ينسپەكتورلار ەلوردا اۋماعىنداعى قاسقىرلار تۋرالى قاۋەسەتتى جوققا شىعاردى
بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ ورىنباسارى ناريمان ءجۇنىسوۆ ءمالىم ەتتى، دەپ حابارلايدى قازاقپارات.
«كەشەدەن بەرى الەۋمەتتىك جەلىلەردە ەلوردا ماڭىنداعى ەلدى مەكەندەر اۋماعىنا جانە قالانىڭ اينالاسىنا قاسقىرلاردىڭ كىرگەنى تۋرالى فوتوسۋرەت جانە بەينە ماتەريالدار تارالۋدا. وسى ورايدا كەشە كەشقۇرىم اقمولا وبلىستىق اۋماقتىق ينسپەكتسياسىنىڭ مەملەكەتتىك ينسپەكتورلارى بارشا قالا بويىنشا قاسقىرلاردى ىزدەستىرۋگە قاتىستى مونيتورينگتىك جۇمىستاردى جۇرگىزدى. الايدا ونداي فاكتىلەر تىركەلمەدى. سونىمەن بىرگە، قالا اكىمدىگى مەن قۇقىق قورعاۋ ورگاندارى قالا اۋماعىندا جانە جاقىندا ورنالاسقان ەلدى مەكەندەردە قاسقىرلار جۇرگەندىگى تۋرالى اقپاراتتى جوققا شىعاردى. كەز كەلگەن جابايى جانۋار ادامدار جۇرگەن جەردەن اۋلاق بولۋعا تىرىساتىنىن اتاپ وتكەن ءجون»، - دەدى ن. ءجۇنىسوۆ.
مۇنىمەن قوسا، ول قازاقستاندا قاسقىر مەن شيبورى سانىن رەتتەۋ ليميتى بەكىتىلگەنىن ەسكە سالدى. 2020 -جىلى رەسپۋبليكا بويىنشا جالپى 4824 قاسقىر مەن 11733 شيبورى اتۋعا رۇقسات بەرىلگەن.
اۆتور: رۋسلان عابباسوۆ