پرەزيدەنت قازاقستاندا قۇرىلىس قۇنى قالاي قىمباتتايتىنىن تالداپ بەردى

نۇر- سۇلتان. قازاقپارات – ق ر پرەزيدەنتى قاسىم- جومارت توقايەۆ نىساندار قۇرىلىسىندا جوبالاۋدى قىمباتتاتۋعا جول بەرمەۋدى تاپسىردى، دەپ حابارلايدى قازاقپارات ءتىلشىسى.

 جوبالار قۇنىنىڭ ەلەۋلى تۇردە قىمباتتاۋى تاجىريبەسى جالعاسىپ كەلە جاتقانىنا توقتالعان پرەزيدەنت، «قۇرىلىستىڭ سمەتالىق قۇنىن قالىپتاستىرۋ پروبلەماسى بار. بۇل بارلىق دەڭگەيدەگى بيۋدجەتتەرىنىڭ اۋقىمدى شىعىس بولىگى بولىپ وتىر. ماتەريالدارعا، ماشينا جانە مەحانيزمدەر جۇمىسىنا، تەحنولوگيالىق كارتالار مەن باسقا دا شارالارعا باعانىڭ قالىپتاسۋىنىڭ اشىقتىعى جوق. اتاپ ايتقاندا، بۇل قادامدار قۇرىلىس قۇنىن ەسەپتەۋدىڭ باستاپقى نۇكتەسى بولىپ سانالادى. كەيىننەن قازاقستاندا قۇرىلىس نەگە قىمبات ەكەنىنە تاڭدانامىز».

مەملەكەت باسشىسىنىڭ سوزىنە قاراعاندا، ەلىمىزدە 14 مىڭنان استام جوبالىق ۇيىم، 126 ساراپشىلىق ۇيىم بار.

«تەحنيكالىق- ەكونوميكالىق نەگىزدەمە مەن جوبالىق- سمەتالىق قۇجاتنامانى ازىرلەۋ، ساراپتامادان ءوتۋ قۇرىلىستىڭ جالپى سوماسىنان 4 پايىزدان استام قارجىنى قۇرايدى. مىنە، رەزەرۆ قايدا جاتىر. جىل سايىن ونداعان ميلليارد تەڭگەنى تەك جوبالىق- سمەتالىق قۇجاتناماعا جۇمسايمىز. سونىمەن بىرگە، بىردەي نىسانداردىڭ قۇنىندا ەسەلەنگەن ايىرماشىلىق بولۋى مۇمكىن»، - دەدى قاسىم- جومارت توقايەۆ.

وسى ورايدا پرەزيدەنت ۇكىمەتكە ءونىمسىز شىعىنداردى تومەندەتۋ بويىنشا ءتيىستى شارالاردى قابىلداۋدى تاپسىردى.

اۆتور رۋسلان عابباسوۆ