڭتاردا قابىلدانعان شارالاردىڭ ارقاسىندا 2 مىڭنان استام ادام قۇتقارىلىپ، قاۋىپسىز جەرگە ەۆاكۋاتسيالانعان. ولاردىڭ ىشىندە جۇزگە جۋىق بالا بار.
قار قۇرساۋىنان 1400-گە جۋىق تەحنيكا قۇتقارىلدى. ايتا كەتەرلىگى، جەكەلەگەن جۇرگىزۋشىلەر بەكەتتەردى اينالىپ ءوتىپ، ءوز ومىرىمەن بىرگە جولاۋشىلارعا دا ءقاۋىپ توندىرگەن.
«توتەنشە جاعدايدىڭ الدىن الۋ ءۇشىن ىشكى ىستەر مينيسترلىگى ازاماتتارعا ەسكەرتۋ حابارلامالارىن ەسكەرىپ، ىشكى ىستەر ورگاندارى مەن توتەنشە جاعداي قىزمەتكەرلەرىنىڭ نۇسقاۋىن ورىنداۋعا كەڭەس بەرەدى»، - دەدى ىشكى ىستەر ءمينيسترى.
جەرگىلىكتى اتقارۋشى ورگاندارعا قاجەت بولعان جاعدايدا ەۆاكۋاتسيالاۋ پۋنكتىلەرى مەن جىلۋ- ەلەكتر پۋنكتىلەرىن ورنالاستىرۋ جونىندە شارالار قابىلداۋ ۇسىنىلادى.
قازىرگى ۋاقىتتا قۇتقارۋ جۇمىستارى جالعاسۋدا. جول جابىلعانى تۋرالى اقپارات ءار 2 ساعات سايىن جاڭارتىلىپ وتىرادى.
اۆتور: ايان بەكەن ۇلى