پاۆلودار وبلىسىندا قاسقىردىڭ ادامعا شاپقانى دالەلدەنگەن جوق

پاۆلودار. قازاقپارات - پاۆلوردار وبلىسىنىڭ ورمان شارۋاشىلىعى جانە جانۋارلار الەمى ينسپەكتسياسى قاسقىردىڭ ادامدارعا نەمەسە مالعا شاققان فاكتىلەرى دالەلىن تاپقان جوق، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

الايدا، شارباقتى اۋدانى مەن لەنين كەنتىنىڭ جانىنان تابىلعان قاسقىرلاردى اتۋعا رەسمي رۇقسات بەرگەن.

مامانداردىڭ ايتۋىنشا وبلىس اۋماعىندا 212 قاسقىر بار. ينسپەكتسيا كۇن سايىن جىرتقىش اڭداردىڭ ەسەبىن جۇرگىزەدى.

«مونيتورينگ ناتيجەسىندە قاسقىردىڭ ادامعا نەمەسە مالعا شاپقانىن انىقتاعان جوق. 18- قاڭتاردا اقسۋ قالاسىنىڭ ماڭىندا قاسقىر جۇرگەنى تۋرالى حابار تۇسكەن سوڭ اڭشىلارعا حابارلاسىپ، جەرگىلىكتى پوليتسەيلەرگە «ە ە ك» ا ق ستانساسىنا بارۋىن سۇراعان ەدىك. اڭشىلار ستانساعا جەتكەندە جىرتقىشتىڭ تۇرعىن ءۇيدىڭ جانىندا جۇرگەنىن بايقاپ، اتىپ تاستاعان»، - دەيدى ينسپەكتسيا باسشىسىنىڭ مىندەتىن اتقارۋشى نۇرجان قازتاي.

21- قاڭتاردا كوكجالدار شارباقتى اۋدانىنداعى شارۋانىڭ مالىنا شاپقانى تۋرالى اقپارات تۇسكەن. الايدا، قويدى قاسقىر شاپقانىن ەشكىم دالەلدەمەگەن.

«ءبىزدىڭ ماماندار، پوليتسەيلەر مەن ۆەتەرينارلار وقيعا ورنىنا باردى. كوميسسيا مالدىڭ ولتىرىلگەنىن راستاسا دا، بۇل ناقتى قاسقىردىڭ ارەكەتى نەمەسە ءيتتىڭ جاساعانىن انىقتاي المادى»، - دەيدى نۇرجان قازتاي.

23- قاڭتاردا ينسپەكتسياعا لەنينسكيي پوسەلكىسىنىڭ اكىمى اپپاراتىنان حات كەلىپ تۇسكەن. حاتتا ەليەۆاتور ماڭىنداعى تەمىرجول اراسىندا 2 قاسقىردىڭ جۇرگەنى حابارلاندى. ينسپەكتسيا لەنينسكيي اۋىلدىق وكرۋگى اۋماعىندا قاسقىردىڭ سانىن رەتتەۋگە اڭشىلارعا ارنايى رۇقسات بەرگەن.

ەسكە سالا كەتسەك، الەۋمەتتىك جەلىدە سوڭعى ۋاقىتتا قاتتى بوران سوققان كەزدەرى ەلدى مەكەندەرگە قاسقىردىڭ كىرىپ كەتۋىنە قاتىستى ۆيدەولار تاراعان بولاتىن. قر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى وسى روليكتەرگە قاتىستى تۇسىنىكتەمە بەردى.

سونداي-اق، ينسپەكتورلار ەلوردا اۋماعىنداعى قاسقىرلار تۋرالى قاۋەسەتتى جوققا شىعاردى، ءارى جالعان اقپارات تاراتقاندار ىزدەستىرىلىپ جاتقانى ءمالىم بولدى.